OKOIRANERERA 4
4
Musa ogosorora Abaisraeli babe abaigweri
1Naende Musa agakwana, “Inwe Abaisraeli, bono igwera amachiko na emeroberio nkoborokereria, moyakore, erio nario morabe moyo, erinde mogende moire ense eria, Omonene, Nyasae bwe chisokoro chiaino, agochia kobaa. 2Timomenta ring’ana rinde rionsi ase aria nabachikire, gose timorusia gento aroro. Mobwate amachiko ’Omonene, Nyasae oino, ayio inche nabaeire. 3Inwe abanyene mwaroche aya Omonene akorerete Baali‐Peori; abanto baria bonsi basasimete Baali‐Peori, akabasiria korwa ase egati yaino. 4Korende inwe abamwabete abegenwa ase Omonene, Nyasae oino, kera oyomo oino moyo are goika rero iga.
5“Naama! Inche naborokereirie amachiko na emeroberio, buna Omonene, Nyasae one, anchigete, erinde inwe moyaigwere ase ense eria mokogenda koira ebe eyaino. 6Moyabwate na koyaigwera, ekiagera aro naro arorokererie abanto b’ebisaku binde ng’a more nobong’aini. Barabwo kobaraigwe amachiko aya onsi mbatebe: Ekeene, abanto b’egesaku eke ekenene nigo bare abang’aini, naende abamanyi!
7“Inee! Mbanto ba gesaku ki ekenene babwate enyasae ere ang’e nabarabwo buna Omonene, Nyasae oito, are ang’e naintwe? Nigo agotoigwa kero kende gionsi tokomorangeria atokonye. 8Naende mbanto ba gesaku ki ekenene babwate amachiko amaronge na emeroberio emeronge, buna amachiko aya onsi inche naborokereirie rero? 9Mwerende! Morende chinkoro chiaino, erinde timobaisa kweba aya mwarorire namaiso aino, gose koyatiga arue ase chinkoro chiaino ase amatuko onsi more moyo. Boigo moyorokererie abana baino na abachokoro baino, 10erinde bamanye ayakoregete ase rituko riria mwatenenete ase obosio bw’Omonene, Nyasae oino, agwo Horebu, ekero Omonene akwanete nainche, agantebia: Sangereria abanto bonsi amo, na inche mbatebie amang’ana, erinde beorokererie konyiroka ase amatuko onsi barabe bare moyo ase ense, nabarabwo baborokererie abana babo boigo.
11“Inwe nigo mwachete ang’e, mogatenena ase egetunwa keria mbarabare, ekero kiagendererete gwoka omorero oria ochongororogete gochia igoro obwate erioki rimwamuti, na amare, na omosunte omonene. 12Erio Omonene agakwana nainwe korwa ase omorero oria ime, mokaigwa amang’ana aye, korende timwaroche ekieni kiaye. Nigo mwaigwete eriogi rioka. 13Omonene akaborokereria okobwatana kwaye kw’ogotianania, akabachika mokobwate; okwo nakwo amachiko aye ikomi. Akayarika ase chibao ibere chi’amagena. 14Aroro agwo Omonene aganchika ng’a imborokererie amachiko ayio, na emeroberio echikire, erinde monyare koyaigwera ase ense eria mokogenda koira.
Ogokurera kw’ogotasasima emegwekano y’ogosasimwa
15“Ekero Omonene akwanete nainwe korwa ase omorero ime agwo Horebu, timwaroche ekieni kiaye. Ase ayio moigwere na kwerenda, 16timobaisa gokora ebibe na gwesaria ase okoroisia omogwekano bw’ogosasimwa, omogwekano onde bwensi ogwekaine omonto, omosacha gose omokungu, 17gose omogwekano ogwekaine eng’iti ende yonsi ere ase ense, gose oyo bw’enyoni ebwate chimbaba ekoiruruka igoro, 18gose oyo bw’eng’iti ekwagura ase riroba, gose oyo bw’enswe ende yonsi ere ime ase amache inse y’ense. 19Ekero okorigereria gochia igoro, gokorora ebinto bitongire bireo buna erioba, na omotienyi, ne ching’enang’eni, omoganda oyio bwonsi, tobaisa gotiga Omonene, erinde osasime na gokorera ebinto ebio, ekiagera Omonene, Nyasae oo, obirure ase ebisaku bionsi bire inse y’erioba. 20Korende inwe Omonene obarusirie ase eriko ri’ebioma rigosamba, nario Misiri, erinde mobe abanto baye ere omonyene buna more goika rero iga. 21Kobua ayio Omonene nigo ambeete ase engencho yaino, agatiana ng’a inche tinkonyara kwamboka orooche rwa Yorodan, na kogenda ase ense eria engiya Omonene, Nyasae oino, agochia kobaa, ebe omwando oino. 22Inche goika nkwere aiga ase orogongo oro: ting’eiri ribaga kwamboka Yorodan, korende ninwe moramboke, erinde moire ense eria engiya. 23Moigwere na kwerenda, timobaisa kweba okobwatana kw’ogotianania, okwo Omonene, Nyasae oino, akorete nainwe; timobaisa koroisia omogwekano onde bwensi mogosasima. Omonene, Nyasae oino, obakanirie ayio. 24Omonene, Nyasae oino, nigo are omorero ogosamba na gosiria; ere nere Nyasae bwe risemi.
