OKOIRANERERA 7
7
Abanto b’Omonene omonyene
(Okong’ 34:11–16)
1“Omonene, Nyasae oino, nabaikie ase ense eria, mogochia koira ebe eyaino, na aserie ebisaku ebinge birue ase amasio aino, ebisaku bitano na bibere bire ebinene, naende bire ne chinguru kobabua. Ebisaku ebio nabio ebi: Abahiti, na Abagirigasi, na Abaamori, na Abakanani, na Abaperisi, na Abahivi, na Abayebusi. 2Ekero Omonene, Nyasae oino, arabeke abanto abwo ase amaboko aino, nainwe mobabue, goika mobaite na kobasiria kegima, timobaisa gokora okobwatana kw’ogotianania nabarabwo, gose kobarorera amabera. 3Timobaisa konyuomerana nabarabwo; timorua abana baino abaiseke ase abamura babo, gose timonyuomeria abana abamura baino abaiseke babo, 4ekiagera barabwo nigo baraonchore abana baino abamura batige gosasima Omonene, erio bakorere chinyasae ching’ao. Erio Omonene abaise koba nendamwamu asemore, abasirie ara rimo rioka. 5Aya naro morabakorere: Motagore ebisasimero biabo, mobutore chisiiro chiabo bagosasima, monachane emete y’Asera, enyasae yabo enkungu, na mosambe nomorero emegwekano yabo bagosasima, 6ekiagera inwe nabanto mwatananetwe koba abachenu ase Omonene, Nyasae oino. Ere obachorire mobe abanto baye omonyene kobua abanto bande bonsi bare ase ense.”
7“Omonene tang’usetwe nainwe, gose tabachorete ekiagera mwarenge abange kobua abanto bande (inwe nigo mwarenge abake mono kobua abanto bonsi), 8korende ekiagera nigo abanchete, naende akagania goikerania eira eria arierete chisokoro chiaino. Ayio akagera Omonene akabang’anyia nokoboko kwaye kore ne chinguru, na kobabooria korwa ase ense y’obosomba korwa ase okoboko gwa Farao, omoruoti o Misiri. 9Gaki manya ng’a Omonene, Nyasae oino, nere bweka Nyasae bw’ekeene, naende Nyasae bw’obwegenwa, oyokorenda okobwatana kwaye kw’ogotianania, na koorokia obwanchani bwaye botari koera goika ebiaare chilifu ase baria bamwanchete na babwatete amachiko aye. 10Korende ere nigo akobaakana obobe baria bamogechete, na kobasiria. Tari gotebana koa omonto oria omogechete egesusuro. 11Bono morende na koigwera amachiko, na emeroberio echikire, mokore ayio onsi nabachikire ase rituko ria rero.”
Ogosesenigwa ase abaigweri
(Okoir 28:1–14)
12“Komoraigwere emeroberio eye echikire na koyerenda, na koyekora, rirorio Omonene, Nyasae oino, naikeranie na gokong’ia okobwatana kwaye kw’ogotianania, okwo akorete nainwe, na kobaorokeria obwanchani bwaye botari koera, buna arierete chisokoro chiaino eira ase ogotiana. 13Ere nabanche na kobasesenia, nabamentekanie. Boigo nasesenie oroiboro rwe chinda chiaino, na okwama kw’emegondo yaino, na endagera yaino, na edivai yaino, na amaguta aino ay’amazeituni; chiombe chiaino chimentekane, amo ne ching’ondi ne chimbori chiaino, ase ense eria arierete chisokoro chiaino eira ng’a nabayee. 14Namosesenigwe kobua ebisaku binde bionsi. Ase egati yaino onde tari omosacha gose omokungu, orabe omogomba, gose etugo ende yaino tekogombaa. 15Omonene narusie amarwaire onsi korwa asemore; nonya nobomo bw’amarwaire aria amabe arenge Misiri, aria ase mwamenyete, tagocha igoro asemore kobachanda, korende nigo arayarente ase abanto baria bonsi babagechete. 16Abanto abwo bonsi Omonene, Nyasae oino, arabeke ase amaboko aino, mobasirie, timobarorera amabera. Timobaisa gokorera chinyasae chiabo, ekiagera ase ogokora igo, chirochio nachinyare kobatega.”
17“Moise goteba ase chinkoro chiaino ime: Ebisaku ebi nigo bire ebinene gotobua, naki toranyare kobiseria birueo? 18Timobairoka, korende moinyore buna Omonene, Nyasae oino, akorete Farao na abanto bonsi ba Misiri. 19Moinyore amaakwa amanene aria mwaroche, na ebikone, na amakumia, na buna Omonene, Nyasae oino, abarusetieo nokoboko kwaye kore ne chinguru, koramboire. Naboigo arakore abanto bonsi baria moirogete. 20Naende Omonene natome ebiaramba ase egati yabo bibarase, baria abatigari barebise korwa asemore, basire kegima. 21Timoondoka ase engencho yabo, ekiagera Omonene, Nyasae oino, nigo are egati yaino, ere nere Nyasae omonene, naende oyo bw’okoondokia. 22Omonene, Nyasae oino, naserie ebisaku ebio ng’ora ng’ora, birue asemore. Timobaisa kobiseria biere kegima ase ekero ekemo gioka. Moise gokora bo, ching’iti chi’orosana nigo chiramentekane chibachande. 23Korende Omonene, Nyasae oino, nabeke ababisa baino ase amaboko aino, erio abatantanie, nainwe goika mobasirie kegima. 24Nabeke abaruoti babo ase amaboko aino, erio mobaite na kobasiria nonya namarieta abo tainyorwa ase ense. Omonto onde tari, nonya noyomo, oranyare korwana nainwe na kobabua; goika mobasirie kegima. 25Emegwekano yabo bagosasima moyesambe nomorero. Timogania koira chifeta gose chitahabu chire ase emegwekano eyio. Moise gochigania nigo chirabe chikobatega. Ayio onsi nigo arabe okogechia ase Omonene, Nyasae oino. 26Timobaisa korenta okogechia buna okwo ase chinyomba chiaino. Komorakore igo, nigo moraragererigwe. Mokogeche na kogochaya, ekiagera korokwo nigo koragereirie.”
Currently Selected:
OKOIRANERERA 7: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
