OKOIRANERERA 6
6
Ogochika Okonene
1“Aya naro amachiko, na emeroberio echikire, Omonene, Nyasae oino, anchigete imborokererie, erinde moyaigwere na koyakora ase ense eria mogochia koira ebe eyaino. 2Ase obogima bwaino bwonsi, inwe amo nabana baino, na abachokoro baino, goika moiroke Omonene, Nyasae oino, na kobwata emeroberio yaye yonsi yachikirwe, na amachiko aye onsi ayio inche nkobachika, erio nario amatuko aino arabe amange. 3Ase ayio inwe Abaisraeli, tegerera moigwe, monyare koyarenda; erio nario erabe buya asemore, naende momentekane mono ase ense eria entenenku ere namabeere na amooke, buna Omonene, Nyasae bwe chisokoro chiaino, abarierete eira.
4“Inwe Abaisraeli, tegerera moigwe! Omonene, Nyasae oito, nere bweka Omonene. 5Mwanche Omonene, Nyasae oo, nenkoro yao yonsi, na omoyo oo bwonsi, ne chinguru chiao chionsi. 6Amang’ana aya nkobachika rituko ria rero timobaisa koyeba nonya ng’ake. 7Moyorokererie abana baino mono, mobe mokona‐koyairanerera botambe; moyakwane ekero moikaransete ase chinyomba chiaino, na ekero more ase orogendo inchera, na ekero mogochia korara, na ekero mokoboka. 8Moyasiberanie ase amaboko aino, na moyabeke ase amasio aino igoro, abe amariko akobainyoria. 9Moyarike ase emetobwa na emeriibo y’ebisieri bie chinyomba chiaino, na ase ebiita biaino.
Ogokurerwa igoro y’ogotaigwera
10“Omonene, Nyasae oino, nabaire na kobaikia ase ense eria arierete chisokoro chiaino, Ibrahimu, na Isaka, na Yakobo eira, ng’a nabae inwe ense eria ebwate emechie emenene naende emiya, eyio inwe motaagachete. 11Chinyomba nigo chirabe chiichire nebinto ebiya, ebio inwe motabegeteo, ne chinsoko chi’amache echio motakunyete, na emegondo y’emesabibu na ey’emezeituni, eyio motasimegete. 12Komoraikeo mwerende mono, timobaisa kweba Omonene oria obarusetie korwa ase ense ya Misiri, ase mwarenge abasomba. 13Momoiroke Omonene, Nyasae oino; momokorere ere bweka na motiane ase erieta riaye rioka. 14Timobaisa gosasima chinyasae chinde chionsi chiria chi’abanto babaetanaine. 15Omonene, Nyasae oino, oyomenyete ase egati yaino, nigo are Nyasae bwe risemi; mwerende, erinde endamwamu yaye tebaisa gwoka igoro asemore na kobasiria korwa ase ense.
16“Timobaisa goteema Omonene, Nyasae oino, buna mwamoteemete aaria Masa. 17Mobe abegenwa ase okobwata amachiko Omonene, Nyasae oino, na oborori bwaye, na emeroberio echikire, eyio abaeire. 18Mokore ayare amaronge na amaya ase obosio bw’Omonene, erio nario erabe buya asemore, monyare gosoa na koira ense eria engiya Omonene arierete chisokoro chiaino eira ng’a nabayee, 19na kobaseria ababisa baino bonsi korwa asemore, buna Omonene atebete.
20“Ase chingaki chigochi‐gocha ekero abana baino barababorie: Ninki engencho y’oborori obo, na amachiko aya, na emeroberio eye, ebi Omonene, Nyasae oito, abachigete? Nase ki Omonene, Nyasae oito, abachigete amachiko aya na emeroberio eye? 21Goika mobairanerie: Intwe nigo twarenge abasomba ba Farao ase ense ya Misiri, na Omonene agatorusiao nokoboko kwaye gwe chinguru. 22Omonene nigo aorogetie ebikone na amakumia amanene, naende ay’okoondokia, aaria ase ense ya Misiri, ase Farao, na ase abanto bonsi b’enyomba yaye, naintwe tokayarora. 23Omonene agatorusia ase ense eria, erio agatorenta aa, agatoa ense eye arierete chisokoro chiaito eira ng’a nabayee. 24Erio agatochika ng’a toigwere amachiko aya onsi, na koiroka Omonene, Nyasae oito, erio nario erabe buya asetore botambe. Toise gokora bo ere natorende, buna atorendete goika rero iga, naintwe natogenderere koba moyo. 25Onye tokorenda na koigwera amachiko aya onsi, ase obosio bw’Omonene, buna ere atochikire, nigo torabarerwe oboronge.”
Currently Selected:
OKOIRANERERA 6: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