25“Komogochia koibora abana na abachokoro, naende komenya amatuko amange ase ense eyio; timokora ebibe na gwesaria ase okoroisia omogwekano onde bwensi mogosasima gose gokora amabe ase obosio bw’Omonene, Nyasae oino. Moise gokora ayio, rirorio nigo moramogechie abe nendamwamu asemore. 26Onye timokoigwera, inche nkorangeria inde igoro na ense chibe birori asemore rero ng’a, goika mosire kegima ase obwango. Timokomenya amatuko amange ase ense eyio mogochia koira, ekero moramboke Yorodan. 27Omonene nabasiarere ase egati y’abanto b’ebisaku binde, nainwe abamoratigare nabake ase omobaro, namomenye ase egati y’abanto baria ase Omonene arabaire. 28Agwo ase morasiarerwe gochia, namobe mogosasima chinyasae chiroisirie korwa ase emete na amagena, emeremo y’amaboko a mwanyabanto, echio chitari korora, gose koigwa, gose koragera, gose konyonka. 29Korende aroro agwo, komorarigie Omonene, Nyasae oino, ne chinkoro chiaino chionsi, na emioyo yaino yonsi, inamomonyore. 30Ekero morabe nemechando, na ayio onsi arabanyore ase amatuko agochigocha, imomoiranere Omonene, Nyasae oino, naende moigwere eriogi riaye. 31Omonene, Nyasae oino, takobatiga, ekiagera ere noyo bw’amabera. Takobasiria, gose takweba okobwatana kwaye kw’ogotianania akorete ne chisokoro chiaino.
32“Bono boria, momanye korwa ase amatuko a kare, amatuko ayio arengeo ekero konya motaraiborwa, korwa rituko riria Nyasae atongete mwanyabanto ase ense, naende moborie momanye korwa ase ensemo eyemo y’ense goikera ensemo ende, gose amang’ana agwekaine buna aya ana koba, gose koigugwa. 33Inee! Abanto bande bana koigwa Nyasae ogokwana korwa ase egati‐gati y’omorero buna inwe mwaigure, naende mogendererete koba moyo? 34Gose enyasae ende kero kende gionsi yana korenta egesaku kende korwa ase egati y’ebisaku binde, erinde agekore kebe abanto baye omonyene, buna Omonene, Nyasae oino, abakorererete inwe agwo Misiri? Ase amaiso aino nigo arentete amateemwa, na ebikone, na amakumia, na esegi, na ase okoboko kore ne chinguru koramboire akarenta okoondokia okonene. 35Omonene nigo aborogetie ayio, erinde momanye ng’a Omonene nere Nyasae; onde tari otatiga ere bweka. 36Akabakora mokaigwa eriogi riaye riarwete igoro, erinde anyare koborokereria; na ase ense akaborokia omorero omonene, nainwe mokaigwa amang’ana aye korwa ase egati‐gati y’omorero oria. 37Agancha chisokoro chiaino, na ase engencho eyio akabachora inwe, ororeria rwabo, mobe ribaga riabo, na ere omonyene akabang’anyia korwa Misiri ase okobua kwaye okonene. 38Agaseria korwa bosio bwaino ebisaku biarenge ebinene, naende biarenge ne chinguru kobabua; akabarenta ase ense yabo, nainwe mokayeira ekaba omwando oino, naboigo ere nonya ngoika rero iga. 39Ase ayio manya rituko ria rero, morengererie mono ng’a, Omonene nere Nyasae o igoro na ense; naende onde tari otatiga ere bweka. 40Inwe goika morende emeroberio yaye echikire na amachiko aye, ayio inche nkobaa rituko ria rero, erio nario erabe buya asemore, naboigo nase abana baino, naende amatuko aino nabe amange ase ense eria Omonene, Nyasae oino, agochia kobaa ebe eyaino kogenderera.”
Emechie y’obotamero moocha ya Yorodan
41Erio Musa agachora emechie etato agwo moocha ya Yorodan. 42Emechie eyio nero omoiti aranyare gotamera, oria oraite omonto onde mosiabano, gose atamogechete agwo ritang’ani. Omonto oria karatamere oyomo bw’emechie eyio nigo aratigwe abe moyo. 43Beseri ase erooro, ase ense eraire eimokererete igoro, nigo orenge omochie bw’obotamero ase abanto b’egesaku kia Reuben, na Ramoti ase ense ya Gileadi ase abanto ba Gadi, na Golani ase ense ya Basani ase abanto ba Manase.
Okoruegwa kw’amachiko a Nyasae
44Aya naro amachiko a Nyasae Musa aruete ase Abaisraeli. 45Nyuma Abaisraeli kobarure Misiri, Musa akaa Abaisraeli oborori, na emeroberio echikire, na amachiko aya. 46Aya igo abete agwo moocha ya Yorodan ase rikura riarenge ensemo ekororia Beti‐Peori, ase orogongo rwa Sihoni, omoruoti bw’Abaamori, oyio omenyete agwo Hesiboni. Nere oria Musa na Abaisraeli babuete ekero barwete Misiri, 47bakaira ense yaye ekaba eyabo, naende bakaira ense ya Ogi, omoruoti o Basani. (Abaruoti abwo babere nigo bamenyete moocha ya Yorodan.) 48Bakaira ense gochakera Aroeri ase orobebe rwe rigoko ri’Arinoni goikera egetunwa keria Sioni (nakio Herimoni). 49Bakaira na Ekerubo Ekiomo moocha ya Yorodan goikera ase Enyancha y’Omonyo inse y’ebitirimboko bi’egetunwa gia Pisiga.
Currently Selected:
OKOIRANERERA 4: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
