OMORANDIA 3
3
Engaki ya kera egento
1Kera egento nkere nekero kiaye, na aiga inse y’erioba kera ekegokorekana nkere nengaki yaye.
2Nere engaki y’okoiborwa, na ey’ogokwa;
engaki y’ogosimeka, na ey’ogosimora ekio giasimegetwe;
3engaki y’ogoita, na ey’okogwenia;
engaki y’ogotagora, na ey’okoagacha;
4engaki y’okorera, na ey’ogoseka;
engaki y’okobokia amagombo, na ey’ogotenga;
5engaki y’ogosiarera amagena, na ey’okoyasangereria;
engaki y’okoboania, na ey’ogotaboania;
6engaki y’okorigia, na ey’ogosiria;
engaki y’okogacha, na ey’ogotuguta;
7engaki y’ogotandora, na ey’okobareera;
engaki y’ogokira, na ey’ogokwana;
8engaki y’ogwanchana, na ey’okogechana;
engaki y’esegi, na ey’omorembe.
9Inee! Mbitoki ki omonto akonyora ase emeremo yonsi agwechandera? 10Narorire obokong’u obwo Nyasae aeire mwanyabanto bechande naborobwo. 11Okorire kera egento kiabeire egeseera ase engaki yaye, naende obekire ime ase chinkoro chia mwanyabanto engaki etabe nomoerio. Korende nonya naboigo tibakonyara komanya aya Nyasae akorete korwa omochakano goika omoerio. 12Namanyire ng’a gento kende tikeri kere ekiya kerabagwenere otatiga babe nomogoko, naende bakore ayare amaya ekero bare moyo. 13Omonto kararie na konywa, naende egokie ase ebio echandeire, ekio nekeegwa kia Nyasae.
14Namanyire ng’a gento kende gionsi Nyasae agokora nigo gekogenderera kobao kare na kare; gento kende tigekomentwa ase ekio, gose kende tigekorusigwa korwa ase ekio. Nyasae nere okorire igo, erinde mwanyabanto bamoiroke. 15Amang’ana areo bono, nao arenge korwa kare; na ayio agochia koba, boigo nao arenge korwa kare. Nyasae nigo akorigia ayio aetire.
Oboronge tibori ase ense
16Naende nkarora aiga inse y’erioba ng’a aase ekeene kegwenerete koba, nao obobe bore, na aase oboronge bogwenerete koba, nao boigo obobe bore. 17Erio ngateba ase enkoro yane ime ng’a Nyasae nanachere abanyaboronge ekina, na abanyabibe boigo, ekiagera obekire engaki ase kera ring’ana, na ase kera emeremo. 18Naende ngateba ase enkoro yane ime ng’a Nyasae nigo agoteema mwanyabanto kobaenekia ng’a barabwo nigo banga buna ching’iti. 19Amang’ana akonyora ching’iti naro ayio akobanyora mwanyabanto; buna ching’iti chigokwa, naboigo na mwanyabanto bagokwa. Omoika noyomo ore ase ching’iti na ase mwanyabanto; mwanyabanto tabueti ching’iti kende. Amang’ana onsi mbosa. 20Mwanyabanto nigo bakogenda aase ching’iti chikogenda; mwanyabanto nigo baruete ase amaroba, ne ching’iti naboigo; nigo bakoirana ase amaroba, naboigo na chirochio. 21Ning’o omanyete gose omoika o mwanyabanto nigoro ogochia, na oyo bwe ching’iti ogenda inse y’ense? 22Ase ayio nkarora ng’a gento kende tikeri kere ekiya, otatiga omonto agokere emeremo yaye; ekio nakio egetari kiaye. Ning’o orachie komoirania ache korora na komanya ayakoregete nyuma yaye?
Currently Selected:
OMORANDIA 3: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
