OKOIRANERERA 32
32
1“Inwe igoro, ntegerera moigwe, nkwane,
naye ense, igwa amang’ana akorwa ase omonwa one.
2Amorokererio aane tiga atwe buna embura,
na enkwana yane etoore buna riime ri’embura,
buna omonyirira okonyirira igoro ase obonyansi obobese,
na buna embura engiya egotwa igoro ase ebimeri ebirere.
3Inche nindarie erieta ri’Omonene.
Inwe motogie Nyasae oito!”
4“Omonene nere Egetare giaito,
emeremo yaye nemeikeranu,
ekiagera chinchera chiaye chionsi nechi’ekeene.
Nyasae nomwegenwa otari nobobe;
ere nigo are omonyene ekeene na oboronge.
5Barabwo basaririe ase Omonene,
na bono tibagenderereti korokwa abana baye;
nigo bare abanto b’obosooku,
ekegori egesareku, naende egesiru.
6Inwe abanto abariri motari nobong’aini,
Inee, eye nero enchera mogoakanera Omonene?
Inee, ere tari iso, oria obatongete,
na obakorire mwabeire ne chinguru?”
7“Inyora amatuko a kare,
rengereria igoro y’emiaka y’ebiaare biaetire.
Boria iso, nere nakworokererie amang’ana ayio,
boria abagaaka baino, nabarabwo mbakoyatebie.
8Ekero Oyore Igoro Mono aete abanto b’ebisaku emiando yabo,
na ekero aatananete mwanyabanto.
Akababekera chimbebe ase baramenye,
kobwatekana nomobaro bw’Abaisraeli,
9Omonene bwechoreire abanto baye babe egetari kiaye,
abanto ba Yakobo nabwo barurwe babe omwando oye.”
10“Omonene nigo abanyorete ase erooro etamenyiri nabanto,
eyarenge kogosa nokwoga gwe ching’iti chi’orosana,
erio akabaraa aroro, akabarenda na kobarageria,
akabarenda buna arendete endorero y’eriso riaye.
11Buna ekeongo gekorangeria amage aye na kiayorokereria koiruruka,
kiarambora chimbaba chiaye koyabogoria,
naboigo Omonene akobogoria abanto baye ase chimbaba chiaye ime.
12Omonene bweka omonyene nere obaraaete,
na enyasae engeni tiyarenge amo nere.”
13“Akabakinia na kobatiiria ase ebitunwa igoro,
akabarageria okwama kw’emegondo,
na obooke korwa ase egetare ime,
na amaguta ’amazeituni korwa ase egetare egekong’u.
14Akabaa amanooga e chiombe,
na amabeere e chimbori,
ne chinyama chinoru chie chimanwa chie ching’ondi,
na echie chimingichi,
amo ne ching’ondi ne chimbori chingiya chikorwa Basani.
Mokaria engano yarenge engiya mono,
na mokanywa edivai korwa ase amasabibu amonyinga.”
15“Korende Yesuruni#32:15 Yesuruni, engencho yaye: oyore nenkoro endonge (aiga Abaisraeli) akanora, akaenena.
Akanora na koneta, akagirigenta;
erio akaanga Nyasae oria omotongete;
agachecheria Egetare keria kiarenge ogotooreka kwaye.
16Barabwo bakagera Omonene akaba ne risemi,
ekiagera basasimete chinyasae chingeni,
bakagera akaba nendamwamu enene, ekiagera akorete okogechia.
17Bakarua ebing’wanso ase ebirecha bitari Nyasae:
bagasasima chinyasae batamanyete agwo ritang’ani,
chinyasae chinyia chiasoete nyuma,
echio chisokoro chiaino chitairogete.
18Mogatiga Egetare keria kiabaiborete,
mokeba Nyasae oria obaete obogima.”
19“Ekero Omonene aroche amang’ana ayio, akabaanga,
akaba nendamwamu ase abana baye, abamura na abaiseke.
20Akabora: Nimbise obosio bwane korwa asebare,
erio ndore omoerio obo buna ogochia koba,
ekiagera barabwo nekegori egesisekanu,
abanto batari abegenwa.
21Bagerire nabeire ne risemi ase engencho y’egetari Nyasae,
nagechigwe ase emegwekano yabo ere bosa, eyio bagosasima.
Ase ayio inche ninseegete abanto abachorochombu,
erinde babagechie
nimbatige bagechigwe ase okobarentera egesaku ekeriri.
22Endamwamu yane yokire buna omorero,
noro nosambe goika aase abakure,
nosambe ense na okwama koreo,
nosambe na amaroso ’ebitunwa.”
23“Nimbeke amabe onsiigoro asebare,
nimbarase nemegwe yane.
24Nabakwe ase engencho y’enchara ne riberera rikorura,
nabariegwe namarwaire amabe agoita.
Nimbatomere ching’iti chi’orosana chire namaino amooge
chibarwanie, ne ching’iti chingenda inse chire nobosongo, chibarome.
25Ekero abana babo bare isiko mbaitwe nemioro,
ekero bare ime ase chinyomba obwoba mbobaite;
ebio mbiite abamura, na abaiseke,
na abana bakogonka, amo nabanto abagotu.
