ABAFESO 3

Obotomwa bwa Paulo ase abanto b’Ebisaku

1Naki ase ayio inche Paulo nabeire omosibwa o Kristo Yeso ase engencho yaino, inwe abanto b’Ebisaku. 2Negenire ng’a mwaigure amang’ana ’oborendi bw’obuya bwa Nyasae, obo naetwe ase engencho yaino. 3Ase okomaanorerwa natebetigwe obobisi boria buna nabarikera rero iga ase amang’ana amake. 4Ase ayio, ekero morayasome, namonyare korora okomanya kwane kw’obobisi bwa Kristo. 5Obobisi obo Nyasae tamanyetie mwanyabanto ase ebigori binde buna bono ase Omoika abaigoreire abatomwa baye abachenu na ababani. 6Obobisi boria nobo, ng’a abanto b’Ebisaku babeire abanyamwando amo naintwe, ebiimo bi’omobere oyomo, na ababwatani amo naintwe ase cira ere ase Kristo Yeso ase enchera y’enchili.

7Nabo ngakorwa koba omosomba bw’enchili eye koreng’ana nekeegwa ki’obuya bwa Nyasae obo naetwe ase ogokora gw’okobua kwaye. 8Inche inde omoke kobua abachenu bonsi; nonya nabo nkaegwa obuya bw’okoranderia abanto b’Ebisaku obonda bwa Kristo, obo botari korengeka. 9Nkaegwa kobaorokereria abanto bonsi barore omoroberio bw’obobisi boria bwabisetwe korwa kare ase Nyasae, oyotongete ebinto bionsi; 10erinde bono, ase enchera y’ekanisa, obong’aini bwa Nyasae, obore ne chingencho chinyinge, bomanyekane nabagambi na abare nokobua kwa igoro. 11Nabo kwarenge okorigia kwaye gwa kare na kare, okwo aikeranetie ase Kristo Yeso, Omonene oito. 12Asere ntore noboremu na ogosemeria kw’ogosoa ase enchera y’okomwegena. 13Gaki nabasabire, timokwa emioyo ase engencho y’ogochandwa kwane inde nakwo ase engencho yaino, okore obonene bwaino.

Okomanya obwanchani bwa Kristo

14Ase ayio namobekeire Tata amaru aane inse, 15ekiagera bonsi abakorwa ase Tata, abare igoro na abare ase ense, nigo bakorokwa ase erieta riaye. 16Nasabire ng’a koreng’ana nobonda bw’obonene bwaye, abanchere momentwe chinguru ase okobua goetera ase Omoika oye ase omonto o ime; 17na Kristo amenye ase chinkoro chiaino komwamwegenire. Nasabire ng’a inwe komorabe nemeri na oboroso ase obwanchani, 18monyare koba ne chinguru ase okomanya amo nabachenu bonsi obogare na obotambe, na gochia igoro, na gochia inse, 19na komanya obwanchani bwa Kristo oboetete okomanya, erinde monyare goichorwa nogoichorwa gwonsi kwa Nyasae.

20Gaki, asare ere oyoranyare gokora goetania mono kobua ayatogosaba gose ayatokorengereria, koreng’ana ne chinguru echigokora emeremo ime asetore, 21asare ere obonene ase ekanisa na ase Kristo Yeso goika ebigori bionsi kare na kare. Amina.

Currently Selected:

ABAFESO 3: EKEGUSIIBBLE

Highlight

Copy