EKEKIELI6 12
12
Omobani Ezekieli ore ase obwoswa
1Ring’ana ri’Omonene rigacha asende, rigantebia: 2“Aye mwanyabanto omenyete ase egati y’abanto batari koigwera; abwo babwate amaiso akorora, korende tibari korora, na amato akoigwa, korende tibari koigwa, ekiagera barabwo tibari koigwera.
3“Ase ayio, aye mwanyabanto, ebeke ang’e amo nebinto biao, obe buna omonto okong’anya korwa ase ense yaye, ong’anye mobaso ekero abanto baroche. Ong’anye korwa aase ao otaare goika aase aande kobaroche. Ande nabo barabaise komanya nonya bare abanto batari koigwera. 4Osokie ebinto biao isiko mobaso kobaroche, ebinto buna ebi’oyo okong’anya korwa ase ense yaye, na rigoika mogoroba, ogende aye bweka kobaroche, buna oyo okong’anya korwa ase ense yaye. 5Obochore ekebao ase enyasi ekero abanto abwo bakoroche, erio obogorie ebinto biao oetereo. 6Ekero omosunte ochire, obeke ebinto biao ireko, ekero abanto bakorigereretie. Otube obosio bwao torora ense, ekiagera nagokorire aye obe ekemanyererio ase egesaku ki’Abaisraeli.”
7Inche ngakora buna nachigetwe; mobaso gati ngasokia ebinto biane isiko, nkaba buna nkong’anya inde, na riachia koba mogoroba, nkabochora enyasi namaboko aane. Ekero omosunte ochire, nkabeka ebinto biane ireko, nkagenda ekero abanto barigereretie.
8Rituko ria kabere mambia, ring’ana ri’Omonene rigacha asende, rigantebia: 9“Aye mwanyabanto, ekeene, Abaisraeli abwo batari koigwera mbakoborie ng’a ninki ekio ogokora. 10Bono obairanerie, obatebie: Aya naro Omonene Nyasae agoteba: Okoorokerigwa oko nigo kore igoro y’omogambi o Yerusalemu, amo n’Abaisraeli bonsi bare imeo. 11Obatebie ng’a aye nigo ore ekemanyererio asebare, na buna aye gwakorire nabarabwo nabo barakore, mbang’anyigwe bairwe ase obosomba. 12Omogambi ore ase egati yabo naimokie ebinto biaye abibeke ireko agende; ekero omosunte ochire abochore ekebao ase enyasi aetereo; nigo aratube obosio bwaye tabaisa korora ense namaiso aye. 13Nimobekere ekeonga kiane abwatwe ase oboreba bwane; erio imoire Babeli, ase ense y’Abakalidayo; nonya naboigo takoyerora namaiso aye, korende nao arakwere. 14Ninsiarere gochia ase chinsemo chionsi abanto bonsi abamoetanaine ase okomokonya, na abarwani baye bonsi b’esegi boigo, naende nimbabwatie nomoro one.
15“Ekero ndabaserie gochia ase abanto b’ebisaku na mbasiarere gochia ase chinse ching’ao, barabwo mbamanye ng’a ninche Omonene. 16Korende nintigarie abanto bake korwa ase egati yabo bataitwe nemioro, gose nenchara, gose noborwaire bogoita, erinde kobare agwo ase egati y’abanto b’ebisaku ase barairwe, banyare koorokia ebibe biabo bi’okogechia bakorire. Erio mbamanye ng’a inche ninche Omonene.”
Omobani okoiguswa ore ekiorokererio
17Ring’ana ri’Omonene rigacha asende, rigantebia: 18“Aye mwanyabanto, karie endagera yao kore nomoondoko, na onywe amache ao gokoiguswa na gochandeka. 19Otebie abanto bamenyete ase ense eye ng’a aya naro Omonene Nyasae agoteba igoro y’abanto bamenyete Yerusalemu ase ense y’Abaisraeli: Barabwo mbarie endagera yabo bare nomoichano na mbanywe amache abo bare nobwoba, ekiagera ense yabo nesakorwe na ebinto bionsi bireo, etigwe ere bosa ase engencho y’obobe obwo abanto bareo bakorire. 20Emechie eyio emenyire nesarigwe kegima, na ense etigwe ere bosa. Erio nario moramanye ng’a inche ninche Omonene.”
Ogoikeranigwa kw’obobani kore ang’e
21Naende ring’ana ri’Omonene rigacha asende, rigantebia: 22“Aye mwanyabanto, ninkwana ki eye mogokwana ase ense y’Abaisraeli, mogoteba: Amatuko abanetwe abeire amange mono, na amaroro ’obobani abeire bosa? 23Ase ayio batebie ng’a aya naro Omonene Nyasae agoteba: Ninsirie enkwana eyio, tibayekwana naende ase ense y’Abaisraeli. Korende batebie: Amatuko ayio abeire ang’e, na amaroro onsi ay’obobani goika aikeranigwe.
24“Amaroro ’obobani ay’okong’ainereria, gose oboringoria bw’okweansia, tibikoba ase egati y’Abaisraeli nonya ng’ake. 25Inche Omonene ninkwane ring’ana nganetie gokwana, na rirorio goika riikerane, tirigotebana nonya ng’ake. Inwe egesaku getari koigwera, ase amatuko aino ninkwane ring’ana ndiikeranie. Nabo inche Omonene Nyasae natebire.”
26Naende ring’ana ri’Omonene rigacha asende, rigantebia: 27“Aye mwanyabanto, Abaisraeli nigo bagoteba iga: Okorora koria ere arorire nokw’amatuko atabe bwango; nigo akobana igoro ye chingaki chikare aare chitaracha. 28Ase ayio obatebie ng’a aya naro Omonene Nyasae agoteba: Amang’ana aane tagotebana nonya ng’ake taikeranigwa, onsi aya nakwanire goika aikeranigwe. Ninche Omonene Nyasae nakwanire.”
Currently Selected:
EKEKIELI6 12: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
