OKOIRANERERA 26
26
Okoruegwa kw’endagera egotongorwa
1“Ekero morabe mwaikire ase ense eria Omonene, Nyasae oino, agochia kobaa ebe omwando oino, na komenyao, 2kera oyomo oino, arusie ogotongora gw’okwama kw’endagera aragese korwa ase omogondo bw’ense eria. Erio ayebeke ase egetonga ime, ayeire goika aase aria Omonene, Nyasae oino, arachore abe obomenyo bw’erieta riaye. 3Agende ase omokuani oyo otenenerete ase engaki eyio, amotebie: Ase rituko ria rero naorokirie ase Omonene, Nyasae oito, ng’a naikire ase ense eye Omonene arierete chisokoro chiaito eira ng’a natoyee.
4“Erio omokuani arusie egetonga keria korwa ase okoboko kwao akebeke bosio bw’egesasimero ki’Omonene, Nyasae oino. 5Oiranerie amang’ana aya okwane ase obosio bw’Omonene, Nyasae oo: Sokororia yane nigo arenge Omoaramu, orenge okona‐koong’anyang’anya. Agatirimboka gochia Misiri, akaba omomenyi aroro amo nabanto baye. Ekero agendete ase ense eria nigo abwate abanto abake, na aroro agwo bakabucha, bakaba egesaku ekenene, kiarenge nechinguru, naende kiarenge nabanto abange. 6Abamisiri bagatokora bobe, bakaba bagotochanda na gotokoria emeremo emekong’u. 7Erio tokarera ase Omonene, Nyasae bwe chisokoro chiaito, atokonye, nere agatoigwa, akarora emechando yaito, na emeremo emekong’u twarenge gokora, na ogokorerwa bobe gwaito. 8Omonene agatorusia ase ense ya Misiri nokoboko kwaye kore nechinguru koramboire, na ase okoondokia okonene na ebikone na amakumia. 9Agatorenta ase ense eye entenenku ere namabeere na amooke, agatoyea. 10Bono rora, narentire ogotongora gwe chindagera chiamire ase riroba ri’ense eye Omonene atoeire.
“Erio obeke egetonga keria inse ase obosio bw’Omonene, Nyasae oo, na osasime agwo ase obosio bwaye. 11Ogokere ebinto bionsi ebio Omonene, Nyasae oo, akoeire, aye amo neamate yao; boigo Abalawi, na abamenyi bamenyete ase egati yaino bagoke amo naye.
12“Ase omwaka o gatato orue ensemo ya ikomi y’okwama kwao gwe chindagera ase Abalawi, na abamenyi, ne chintakana, na ababoraka, erinde barabwo banyore chindagera chibaisaine barariere agwo ase emechie yaino. 13Erio okwane amang’ana aya ase obosio bw’Omonene, Nyasae oo, omotebie: Narusirie korwa ase enyomba yane ebinto biatananetwe bibe ebichenu, nabieire Abalawi, na abamenyi, ne chintakana, na ababoraka. Nakorire buna gwanchigete. Tinsareti gose tinyebeti ogochika konde kwao. 14Tinariete ensemo eria ya ikomi ase omoichano, gose tinarusetie korwa ase ensemo eria ekero narenge ntachenegeti gose tinaruete ensemo ende yonsi ya ikomi ase engencho y’abakure. Nabeire ngokoigwera aye Omonene, Nyasae one; nakorire amang’ana aria onsi gwanchigete. 15Korwa agwo igoro, ase Obomenyo bwao Obochenu bore, origererie, erinde otorore inse aa; osesenie abanto bao Abaisraeli, osesenie na ense eye gwatoeire buna kwarierete chisokoro chiaito eira, ense entenenku ere namabeere na amooke.
Abanto b’Omonene omonyene
16“Rituko ria rero Omonene, Nyasae oo, ogochikire oigwere na kobwata amachiko aya na emeroberio echikire. Ase ayio oyarende mono na koyakora nenkoro yao yonsi, na omoyo oo bwonsi. 17Rituko ria rero kwaorokirie ng’a Omonene nere Nyasae oo, naende ng’a nobwatie chinchera chiaye chionsi na kobwata emeroberio yaye echikire, na amachiko aye, na aya onsi achikire, naende ng’a nomoigwere. 18Omonene nere okwanire rituko ria rero ng’a inwe nabanto baye omonyene b’ekeene, buna abarierete eira, naende obachikire ng’a morende na kobwata amachiko aye onsi. 19Nabakore mobe abanene igoro ase ebisaku bionsi biria atongete; nabakore momanyekane ase ogotogigwa okuya na ogosikwa, nainwe namobe abanto bare abachenu ase Omonene, Nyasae oino, buna atebire.”
Currently Selected:
OKOIRANERERA 26: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
