OKOIRANERERA 28
28
Ogosesenigwa kw’abaigweri
(Abal 26:3–13; Okoir 7:12–24)
1“Komoramoigwere Omonene, Nyasae oino, erinde morende na kobwata amachiko aye onsi inche nabachikire ase rituko ria rero, Omonene, Nyasae oino, nabakore mobe abanene kobua ebisaku bionsi bire ase ense. 2Komoraigwere eriogi ri’ Omonene, Nyasae oino, rirorio nabae ogosesenigwa oko gwonsi kobe okwaino:
3“Imosesenigwe ase emechie yaino na ase emegondo yaino.
4“Ndosesenigwe oroiboro rwe chinda chiaino, amo nokwama kwaino kwe riroba, na okobiara gwe chitugo chiaino nachio chiombe, ne ching’ondi, ne chimbori.
5“Nesesenigwe endagera y’ebitonga biaino amo ney’ebituba biaino mogo konyera obosie.
6“Imosesenigwe ekero mogosoa inka, na ekero mokogenda isiko.
7“Omonene natige ababisa baino, baria bagocha kobarwania, babugwe ase amasio aino. Barabwo mbabachere baetere ase enchera eyemo ekero bagocha kobarwania, korende mbatame korwa asemore baetere chinchera isano na ibere.
8“Omonene nachike ogosesenia kwaye gocha asemore, ase ebiage biaino, na ase emeremo yonsi mogokora; nabasesenie ase ense eyio Omonene, Nyasae oino, agochia kobaa ebe eyaino.
9“Kamorarende na kobwata amachiko ’Omonene, Nyasae oino, na gotaara ase chinchera chiaye, nabaimokererie igoro mobe abanto abachenu asare, buna abariereire eira na gotiana. 10Abanto bonsi b’ense mbabarore mogwatorwa ase erieta riaye, erio babairoke. 11Omonene nabae obotenenku, nabuchie oroiboro rwe chinda chiaino, nabuchie ne chitugo chiaino, naende nabae okwama okonge kwe riroba agwo ase ense eria arierete chisokoro chiaino eira ng’a nabayee inwe. 12Nabakunorere emonga yaye engiya ere igoro, na abatwerie embura ase ense yaino ase chingaki chiganeirie. Nasesenie emeremo yaino yonsi mogokora, erinde monyare koa abanto b’ebisaku ebinge ebinto singo. Korende inwe timokoremerwa, erinde mochie gosaba singo. 13Komoraigwere amachiko ’Omonene, Nyasae oino, ayio nkobaa rituko ria rero, na mobe abegenwa ase okoyakora, nabakore mobe ab’omotwe, gose tari ab’ekemincha. Nabakore mogenderere gokina, gose timokogenderera gokeeigwa gochia inse. 14Ayio nigo arakoreke onye timokoonchoka aande, gochia ensemo y’okorio gose ey’okobee, timotiga nonya ne ring’ana erimo ri’ayio nabaeire ase rituko ria rero, erinde mogende gosasima chinyasae ching’ao na gochikorera.
Ekerabanyore abatari koigwera
(Abal 26:14–46)
15“Korende onye timokoigwera Omonene, Nyasae oino, gose onye timokoba abegenwa na gokora amachiko aye onsi, na emeroberio yaye echikire, ayio inche nabaeire ase rituko ria rero, rirorio okoragererigwa oko gwonsi nagoche asemore na kobanyore:
16“Imoragererigwe ase emechie yaino, na ase emegondo yaino.
17“Neragererigwe endagera y’ebitonga biaino amo nebituba biaino mogokonyera obosie.
18“Ndoragererigwe oroiboro rwe chinda chiaino amo nokwama kwaino kwe riroba, na okobiara gwe chiombe chiaino, na ogwe ching’ondi ne chimbori chiaino.
19“Imoragererigwe ekero mogosoa inka, na ekero mokogenda isiko.
20“Omonene nabarentere okoragererigwa, na obotantanu, na emechando ase emeremo yaino yonsi mogokora, goika mosirigwe na koera bwango ase engencho y’ogokora kwaino okobe, na ekiagera mwantigire inche. 21Nabarentere amarwaire agoita akobabwatia, na inwe mosire korwa ase ense eria mogochia gosoa na koyeira ebe eyaino. 22Nabaake noborwaire borakoore obogima, na obw’esosera, na obw’okobimbia omobere; narente riberera ri’egurugura entindi, na oborwaire bw’enyagetabo ase chindagera, na obw’okorigisia chindagera chiaino. Amaakwa ayio nababwatie goika abasirie kegima. 23Igoro nekong’e pa, ebe buna etaai, embura tetwa, riroba ri’ense riome rikong’e pa, ribe buna ekioma. 24Ribaga ri’embura egotwa ase riroba riaino, Omonene narente ebuse na omokenye bibatwere korwa igoro na kobasiria kegima.
