OKOIRANERERA 31
31
Yoshua okoira ribaga ria Musa
1Musa akagenderera gokwana amang’ana aya ase Abaisraeli bonsi. 2Akabatebia, “Bono inche nakoorire emiaka rigana erimo na emerongo ebere, tinkonyara kobaraa kogenderera. Boigo Omonene onkanirie ng’a tinkwamboka ngende ng’umbu ya Yorodan. 3Omonene, Nyasae oino omonyene, nabatang’ane aserie ebisaku bionsi bire ase amasio aino, erinde moire ense yabo, na Yoshua nabe omoraai oino, buna Omonene atebire. 4Omonene nakore ebisaku ebio buna akorete Sihoni na Ogi, abaruoti b’Abaamori, ekero keria abasiretie, agasaria ne chinse chiabo. 5Omonene nababeke ase amaboko aino, nainwe mobakore koreng’ana namang’ana onsi nabachikire. 6Motenene bokong’u, mobe abaremu, timobaisa kobairoka gose koboboa, ekiagera Omonene, Nyasae oino, nagende amo nainwe, takobatiga mobugwe, gose takobatuguta.”
7Erio Musa akarangeria Yoshua, agakwana nere agwo ase Abaisraeli bonsi baigwete, akamotebia, “Otenene bokong’u, obe omoremu, ekiagera naye oratang’ane abanto aba gochia ase ense eria Omonene arierete chisokoro chiabo eira ng’a nabayee. Naye orabaatananere ense eria ebe omwando obo. 8Omonene nere oragotang’ane, nabe amo naye, takogotiga obugwe, gose takogotuguta, Tobaisa koiroka gose kwoboa.”
Amachiko arabe agosomwa kera omwaka o gatano na kabere
9Musa akarika amachiko ayio, erio akayaa abakuani Abalawi barenge kobogoria Esanduku ere ne chibao chirikire okobwatana kw’ogotianania kw’Cmonene, boigo akayea abagaaka bonsi b’Abaisraeli. 10Musa akabachika akabatebia, “Ase omoerio o kera omwaka o gatano na kabere, ase engaki echikire y’omwaka bw’obosibore, ase Amatuko Amanene ay’Ebigutu, 11ekero Abaisraeli bonsi bagocha ase obosio bw’Omonene, Nyasae oino, aase agwo arachore, osome amachiko onsi, erinde Abaisraeli bonsi bayaigwe. 12Mosangererie abanto bonsi, abasacha na abakungu, na abana, na abamenyi bamenyete ase emechie yaino, erio bonsi baigwe na kweorokereria komoiroka Omonene, Nyasae oino, erinde babe abegenwa na bakore amang’ana onsi ay’amachiko aya. 13Erio abana babo konya bataramanya amachiko aya, bayaigwe na kweorokereria komoiroka Omonene, Nyasae oino, ekero morabe mogendererete komenya ase ense eria ng’umbu ya Yorodan, eyio mogochia koira ebe eyaino.”
Ogotebereria kw’omoerio kw’Omonene ase Musa
14Omonene agatebia Musa, “Naama! Amatuko ao abereire ang’e ogochia gokwa. Rangeria Yoshua, erinde mochiche agwo ase Eema y’Omosangererekano, erio imobeke ase emeremo agwenerete akore.” Musa na Yoshua bakagenda agwo ase Eema y’Omosangererekano, 15Omonene akaoroka agwo ore ime ase riire rire buna esiiro, narirorio rigatenena agwo ase egesoero ki’Eema eria.
16Erio Omonene agatebia Musa, “Rora kwabereire ang’e gochia gokwa na ogende gotimoka ase chisokoro chiao chitimogete; nyuma y’ayio abanto aba nigo baratige koba abegenwa asende, bakorere chinyasae chingeni chi’ense eria ase bakogenda komenya; barabwo mbantige, naende basarie okobwatana kw’ogotianania nakorete amo nabarabwo. 17Ase engaki eria endamwamu yane nebe enene igoro asebare, inche imbatige na imbise obosio bwane, tibandora, barabwo mbasirigwe. Amabe amange na emechando emenge nabichiche igoro asebare, erio baborie ase rituko erio: Inee! Amabe aya onsi tari igo achire igoro asetore, ekiagera Nyasae oito atari ase egati yaito? 18Ase rituko riria ekeene nimbise obosio bwane korwa asebare, ekiagera bakorire amabe baonchokeire chinyasae ching’ao.
19“Bono rika ogotera oko, oborokererie Abaisraeli, bamanye kogotera, erinde korokwo kobe kirori one ase Abaisraeli. 20Nimbaire ase ense eyio entenenku ere namabeere na amooke, eyio narierete chisokoro chiabo eira ng’a nimbayee. Aroro agwo mbanyore ebinto ebinge barie, baisaneke na konora, korende nigo baraonchokere chinyasae ching’ao na gochikorera, erio banchaye na gosaria okobwatana kwane kw’ogotianania. 21Ekero amabe amange na emechando birabe bikobachera, ogotera oko nakoborokererie na kobe kirori asebare, ekiagera tigokwebwa nonya nase chinderia chiabo. Nimanyete ebirengererio bare nabio bono, ritang’ani konya ntarabarenta ase ense eyio nariete eira ng’a nimbayee.”
22Ase rituko erio Musa akarika ogotera koria akorokereria Abaisraeli.
23Erio Omonene akamwatanana Yoshua, mosinto o Nuni, akamotebia, “Otenene bokong’u, obe noboremu, ekiagera naye orabaire Abaisraeli ase ense eria nabarierete eira ng’a nimbayee. Inche nimbe amo naye.”
24Musa akarika amang’ana onsi ay’amachiko ayio ime ase ebuku. 25Erio agachika Abalawi baria barenge kobogoria Esanduku eria y’Omonene, eyere ne chibao chirikire okobwatana kw’ogotianania, agateba, 26“Ira ebuku eye y’amachiko, moyebeke ensemo y’Esanduku eria ere nokobwatana kw’ogotianania kw’Omonene Nyasae oino, erio ebeereo ase okoba kirori asemore. 27Inche nimanyete ng’a timori abaigweri, korende nigo more abanyabigoti bikong’u. Rora bono, ekero inde moyo amo nainwe, mwasaririe ase Omonene, Inee, ekero ndabe nakure timogosaria mono kobua? 28Sangereria abagaaka bonsi b’ebisaku biaino, na abanene bonsi, obarente asende, erinde imbatebie amang’ana aya; inche nindangerie igoro na ense chibe birori asebare. 29Namanyire ng’a nyuma inche konakure, ekeene inwe nigo morakore amabe, naende nigo moraonchoke na gotiga enchera eye nabachikire. Ase ayio, ase amatuko agocha obobe nabobanyore, ekiagera nigo mogochia gokora amabe ase obosio bw’Omonene, erio momogechie abe nendamwamu goetera ase emeremo ende yonsi morabe mogokora.”
Ogotera kwa Musa
30Erio Musa agakwana amang’ana onsi ay’ogotera oko ekero omosangererekano bwonsi bw’Abaisraeli bategererete.
Currently Selected:
OKOIRANERERA 31: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
