OKOIRANERERA 27
27
Amachiko a Nyasae arikire ase chibao chi’amagena
1Musa, ekero arenge nabagaaka b’Abaisraeli, agachika abanto akabatebia, “Mobwate amachiko onsi aya nabachikire rituko ria rero. 2Ase rituko riria moramboke gochia ng’umbu ya Yorodan, na ekero moraike ase ense eria. Omonene, Nyasae oino, agochia kobaa, motenenie amagena amanene, moyaoomeranie. 3Erio morike ase amagena ayio amang’ana onsi ay’ogochika oko. Ekero morabe mwambokire gochia ng’umbu na gosoa ense eria Omonene, Nyasae oino, agochia kobaa, ense eria entenenku ere namabeere na amooke, buna Omonene, Nyasae bwe chisokoro chiaino, abarierete eira ng’a nabayee, 4na komwaikire aroro ng’umbu, motenenie amagena aria ase egetunwa ki’Ebali, buna nabachikire rituko ria rero, erio moyaoomeranie. 5Aroro agwo moaagachere Omonene, Nyasae oino, egesasimero ki’amagena. Timobaisa gokorera emeremo na gekorero kende gionsi gi’ekioma. 6Egesasimero keria ki’Omonene, Nyasae oino, mokeagachere amagena atabaachiri; na igoro yaye momoruere ebing’wanso bi’ogosambwa, 7morue na ebing’wanso bi’omorembe, mobiriereo na mogoke ase obosio bw’Omonene, Nyasae oino. 8Ase amagena ayio morike amang’ana onsi ay’ogochika oko, arorekane buya kegima.”
9Musa na abakuani Abalawi bagakwana n’Abaisraeli bonsi, bakabatebia, “Inwe Abaisraeli, tegerera, moigwe! Rituko ria rero inwe mwabeire abanto b’Omonene, Nyasae oino. 10Ase ayio moigwere Omonene, Nyasae oino, mobwate amachiko aye, na emeroberio yaye echikire, ayio inche nkobaa rituko ria rero.”
Okoragererigwa kw’abatakoigwera
11Musa agachika abanto ase rituko erio erio, agakwana, 12“Ekero morabe mwambokire gochia ng’umbu ya Yorodan, Abasimeoni, na Abalawi, na Abayuda, na Abaisakaru, na Abayusufu, na Ababenjamin, batenene igoro ase egetunwa kia Gerisimu, basesenie abanto. 13Na Abareuben na Abagadi, na Abaaseri, na Abasabuloni, na Abadani, na Abanafutali batenene igoro ase egetunwa ki’Ebali baragererie abanto. 14Na Abalawi bakwane amang’ana aya neriogi rinene, erinde Abaisraeli bonsi bayaigwe:
15“Aragererigwe omonto oyoraroisie omogwekano bw’ogosasimwa, koyotenenia na koyosasima bobisi, korabe omogwekano obaachire, gose oyo bw’ebioma binyititoire na kobombwa, eyere emeremo y’omoroisia omong’aini. Okwo nokogechia ase Omonene.
“Abanto bonsi bairanerie, batebe: Amina.
16Aragererigwe omonto ogochaya ise gose ng’ina.
Abanto bonsi bairanerie, batebe: Amina.
17Aragererigwe omonto ogotumana orobebe rw’omogisangio oye.
Abanto bonsi bairanerie, batebe: Amina.
18“Aragererigwe omonto ogotantania omonto omouko na komosiria enchera.
“Abanto bonsi bairanerie, batebe:” “Amina.”
19“Aragererigwe omonto okorina omomenyi, gose entakana, gose omoboraka, oboronge bwaye.
Abanto bonsi bairanerie, batebe: Amina.
20Aragererigwe omonto orarare na moga ise, ekiagera ayio nokorentera ise obosooku.
Abanto bonsi bairanerie, batebe: Amina.
21Aragererigwe omonto orarare neng’iti ende yonsi.
Abanto bonsi bairanerie, batebe: Amina.
22Aragererigwe omonto orarare nomoiseke omwabo, omoiseke o ise, gose oyo o ng’ina.
Abanto bonsi bairanerie, batebe: Amina.
23Aragererigwe omonto orarare na ng’ina biara.
Abanto bonsi bairanerie, batebe: Amina.
24Aragererigwe omonto oraite omonto onde bobisi.
Abanto bonsi bairanerie, batebe: Amina.
25Aragererigwe omonto oraegwe riaaki, erinde agende goita omonto otari na komocha.
Abanto bonsi bairanerie, batebe: Amina.”
26“Aragererigwe omonto otari kobwata amang’ana onsi ay’ogochika oko, na koyakora.”
“Abanto bonsi bairanerie, batebe:” “Amina.”
Currently Selected:
OKOIRANERERA 27: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