25“Omonene nae ababisa baino ribaga bababue. Namoetere enchera eyemo ekero mokogenda kobarwania, korende motame korwa asebare, moetere chinchera isano na ibere. Amagambi onsi are ase ense nakumie na kwoboa ase amang’ana arabanyore inwe. 26Emebere yaino ekw ete nebe endagera ye chinyoni chia igoro, na eye ching’iti chi’orosana, na onde tari orachiserie achioboyie. 27Omonene nabarentere inwe amagumba buna aria arenterete Abamisiri, nabarentere namasisa, na okweagia, amarwaire ayio atanyare kogwenigwa. 28Nabakore mobe chibarimo, na emeuko, na omwochogano bw’ebirengererio. 29Ekero kia mobaso inamotaba‐tabe buna emeuko egotabataba ase omosunte, timokonyara korora enchera. Timogosesenigwa ase emeremo ende yonsi morabe mogokora. Namobe mogochandwa na kourwa ebinto biaino botambe, na onde tari orabakonye.
30“Nebe kwariereire omoiseke boko, na omonto omoao amoire arare nere: noagache enyomba, korende tokoyemenya. Nosimeke emesabibu ase omogondo oo, korende tokoria amasabibu korwao. 31Chiombe chiaino nachinyenyerwe ase amaiso aino, korende timokoria chinyama chiabo. Namourwe chitigere chiaino ne chinguru ekero morigereretie, na tichikoiranigwa asemore naende. Ababisa baino mbaegwe ching’ondi chiaino, na onde tari orabakonye inwe. 32Abana baino, abamura na abaiseke, inabairwe nabanto b’egesaku ekeao ekero morigereretie, erio mobe mochandegete, ne rituko ase rituko mobe namaiga ase abana baino, korende timokonyara gotanga tibairwa. 33Abanto b’egesaku motamanyeti nabarie okwama kwe riroba riaino, na baire ebinto mwabeire mogochandekera; barabwo mbabakorere bobe, babachande botambe. 34Komorarore aya onsi, nigo morasareke ase ebirengererio biaino, mobe buna chiosi. 35Omonene nabaake moriegwe namagumba amabe ase amaru aino na ase amagoro aino, ee amagumba ayio natuboke korwa chimbaratero chiaino goika emetwe yaino igoro, nainwe timokogwena.
36“Omonene nabaire inwe amo nomoruoti oyio oino morechorere, ababeke inse y’egesaku kende ekeao, eke inwe motamanyete, gose chisokoro chiaino. Aroro agwo inamokorere chinyasae ching’ao chiroisirie korwa ase emete na amagena. 37Ase egati y’abanto b’ense eyio ase Omonene arabasiarere gochia, inwe mobe ab’ogoichanerwa, mobe omorabaaro na gokwanwa bobe nabanto abwo.
38“Namosimeke chimbusuro chinyinge ase emegondo, korende mogese endagera ensinini, ekiagera chingige nachirie chindagera chiaino. 39Inamosimeke emesabibu ase emegondo na gokora emeremo aroro, korende timokonywa edivai, gose koria amasabibu korwao, ekiagera amakonde nigo arasoe arie yonsi. 40Inamosimeke emezeituni ase orogongo rwaino rwonsi, korende timokweaka amaguta aye, ekiagera amazeituni nigo araaroroke atarama. 41Nigo moraibore abana, abamura na abaiseke, korende tibakoba abaino, mbooswe bairwe ase obosomba. 42Chingige nchirie emete yaino morasimeke, na okwama kwaino kwe riroba.
43“Abamenyi bamenyete ase egati yaino mbabe abanene kobabua, korende inwe mogenderere gokea mobe inse asebare. 44Barabwo mbabe nebinto ebinge barabae inwe singo, korende inwe nigo moraremerwe, timokoba nebinto morabae singo. Barabwo mbabe ab’omotwe, na inwe mobe ab’ekemincha.
45“Okoragererigwa okwo gwonsi nagoche asemore na kobabwatia goika kobasirie kegima, ekiagera motaigwerete Omonene, Nyasae oino, na kobwata amachiko aye, na emeroberio yaye echikire, ayio abaete. 46Okwo nigo korabe ekemanyererio na ogokumia igoro asemore, na ase chinderia chiaino kogenderera botambe. 47Omonene, Nyasae oino, nigo abasesenetie, akabaa ebinto ebinge, na ebinto ebio bikagera timwamokorera nomogoko bwe chinkoro chiaino. 48Ase ayio namobakorere ababisa baino, abwo Omonene aratome gocha kobarwania; inamobe nenchara, na erang’o y’amache, namobe gesobono, naende namoremerwe ebinto bionsi. Nabeke rikorogoto ri’ekioma igoro ase ebigoti biaino goika abasirie kegima. 49Omonene narente egesaku ekeao geche kobarwania korwa aare, korwa ensinyo y’ense, ekere ekiango gekoiruruka buna ekeongo, ekio motamanyete omonwa obo. 50Abanto b’egesaku eke babwate amasio obotindi; babe batari koraara omonto omogotu gose kororera abanto abake amabera. 51Barabwo mbarie chimori chie chiombe chiaino, na okwama kwe riroba riaino, goika mosirigwe kegima. Tibakobatigareria endagera yaino, gose edivai, gose amaguta, gose chimori chie chiombe chiaino, gose chimanwa chie ching’ondi na echie chimbori chiaino; nabagere mosire kegima. 52Barabwo nigo barabamige mono ase emechie yaino yonsi, babarwanie goika chindwaki chiaino chintambe, echio morabe mosemeretie, chigwe inse agwo ase ense yaino yonsi; ee, mbabamige ase emechie yaino yonsi ase ense eria Omonene, Nyasae oino, abaeire.
