OKOIRANERERA 5
5
Amachiko ikomi
(Okong’ 20:1–7)
1Musa akarangeria Abaisraeli bonsi gocha amo, akabatebia, “Inwe Abaisraeli, igwa amachiko na emeroberio echikire nkobatebia rituko ria rero, moyeorokererie, mobe nobomaene ng’a moyakore. 2Omonene, Nyasae oito, nakorete okobwatana kw’ogotianania amo naintwe agwo Horebu. 3Omonene takorete okobwatana okwo ne chisokoro chiaito, korende nigo akorete okobwatana okwo naintwe abanyene, intwe twensi abatore moyo rituko ria rero. 4Agwo ase egetunwa Omonene nigo akwanete nainwe obosio ase obosio korwa ase egati‐gati y’omorero. 5Ase engaki eria inche nabete nteneine ase egati y’Omonene nainwe, narenge gokwana nainwe ring’ana ri’Omonene, ekiagera inwe nigo mwarenge nobwoba ase engencho y’omorero oria, timwatiirete gocha ase egetunwa.
“Omonene agakwana: 6Inche ninche Omonene, Nyasae oino, nabarusetie korwa ase ense ya Misiri, ense y’obosomba.
7“Toba ne chinyasae chinde otatiga inche.
8“Tobaisa gwekorera omogwekano bw’ogosasimwa, omogwekano o getongwa kende gionsi kere igoro, gose ase ense, gose ime ase amache inse y’ense. 9Tobaisa gosasima gose gokorera emegwekano, ekiagera inche ninche Omonene, Nyasae oo, Nyasae bwe risemi. Ase engencho y’amabe ’abaibori nigo nkobaa abana egesusuro goika ekiaare kia gatato na egia kane, abwo bangechete. 10Korende nigo nkoborokia obwanchani bwane botari koera goika ebiaare chilifu, ase abwo banyanchete na babwatete amachiko aane.
11“Toriatora na korikorera bobe erieta ri’Omonene, Nyasae oo, ekiagera Omonene tagotiga komoa egesusuro oria okoriatora na korikorera bobe erieta riaye.
12“Bwata rituko ri’Esabato, oriatanane ribe richenu, buna Omonene Nyasae oo, agochigete. 13Ase amatuko atano na rimo okore emeremo yao yonsi. 14Korende rituko ria gatano na kabere, nerituko ri’Esabato riatananwe ase Nyasae oo. Ase rituko erio tokora emeremo ende yonsi, aye gose omwana oo, omomura gose omoiseke, nonya nomosomba oo, omomura gose omoiseke, gose eng’ombe yao, gose etigere yao, gose etugo yao ende yonsi egokora emeremo, gose omomenyi oyomenyete mwao. Omosomba oo, omomura gose omoiseke, nabarabwo batimoke buna aye ogotimoka. 15Inyora ng’a aye omonyene nigo kwarenge omosomba ase ense ya Misiri, na Omonene, Nyasae oo, agakorusia korwa aroro nokoboko kore ne chinguru koramboire. Ase ayio Omonene, Nyasae oo, nigo agochigete orende rituko ri’Esabato.
16“Sika iso na nyoko, buna Omonene, Nyasae oo, agochikire; nario oramenye amatuko amange, naende erabe buya asore ase ense eria Omonene, Nyasae oo, agochia gokoa.
17“Toita.
18“Totomana.
19“Toiba.
20“Tomotebera omogisangio oo oborimo.
21“Tobaisa kogania omokungu bw’omogisangio oo. Tobaisa kogania enyomba y’omogisangio oo, nonya nomogondo oye, gose omosomba oye, omomura gose omoiseke, gose eng’ombe yaye, gose etigere yaye, gose gento kende gionsi abwate.
22“Amang’ana aya naro Omonene akwanete ase omosangererekano oino bwonsi agwo ase egetunwa, ekero akwanete korwa ase egati‐gati y’omorero, ne riire, na omosunte ekerima. Akayakwana neriogi rinene, na tamentete gento kende gionsi. Akayarika ase chibao ibere chi’amagena, erio agaching’a.
Abanto bakoba nobwoba
(Okong’ 20:18–21)
23“Ekero egetunwa keria kiagendererete gwoka omorero, mokaigwa eriogi korwa ase egati‐gati y’omosunte oria, nainwe mwensi, abamore abatang’ani na abagaaka ase ebisaku biaino, mogacha asende. 24Mokabora: Naama, Omonene, Nyasae oito, otworokirie obonene bwaye na obonguru bwaye, naintwe twaigure eriogi riaye korwa ase egati‐gati y’omorero. Rituko ria rero twarorire Nyasae ogokwana na mwanyabanto, na mwanyabanto oyio ogendererete koba moyo. 25Bono nase ki togwenerete gokwa? Omorero oyo omonene nigo ogochia gotosamba na gotosiria, onye naende togochia koigwa eriogi ri’Omonene, Nyasae oito, goika tokwe. 26Inee! Omonto nareo obeire okoigwa Nyasae ore moyo kagokwana korwa ase egati‐gati y’omorero, buna intwe twamoigure, na omonto oyio ogendererete koba moyo? 27Naende mogantebia: Aye genda ang’e, oigwe amang’ana onsi Omonene, Nyasae oito, agokwana. Erio oche ototebie onsi ayio Omonene, Nyasae oito, aragotebie, naintwe natoyaigwe na koyakora.
28“Omonene nigo aigwete amang’ana aino ekero keria mware gokwana nainche, erio agantebia: Naigure amang’ana abanto abwo bakwanire naye. Ayio onsi bagotebirie, mbuya bakwanire. 29Onye ndiria baare koba nomoyo oyio botambe, na kong’iroka na korenda amachiko aane onsi, nanga kera egento nigo kiare koba buya asebare, na ase ororeria rwabo, kare na kare. 30Genda obatebie bairane ase chiema chiabo. 31Korende aye tigara aa asende, na inche ngotebie amachiko onsi, na emeroberio echikire, na onsi aya nachikire, ayio ogochia koborokia, erio bayarende na koyakora ase ense eria ngochia kobaa, ebe eyabo.
32“Ase ayio morende na gokora aya Omonene, Nyasae oino, abachikire. Timoyatiga na koonchoka gochia aande, ensemo y’okorio gose ey’okobee. 33Mobwatie chinchera chionsi Omonene, Nyasae oino, abachikire, erio nario morabe moyo, naende nario erabe buya asemore, na inwe momenye amatuko amange ase ense eria mogochia koira ebe eyaino.”
Currently Selected:
OKOIRANERERA 5: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
