OKOIRANERERA 29
29
Okobwatana oko Omonene akorete n’Abaisraeli ase ense ya Moabu
1Aya naro amang’ana ’okobwatana kw’ogotianania Omonene achigete Musa akore n’Abaisraeli agwo ase ense ya Moabu. Okobwatana okwo nigo kwamentetwe ase koria Omonene konya akorire amo nabarabwo aria Horebu.
2Musa agasangereria Abaisraeli bonsi amo, akabatebia, “Mwaroche namaiso aino amang’ana aya Omonene akorete ase ense ya Misiri, na buna akorete Farao amo nabanene b’ense yaye, na ense yaye yonsi. 3Boigo mwaroche namaiso aino amaakwa aria amanene, na ebikone, na amakumia amanene; 4korende goika rituko ria rero Omonene taraigora ebirengererio biaino, erinde monyare komanya buya; gose tarabaa amaiso akorora buya, gose amato akoigwa buya 5Ase engaki yonsi y’emiaka emerongo ene Omonene abete okobaraa ase erooro. Chianga chiaino tichiabagoterete, gose ebikoroto biaino tibiabagoterete. 6Timwabete mokoria omogati, gose konywa edivai, gose ekenyugwa kende gionsi kegotindia, erio nario moranyare komanya ng’a ere nere Omonene, Nyasae oino. 7Ekero twachete aase aa, Sihoni omoruoti o Hesiboni, na Ogi, omoruoti o Basani, bagacha gotorwania esegi, korende tokababua. 8Tokaira ense yabo, tokayea abanto b’egesaku kia Reuben, na ab’ekia Gadi, na ekeng’ese ki’egesaku kia Manase, na eyio ekaba omwando obo. 9Ase ayio moigwere, mokore amang’ana onsi ay’okobwatana okwo kw’ogotianania erio nario morasesenigwe ase emeremo yonsi morabe mogokora.
10“Rituko ria rero inwe mwensi igo moteneine aiga ase obosio bw’Omonene, Nyasae oino; inwe abatang’ani b’ebisaku, na abagaaka, na abateneneri, inwe kera oyomo bw’Abaisraeli, 11na abana baino, na abakungu baino, na abamenyi bamenyete amo nainwe ase ebitwori biaino, na abanto bonsi abwo bakobaateria chinko amo nabwo bakobarentera amache. 12Na bono monyare gosoa ase okobwatana kw’ogotianania okwo Omonene, Nyasae oino, agokora amo nainwe rituko ria rero, 13erinde ase rituko ria rero, Omonene anyare kobakora mobe abanto baye b’ekeene, ere nabe Nyasae oino, buna abatebetie na buna arierete chisokoro chiaino Ibrahimu, na Isaka, na Yakobo, eira ase ogotiana. 14Gose tari nainwe mweka ngokora okobwatana okwo kw’ogotianania, 15korende nigo nkogokora nainwe abamoteneine aiga rero amo naintwe ase obosio bw’Omonene, Nyasae oito, naende amo nabwo batateneini amo naintwe aiga rero.
16“Inwe abanyene momanyete buna obogima bwaito bwarenge ekero twamenyete ase ense ya Misiri, naende buna twarweteo na goeta egati‐gati y’ebisaku ebio ase twaetete. 17Mwaroche ebinto babwate bi’okogechia, emegwekano yabo baare gosasima, yaroisirie korwa ase emete, na amagena, ne chifeta, ne chitahabu, eyio yarenge ase egati yabo. 18Mwerende, tabaisa koba ase egati yaino omonto omosacha gose omokungu, gose eamate, gose egesaku, oraonchoke ase rituko ria rero, atige Omonene, Nyasae oito, na gosasima chinyasae chi’abanto b’ebisaku ebio. Toba ase egati yaino omori okomera ekemeri kere nobosongo gekwama okwama okororo. 19Omonto aise koba aiga, oyo oigwete amang’ana’okobwatana okwo kw’ogotianania naende eremie abe nobomaene ime ase enkoro yaye, erio akwane: Nabo erabe buya asende nonya nkogenderera koba omotaigweri, oyio nigo arabasirie mwensi, abamogotinda na abamore nerang’o. 20Omonene takonyara kwabera omonto onga buna oyio, korende endamwamu yaye, ne risemi mbibe igoro y’omonto oyio, na okoragereria okwo gwonsi korikire ase ebuku eye nigo korabeere asare, na Omonene natinyie erieta ri’omonto oyio rirue inse y’erioba, tainyorwa. 21Omonene namokore abe ekiorokererio ase amasio ’abanto b’ebisaku bionsi bi’Abaisraeli, na amorentere amaakwa onsi koreng’ana nokoragereria gw’okobwatana kw’ogotianania oko korikire ase ebuku eye y’amachiko.
22“Ase ebiaare bigochi‐gocha, ne chinderia chiaino, na abamenyi barache korwa ase chinse chi’aare, mbarore emechando y’ense eria, na amarwaire Omonene ayetomeire. 23Ense yonsi inayome pa ebe buna amagena ’omorero akonyititoka, na omonyo, ebe bosa etari kwama, nonya nobonyansi tibokomerao, esirigwe buna emechie ya Sodomu, na Gomora, na Adima, na Seboimu, eria Omonene asiretie ekero abete nendamwamu na okogechigwa. 24Ee, ebisaku bionsi mbiborie: Ninki kiagerete Omonene akorete ense eye ekaba iga? Naki endamwamu yaye yokire iga? 25Erio abanto mbairanerie, batebe: Ayio igo akoregete, ekiagera abanto batigete okobwatana kw’ogotianania kw’Omonene, Nyasae bwe chisokoro chiabo, okwo akorete amo nabarabwo, ekero abarusetie korwa ase ense ya Misiri. 26Barabwo nigo barenge gokorera chinyasae ching’ao na gochisasima, chinyasae barabwo batamanyete agwo ritang’ani, echio Omonene atabaete. 27Ase ayio endamwamu y’Omonene ekaba enene ase ense eye, ere akarenta okoragereria gwonsi okwo korikire ase ebuku eye. 28Ase endamwamu yaye enene, na obotindi, ne risemi rinene, Omonene akabaseria korwa ase ense yabo, akabasiarera gochia ase ense eng’ao; nao bare goika rero iga.
29“Amang’ana a bobisi nigo are ase Omonene, Nyasae oito, korende ayio amaanoirwe nigo are asetore na ase abana baito kogenderera botambe, naintwe goika tokore amang’ana onsi arikire ase amachiko aya.
Currently Selected:
OKOIRANERERA 29: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