53“Ekero ababisa baino barabamige na kobasiongorokana, nigo morabe nemechando emenene, goika morie emebere y’abana baino, baria Omonene, Nyasae oino, abaeire. 54Omonto ore omwororo mono, naende ore bw’enyomba y’amasikani ase egati yaino nabe ne ribero rinene ri’endagera, arine momura omwabo, na mokaye oria anchete, na abana baye batigarete bare moyo. 55Takobaa enyama y’emebere y’abanto baye eyio akoria ere omonyene, ekiagera tabwati kende kiamotigareire. Emechando buna eyio nero ababisa baino barabarentere ekero barasiongorokane emechie yaino yonsi. 56Omokungu ore omwereria mono naende ore bw’enyomba y’amasikani ase egati yaino, oria otarenge konyara gotacha inse namagoro aye agende aande, ekiagera igo are omwereria narorere omosacha oye anchete mono ribero, narorere nabana baye, abamura na abaiseke, ribero boigo. 57Ekero akoibora nigo arabarine nonya nomogoye okorwa ase enda yaye, na abana akoibora. Ere omonyene nayorie bobisi, ekiagera oborirwe ebinto akoria. Emechando eyio nero ababisa baino barabarentere ekero barasiongorokane emechie yaino yonsi.
58“Onye timokoba abegenwa na gokora amang’ana aya onsi ay’ogochika oko, ayio arikire ase ebuku eye, erinde moiroke erieta eri ri’obonene na erigwenerete koirokwa: Omonene, Nyasae oino, 59rirorio Omonene narente asemore, na igoro ase abana baino, amaakwa are amanene na amatindi aragenderere ase engaki entambe. 60Naende abarentere amarwaire onsi buna aria arenterete Abamisiri, ayio moirogete, naro nagenderere kobeera asemore. 61Omonene nabarentere amarwaire ao ao, na emechando eyio etarikiri ase ebuku eye y’amachiko, goika inwe mosirigwe kegima. 62Nonya more abange buna ching’enang’eni chia igoro, namosirigwe motigare more abake mono, ekiagera motaigwerete Omonene, Nyasae oino. 63Nigo erabe ng’a buna Omonene agogetigwe ase okobakorera amaya, akagera mokamentekana ase enchera buna eyio, naboigo agochia kogokigwa ase okorenta ogosirigwa asemore na kobaseria kegima, nainwe morusigweo, moere kegima korwa ase ense eria mogochia koira ebe eyaino.
64“Omonene nabasiarere gochia ase egati y’ebisaku ebinge, korwa ensinyo eyemo y’ense goika eyende. Agwo namokorere chinyasae ching’ao chiroisirie korwa ase emete na amagena, echio inwe motamanyete, nonya ne chisokoro chiaino.
65“Ekero morabe more ase egati y’ebisaku ebio timokonyora obotoereru, gose amagoro aino takonyora aase agotimokera; korende aroro agwo Omonene nabae chinkoro chi’obwoba, na amasio agosunkera naende mobe nobogima bochandegete bw’okwerusia moyo. 66Omobaso na obotuko namobe nobwoba, na obogima bwaino nabobe ase emechando; inwe timogosemeria okoba kw’obogima bwaino ng’a mbogenderere. 67Ase engencho y’omoondoko bwe chinkoro chirabe nobwoba, na ase amakumia ay’okoirokia, na ase aya morarore namaiso aino, nigo mora tebe ase engaki ya mambia: Naki yare koba buya onye yaba mogoroba, na ase engaki ya mogoroba motebe: Naki yare koba buya onye yaba mambia. 68Omonene nabatige moriine chimeeri moirane gochia Misiri, orogendo orwo inche nabatebetie ng’a timokorogenda naende. Ekero morabe mwaikireo, ase okoremerwa kwaino namwerue inwe abanyene, morigie kweoonia ase ababisa baino mobe abasomba babo, abasacha na abakungu, korende ekero morabe mokwerwa igo, omonto tagotoka orabagore.”
Currently Selected:
OKOIRANERERA 28: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
