EKEKIELI6 10
10
Obonene bw’Omonene bogotiga Hekalu
1Nkarigereria, nkarora igoro ase eaanga eria yarenge igoro y’emetwe y’abakerubi egento kenga buna safiro, rigena rikomeka‐meka, nabaachire buna ekerogo ki’obonene. 2Omonene agatebia omonto oria obegete eanga y’egatani, “Genda ase egati‐gati y’amagoro aria anga chinyange, are inse y’omokerubi, bwanchare namaboko ao omorero bw’amakara ore ase egati y’abakerubi baria, oyosiarere igoro y’omochie.”
Erio akagenda imorigereretie. 3Abakerubi abwo nigo bateneine ensemo y’okorio y’enyomba y’Omonene, ekero omonto oria asoeteo, ne riire rigaichora ase eraaro ya ime. 4Erio obonene bw’Omonene bokaimokerera igoro, bokarua ase omokerubi oria, bokagenda ase omoriibo o inse bw’egesieri ki’enyomba eria; enyomba eria egaichorwa ne riire, na eraaro egaichorwa nobomeka‐meku bw’obonene bw’Omonene. 5Eriogi ri’ogoakania chimbaba chi’abakerubi baria rikaigugwa ase eraaro ya isiko, buna eriogi ria Nyasae Omobui ekero agokwana.
6Ekero Omonene achigete omonto oria obegete eanga y’egatani agende korusia omorero korwa ase egati‐gati y’amagoro aria anga chinyange, korwa ase egati‐gati y’abakerubi, omonto oria agasoa agatenena ang’e nokomo kw’amagoro aria. 7Omokerubi oria oyomo akarambora okoboko kwaye ase egati‐gati y’abakerubi bande, na agaanchara omorero bw’amakara orenge ase egati‐gati y’abakerubi baria bande, akayobeka ase amaboko ’omonto oria obegete eanga y’egatani, na omonto oria akayobogoria, agasoka noro isiko.
8Nkarora inse ye chimbaba chi’abakerubi baria egento gekororekana buna okoboko kw’omonto. 9Nkarigereria nkarora amagoro aria anga chinyange ane mbarabare y’abakerubi, okomo kore ang’e ase kera omokerubi. Amagoro aria nigo arenge kororekana anga buna kurusolito, rigena rikomeka‐meka. 10Amagoro aria ane nigo agwekaine, kera okogoro nigo kwaroisirie kogasoanigwa nokonde. 11Ekero amagoro ayio arenge kogenda, nigo arenge kogenda ase chinsemo inye chionsi, tarenge koonchoka, akaba akogenda gochia bosio rioka, korende ase okogoro kwa bosio kwarenge kogenda gochia, onsi nigo arenge kobwatia gochiao atari koonchoka ekero akogenda. 12Emebere y’abakerubi baria, na emegongo yabo, na amaboko abo, ne chimbaba chiabo, amo namagoro aria abakerubi baria bane babwate, nigo biaichire namaiso ase chinsemo chionsi. 13Nkaigwa amagoro aria akorokwa “Oborundarundia”.
14Kera omokerubi nigo abwate amasio ane; obosio bwe ritang’ani nigo bwarenge buna obw’omokerubi, na obwa kabere buna obwa mwanyabanto, na obwa gatato buna obw’endo, na obwa kane buna obw’ensoti. 15Amakerubi abwo bakaimoka gochia igoro. Ebitongwa ebio nabio biria naroche ang’e norooche rwa Kebari. 16Ekero abakerubi baria barenge kogenda naboigo na amagoro aria naro arenge goeta mbarabare yabo, na ekero abakerubi baria barenge korambora chimbaba chiabo ase okoimoka gochia igoro, amagoro aria tarenge gwatananeka korwa asebare. 17Ekero barenge gotenena, na amagoro aria naro atenena; ekero barenge koimoka gochia igoro, na amagoro aria aimoka amo nabarabwo, ekiagera omoika bw’ebitongwa biria nigo orenge ime yabo.
18Erio obonene bw’Omonene bokarua ase omoriibo o inse bw’egesieri ki’enyomba y’Omonene, bokagenda bogatenena igoro y’abakerubi baria. 19Erio nkarora abakerubi baria bakorambora chimbaba chiabo na koimokerera igoro korwa ase riroba ekero bagendete, na amagoro aria naro akagenda amo nabarabwo. Bagatenena ase egesoero ki’egeita kia moocha kegochia ase enyomba y’Omonene, na obonene bwa Nyasae bw’Abaisraeli nigo bwarenge igoro yabo. 20Ebitongwa ebio nabio biria naroche bire inse ya Nyasae bw’Abaisraeli ang’e norooche rwa Kebari, na nkamanya ng’a abwo nabakerubi barenge.
21Kera oyomo nigo abwate amasio ane, ne chimbaba inye, na inse ya kera orobaba egento nkiarengeo gekororekana buna okoboko kwa mwanyabanto. 22Amasio abo nigo agwekaine kegima buna aria naroche agwo ang’e norooche rwa Kebari. Kera oyomo akagenderera gochia bosio atari koonchoka.
Currently Selected:
EKEKIELI6 10: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
