OKOIRANERERA 30
30
Ayakorenta ogosesenigwa
1“Ekero ogosesenigwa na okoragererigwa, ayio naborokereirie arabe akobanyora ekero mogendererete komenya ase egati y’ebisaku bionsi ebio ase Omonene, Nyasae oino, arabaserie gochia, monyare koinyora amang’ana aane. 2Inwe amo nabana baino komoramoiranere Omonene, Nyasae oino, na koigwera amang’ana aye ase chinkoro chiaino chionsi, na ase emioyo yaino yonsi, amang’ana ayio nabachikire rituko ria rero, 3rirorio Omonene, Nyasae oino, nabarorere amabera na kobasesenia, naende abairanie korwa ase ebisaku bionsi ebio ase abasiarerete gochia. 4Nonya mwasiareretwe gochia ase chinsinyo chi’ense, Omonene, Nyasae oino, nabasangererie korwao, 5na kobairania gochia ase ense eria chisokoro chiaino chiairete ekaba eyabo, erio nainwe moyeire ebe eyaino. Ere nabakorere amaya, naende ababuchie mobe abange goetania chisokoro chiaino. 6Omonene, Nyasae oino, narokie chinkoro chiaino, ne chinkoro chi’ororeria rwaino, nabae inwe ne chinderia chiaino chinkoro chi’okoigwera; erio nario moramwanche ne chinkoro chiaino chionsi, na emioyo yaino yonsi, mogenderere koba moyo. 7Omonene Nyasae oino nabeke okoragereria okwo gwonsi igoro y’ababisa baino, na igoro ya baria babagechete na kobachanda. 8Nainwe moigwere Omonene naende, na kobwata amachiko aye onsi aya nkobatebia rituko ria rero. 9Omonene, Nyasae oino, nabasesenie mono ase emeremo yaino yonsi mogokora namaboko aino, nasesenie oboiboro rwaino romentekane, namente ne chiombe chiaino na okwama kwaino kwe riroba. Na buna Omonene agogete ase ogosesenia chisokoro chiaino, naboigo aragoke ase okobasesenia inwe, 10komoraigwere Omonene, Nyasae oino, na mobwate amachiko aye onsi na emeroberio echikire, aya arikire ase ebuku eye y’amachiko, naende komoramoonchokere ne chinkoro chiaino chionsi, na emioyo yaino yonsi.
11“Ogochika okwo nabaeire rituko ria rero tikori ogokong’u mono asemore, gose tikori aare korwa asemore. 12Tigokari aaria igoro, erinde moborie: Ning’o oranyare koriina gochia aaria igoro agotorentere korwa aroro, erinde tokoigwe na kogokora? 13Gose tigokari ng’umbu y’enyancha, erinde moborie: Ning’o oranyare kwamboka gochia ng’umbu y’enyancha agotorentere, erinde tokoigwe na togokore? 14Taibo! Ring’ana riria nigo rire ang’e nainwe ase emenwa yaino, na ase chinkoro chiaino, erinde monyare korikora.
15“Rora, rituko ria rero nabekire ase amasio aino obogima na ayare amaya, amakweri na ayare amabe. 16Komoraigwere amachiko ’Omonene, Nyasae oino, aya inche nkobaa ase rituko ria rero, ase okomwancha na gotaara ase chinchera chiaye na kobwata amachiko aye, na emeroberio yaye echikire, erio inwe namobe moyo na komentekana, nere nabasesenie ase ense eyio mogochia gosoa na koira ebe eyaino. 17Korende mogochia koonchoka ase chinkoro chiaino na komotiga timomoigwera, korende mong’uswe moonchoke gosasima chinyasae ching’ao na gochikorera, 18nabaorokeirie ase rituko ria rero ng’a goika mosire. Timogochia komenya engaki entambe ase ense eria ere ng’umbu ya Yorodan, eria mogochia koira ebe eyaino. 19Rituko ria rero narangeirie igoro na ense chibe birori asemore ng’a inche nabekire ase amasio aino obogima na amakweri, ogosesenigwa na okoragererigwa. Ase ayio, chora obogima, erinde inwe amo ne chinderia chiaino monyare kogenderera koba moyo. 20Mwanche Omonene, Nyasae oino, momoigwere na mobe abegenwa asare. Ekero morakore ayio, rirorio namogenderere koba moyo na komenya ase ense eyio Omonene arierete chisokoro chiaino Ibrahimu, na Isaka, na Yakobo eira ng’a nabayee.”
Currently Selected:
OKOIRANERERA 30: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