26Ngateba: Nigo narenge gochia kobasiarera gochia aare, erio mbasirie kegima, tibabaisa koinyorwa ase egati ya mwanyabanto.
27Onye noboete ng’a ababisa babo mbabaise gochia gwetogia
na bangechie, mbabaise gochia goteba: Nintwe twababua,
gose tari Omonene okorire ayio onsi.”
28“Abaisraeli nabanto batancheti gosemigwa,
na tibari nobong’aini bonde bwonsi.
29Onye nabang’aini barenge nanga mbamanya amang’ana aya,
na korengereria igoro y’omoerio obo.
30Naki omonto oyomo arakore aserie abanto elifu eyemo,
na abanto babere baserie abanto chilifu ikomi,
onye oria ore egetare kiabo atabaoonetie na kobarua,
naende onye Omonene tabatigete?
31Egetare kiabo tikere buna Egetare giaito,
nonya nababisa baito mbamanyete amang’ana ayio.
32Emesabibu yabo nigo ekorwa ase emesabibu ya Sodomu,
na korwa ase emegondo ya Gomora;
na amasabibu abo nigo are nobosongo,
ebisago biabo nigo bire ebiroro.
33Edivai yabo nigo enga buna obosongo bwe ching’iti,
na obotindi bwabo buna obosongo obatindi bw’amarubi.”
34“Omonene nigo akoboria: Inee!
Amang’ana aya tagachiri asende?
Tabekiri ekemanyererio ase ekungo yane?
35Egesiomba nekiane, ninche ndaakane,
kegachire goika amagoro abo atererigwe,
ekiagera rituko ri’emechando yabo riaikire ang’e,
na ogosirigwa kwabo nigo kogocha bwango.
36Omonene nanachere abanto baye ekina kia boronge,
na arorere abasomba baye amabera,
ekero ararore ng’a chinguru chiabo chiaerire,
naende onde tatigareti, omosomba gose omobiare.
37Erio naborie: Ng’ai chinyasae chiabo chire?
Egetare ekio basemeretie na kogetamera, ng’ai kere?
38Chinyasae echio chiariete ebitinya bi’ebing’wanso biabo,
na konywa okoruegwa kw’ebinyugwa bi’edivai, ng’ai chire?
Tiga chichiche erio chibakonye na kobarenda.”
39“Rora bono, inche ninche bweka Nyasae,
onde tari otatiga inche bweka.
Ninche ngoita, naende nairania obogima,
ninche ngoaka, naende nagwenia.
Onde tari oranyare kwerwanerera ekonye korwa ase okoboko kwane.
40Inche ninche nkoimokia amaboko aane gochia igoro,
natiana na goteba: Buna inche inde moyo kare na kare.
41Nigo ngotieria omoro one okomesa,
na okoboko kwane kwanacha ekina.
Nindusie egesiomba igoro ase ababisa baane,
ning’akane baria bonsi bangechete.
42Nintindie emegwe yane namanyinga, omoro one oite abanto,
oigote chinyama chi’abwo baitirwe,
na amanyinga ’abooswa
na emetwe y’abatang’ani b’ababisa.”
43“Inwe abanto b’ebisaku, goka amo nabanto b’Omonene;
ekiagera orusirie egesiomba ki’amanyinga ’abasomba baye;
orusirie egesiomba igoro ase ababisa baye,
okorire okobwatania ase ense yaye na ase abanto baye.”
44Musa ekero arenge na Yoshua,
mosinto o Nuni, agacha agakwana amang’ana onsi ay’ogotera okwo, ekero abanto bategererete.
Amorokererio ay’omoerio a Musa
45Ekero Musa akoorire gokwana amang’ana ayio ase Abaisraeli bonsi, 46akabatebia, “Renda na koigwera amang’ana onsi aya nabekire abe kirori asemore ase rituko ria rero, mochike abana baino babwate na gokora amang’ana onsi ay’amachiko ayio. 47Ayio tari amang’ana a bosa asemore, naro obogima bwaino; na ase okoigwera amang’ana aya namogenderere komenya engaki entambe ase ense eyio mogochia koira ng’umbu ya Yorodan.”
48Ase rituko erio erio Omonene agatebia Musa, 49“Tiira gochia ase ebitunwa bi’Abarimu, ase egetunwa kia Nebo, kere ase ense ya Moabu, kororia Yeriko, erio origererie ense ya Kanani eyio ngochia koa Abaisraeli ebe eyabo. 50Aye nokwere ase egetunwa ekio ase ogotiira gochia, osangererekane amo nabanto bao, buna Haroni momura omino akwerete ase egetunwa kia Hori, agasangererekana amo nabanto baye, 51ekiagera timwabete abegenwa asende ase egati y’Abaisraeli agwo ase amache a Meriba‐Kadeshi, ase erooro ya Sini. Timwansigete na kworokia Abaisraeli ng’a inche nigo inde omochenu. 52Ase ayio nonyare korora ense eria ere bosio bwao, korende tokonyara kogenda aroro na gosoa ase ense eria ngochia koa Abaisraeli.”
Currently Selected:
OKOIRANERERA 32: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
