OMORANDIA 4
4
1Naende nkarigereria nkarora ogokora okobe kware gokorwa inse y’erioba. Nkarora abwo bagokorerwa bobe bakorera, na monto onde tarengeo okobaremia, ekiagera abwo barenge kobakorera bobe nigo barenge nokobua, na onde tarengeo okobaremia. 2Nkarora ng’a nigo ere buya ase abakure kobua ase abare moyo. 3Korende ase oyo otaraiborwa, oyio otararora ogokora okobe kore aiga inse y’erioba, nigo ere buya asare kobua ase abwo bonsi bare moyo na abakure.
4Nkarora emeremo eye emekong’u egokorwa, na omokia bwonsi bw’ogwechanda ase ogokora emeremo, ayio nigo agokorwa, ekiagera omonto akoba ne ribero ng’a abue oyonde. Ayio boigo mbosa, na aya akominyokerwa konyorwa nigo are buna embeo bosa. 5Omoriri nigo agwetumata, na bweria omobere oye orea. 6Mbuya koba negento geichire oroe oromo na koba nomorembe, kobua koba nebinto biichire chindoe ibere na koba nogwechanda na kominyokera konyora ebire buna embeo bosa.
7Naende nkarora obosa kegima bore inse y’erioba: 8Nare omonto otabwate omwana gose omwabo; ere nigo agendererete gwechanda gokora emeremo emekong’u, na amaiso aye tari goisaneka ne chinibo; omonto oyio tana kweboria, “Ning’o ngochandekera gokorera na kwerina omogoko bwonsi?” Aya naro mbosa, na ogwechanda gotari nomogoko.
9Nigo ere buya koba babere kobua oyomo, ekiagera mbanyore eng’eria engiya ase emeremo yabo bagokora. 10Oyomo karagwe, oyonde namogororokie; korende obobe nobwaye oria ore bweka ekero aragwe, na onde tari oramogororokie. 11Abanto babere kobararare amo mbaigwe riberera korende naki oyomo arakore aigwe riberera kare bweka? 12Omonto aise korwania oyomo ore bweka, namobue, korende onye bare babere, takobabua. Engori esisire nemegoye etato teri kobutoka bwango.
13Omwana omosae omotaka ore nobong’aini nigo’are omuya kobua omoruoti omogotu ore omoriri, otari gwancha gosemigwa; 14neba ng’a omosae oria nigo aruete echela akabekwa oboruoti, gose nigo aiboretwe ore omotaka ase obogambi bw’omoruoti oria. 15Nkarora abanto bonsi abamenyete inse y’erioba bakobwatia omosae oria ogochia kobekwa oboruoti ribaga ri’oria orengeo. 16Abanto abwo arenge koraa tibare kobareka. Nonya naboigo abwo barachiche nyuma y’abwo tibakomogokera. Ekeene, aya naro mbosa, na aya akominyokerwa konyorwa nigo are buna embeo bosa.
Currently Selected:
OMORANDIA 4: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
