OKOIRANERERA 8
8
Orogongo oruya rokoirwa
1“Moigwere amachiko aya onsi nabaeire ase rituko ria rero, moyabwate, erio nario morabe moyo na komentekana, erinde mogende moire ense eria Omonene arierete chisokoro chiaino eira ng’a nabayee. 2Moinyore buna Omonene, Nyasae oino, abeire okobaraa ase orogendo rwaino rwonsi ase erooro, ase engaki y’emiaka emerongo ene yaetire, ase okobakora mobe abaitongo na kobateema ase okomanya ebirengerio biaino, arore gose moganetie korenda amachiko aye, gose yaya. 3Akabakora mokaba abaitongo, akabatiga mokaba nenchara. Erio akabaa mana, endagera eyio gete inwe motamanyete, nonya ne chisokoro chiaino chitamanyete, erinde monyare komanya ng’a omonto takonyara koba moyo ase endagera yoka, korende nigo akoba moyo ase kera ring’ana rikorwa ase omonwa bw’Omonene. 4Ase emiaka eye yonsi emerongo ene, chianga chiano tichiabagoterete, gose amagoro aino tabimbete. 5Momanye ng’a, buna omonto akoa omwana oye egesusuro ase okomorongeyia, naboigo n’Omonene, Nyasae oino, akobaa egesusuro ase okobarongeyia. 6Ase ayio mobwate amachiko ’Omonene, Nyasae oino, ase ogotaara ase chinchera chiaye na komoiroka. 7Omonene, Nyasae oino, nkobaira are ase ense engiya ebwate chindooche ne chinsoko, ne chintuboka chigosokia amache gochia ase amagoko na ase ebitunwa. 8Ense eyio ere nengano na esairi, na emesabibu, na emeko, na emekomomanga, na emezeituni, boigo namooke. 9Ase ense eyio inamorie endagera enyinge etari kobaerera; aroro timokoremerwa gento kende gionsi. Amagena areo nigo are nebioma, naende namoremere chitaai korwa ase ebitunwa biaye. 10Namonyore endagera morie moisaneke. Erio motogie Omonene, Nyasae oino, ase engencho y’ense eyio engiya abaeire.”
Ogokurerwa ase ogotamweba Omonene
11“Mwerende mono, timobaisa kweba Omonene, Nyasae oino. Timobaisa gotiga kobwata amachiko aye, na emeroberio yaye yonsi echikire, aya nkobaa ase rituko ria rero. 12Ekero morabe mwanyorire endagera ebaisaine na koigota, naende mwaagachire chinyomba chingiya na komenyao, 13na ekero amaicho aino e chiombe na aye ching’ondi arabe amentekanire, ne chifeta, ne chitahabu chiaino boigo, na ebinto binde bionsi mobwate biramentekane, 14timobaisa koenena na kweba Omonene, Nyasae oino, oyobarusetie korwa ase ense ya Misiri, ense y’obosomba. 15Akabaraa na kobaetia ase erooro enene eyarenge ey’okoondokia, eyarenge ne ching’iti chingenda inse chire nobosongo, na ebiuge boigo: ase erooro eria enyomo etabwate amache ere akababochorera amache korwa ase egetare keria egekong’u. 16Agwo ase erooro akabaa mana mokaria, endagera chisokoro chiaino chitamanyete, anyare kobakora mobe abaitongo na kobateema, erinde ase omoerio oino abakorere amaya. 17Mwerende, timobaisa gokwana ase chinkoro chiaino ime: Okobua gwaito ne chinguru chi’amaboko aito nachio chiatonyoreire obotenenku obo. 18Moinyore ng’a Omonene, Nyasae oino, nere okobaa chinguru chi’okonyora obotenenku, ekiagera aganetie gokong’ia okobwatana kwaye kw’ogotianania okwo akorete ne chisokoro chiaino buna akorire goika rero iga. 19Komoramwebe Omonene, Nyasae oino, na koonchoka gochia ase chinyasae ching’ao ase ogochikorera, na gochisasima, nabakureire ase rituko ria rero ng’a, ekeene, goika mosire kegima. 20Buna ebisaku biria, Omonene arasirie korwa ase amasio aino, naboigo nainwe morasirigwe, ekiagera motaigwerete eriogi ri’Omonene, Nyasae oino.”
Currently Selected:
OKOIRANERERA 8: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
