OKOIRANERERA 33
33
Musa ogosesenia ebisaku b’Abaisraeli
1Oko nakwo ogosesenia Musa, omonto o Nyasae, asesenetie Abaisraeli ekero konya atarakwa. 2Akabora:
“Omonene agacha korwa Sinai,
akabamorekera korwa Seiri,
akabara buna risase korwa ase egetunwa gia Parani;
agacha ore amo nabachenu chilifu ikomi,
ogochika kore buna chinsase chi’omorero gokabachera
korwa ase ensemo yaye y’okorio.
3Amaene, nigo anchete abanto b’ebisaku bionsi;
abachenu baye bonsi nigo bare ase oborendi bw’okoboko kwaye.
Barabwo nigo baikaraansete inse ase amagoro ’Omonene,
borokererigwe amang’ana aye.
4Musa agatoa amachiko,
ayio are omwando bw’omosangererekano bw’abanto ba Yakobo.
5Omonene akaba omoruoti o Yesuruni#33:5 Yesuruni, rora 23:15,
ekero abatang’ani b’abanto basangererekanete
amo nabanto b’ebisaku bi’Abaisraeli.”
6Musa agakwana:
“Tiga Abareuben bagenderere koba moyo, tibabaisa gokwa,
nonya abanto abwo bare abake.”
7Agakwana igoro y’Abayuda:
“Aye Omonene, igwa okorera kw’Abayuda,
obairanie naende babe amo nabanto bamwabo.
Berwanerere boka namaboko abo,
obakonye ekero ababisa babo bakobarwania.”
8Agakwana igoro y’Abalawi:
“Omonene, obamaanorere babe nobomanyi
goetera ase Tumimu na Urimu,
ekiagera barabwo nabegenwa bao bare.
Aye nkwabateemete aria Masa.
Nkwaamereranetie nabarabwo ase amache a Meriba.
9Barabwo nigo bakwanete igoro y’abaise na abang’ina,
ng’a tibabaroche,
bagatigana nabamwabo,
gose tibabarete abana babo ng’a mbare nengencho asebare,
ekiagera baigwete ring’ana riao,
bakabwata okobwatana kw’ogotianania gwakorete nabarabwo.
10Barabwo mborokererie Abayakobo emeroberio yao echikire
na Abaisraeli amachiko ao,
mbarente ubani ase obosio bwao,
naende mbasambere ebing’wanso
bi’ogosambwa ase egesasimero kiao.
11Omonene, obasesenie amo nebi bionsi babwate,
bwanche emeremo eria bagokora,
obune chibachwa chi’ababisa babo baria bagocha kobarwania,
baria babagechete,
tibabaisa gocha kobarwania naende.”
12Agakwana igoro y’Ababenjamin:
“Aba nabanchwa b’Omonene,
mbamenye inse y’oborendi bwaye bare nobotoereru,
Omonene nabagitere abaetanane botambe,
barabwo mbamenye ase amareko aye.”
13Agakwana ogoro y’Abayusufu:
“Ogosesenigwa kw’Omonene koe ase riroba riabo,
abae ebiegwa ebiya bikorwa igoro,
abae obotooru na ebinto ebiya bire ase riroba ime,
14abae amatunda amaya ay’okwama kw’omobaso,
abae okwama okonge kw’emetienyi.
15Asesenie ebigoro bia kare bitubwe nobonge bw’okwama okuya,
na ebitunwa bireo botambe, birue okwama okonge boigo.
16Abae ebinto ebiya korwa ase riroba, na ebiichire ime yayae,
amo nogwancherwa gokorwa asare ere oyobweorokereretie ase egetutu keria.
Ogosesenigwa okwo kobe igoro y’Abayusufu,
ekiagera Yusufu nigo achoretwe
akaba omogambi ase egati y’abamwabo.
17Omotangi oye nigo are nobonene bwe chinguru buna echi’eeri,
ne cingunchara chiaye nigo chire buna echi’eng’era,
ase chirochio naserie abanto goikera ase chinsinyo chionsi chi’ense.
Echio nachio chilifu ikomi chi’Abaefraimu,
naende echio nachio chilifu chinyinge chi’Abamanase.”
18Musa agakwana igoro y’Abasabuloni:
“Inwe Abasabuloni, mogoke ekero mogosoka isiko,
nainwe Abaisakaru, mogoke ase chiema chiaino ime.
19Barabwo mbarangerie abanto b’ebisaku bachiche ase egetunwa kiabo,
aroro agwo nabarue ebing’wanso ebironge,
ekiagera nigo bakonyora obotenenku bwabo korwa ase chinyancha
chinibo chibisekanete ime y’omokenye.”
20Agakwana igoro y’Abagadi:
“Omonene abakwe, oria okogareyia orogongo rw’Abagadi.
Abagadi nigo barabe bakoramama inse buna endo,
batandora okoboko amo nekeore ki’omotwe.
21Bagechorera abanyene orogongo rwarenge oruya,
ekiagera agwo nao egetari ki’omogambi kiagachetwe.
Bakaba amo nabatang’ani b’abanto,
bakaba bagokora oboronge bw’Omonene
na konacha ebina bi’ekeene ase Abaisraeli.”
22Agakwana igoro y’Abadani:
“Abadani nigo banga buna endo ensae
egocharoka korwa Basani.”
23Agakwana igoro y’Abanafutali:
“Inwe Abanafutali nigo mwanyorire ogwancherawa okonge
na ogosesenigwa kw’ogoisaneka korwa ase Omonene,
moire orogongo rore ase enyancha ensemo ya irianyi,”
24Agakwana igoro y’Abaaseri:
“Abaaseri basesenigwe kobua ebisaku binde.
Tiga barabwo banchwe nabamwabo;
amagoro abo atache riroba rikomera amazeituni.
25Emekorogoto y’ebiita biaino ebe ey’ebioma ne chitaai,
na buna amatuko aino arabe,
naboigo ne chinguru chiaino chirabe.
26“Aye Yesuruni,#33:26 Yesuruni, rora 32:15 onde tari ore buna Nyasae oo,
oria ogoeta igoro gati ase obonene bwaye
gocha kogokonya.
27Nyasae o kare na kare nere ore obotamero bwaino;
Inse aa nao amaboko aye a kare na kare are kogamba.
Naserie ababisa baino korwa asemore,
abatebie inwe: Basirie!
28Ase ayio Abaisraeli nigo baramenye batari nobwoba,
na ororeria rorwete ase Yakobo nigo roramenye ase obotoereru,
ase ense eichire endagera na edivai
ase riime rigotonya korwa igoro.
29Inwe Abaisraeli, imosesenirie!
Inwe nabanto mwatoorigwe n’Omonene.
Nere enguba yaino ekobakengera;
Nere omoro oino okobarentera obobui!
Ababisa baino mbebeke inse asemore,
nainwe motaare moete ebigoro biabo.”
Currently Selected:
OKOIRANERERA 33: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
