OKOIRANERERA 25
25
1“Onye abanto babere babwate eriomana ase egati yabo, rirorio bagende ase ekegambero, erio abagambi bagambe ekina ekio, na oyio ore noboronge aegwe oboronge bwaye, na oria ore nokomocha abarerwe okomocha kwaye. 2Kerabe ng’a oria omomochi nigo agwenerete goakwa ebiranya, omogambi oria amochike aramame inse agwo ase obosio bwaye na goakwa ebiranya koreng’ana buna okomocha kwaye kore. 3Omonto oyio aakwe ebiranya emerongo ene, korende tari goetania ebio; aise kogenderera goakwa goetania, nigo arasookigwe ase obosio bwao. Takoegwa ogoakwa goetania okwo gochikire.
4“Tobaisa kobekera eng’ombe ekeokio ekero ekoora endagera.
Buna omonto agwenerete gokora ekero momura omwabo akure
5“Onye abamura babere ba ise omo bamenyete aase aamo, na oyomo akwe, nere tabwate omwana, omokungu bw’omonto oria takonyuomwa nomonto bw’eamate eng’ao, korende omomura omwabo omosacha oye nere oratware omokungu oria abe ribaga ria momura omwabo. 6Omwana omoisia omotangi omokungu oria araibore, arokwe erieta ri’oyomwabo ise oria okwete. Erio nario erieta riaye ritabaise gosira korwa ase Abaisraeli. 7Korende onye omonto oria okwanga gotwara moka momura omwabo, rirorio omokungu oria agende ase abagaaka bare agwo ase egeita ki’omochie, akwane amang’ana aya: Omomura omwabo omosacha one bwangire goteneneria oyomwabo egesaku, erinde erieta riaye tirisira korwa ase Abaisraeli.
8“Erio abagaaka baria b’omochie barangerie omonto oria, bakwane nere, na karagenderere gokana ng’a tatageti gotwara omokungu oria, 9erio omokungu oria omoboraka aike ang’e ase omomura oria omwabo omosacha oye, asomore egekoroto korwa ase okogoro kw’omonto oria agwo ase amasio ’abagaaka, naende amotwere amate ase obosio bwaye, akwane: Nabo arakorwe omonto onde bwensi okwanga goteneneria omomura omwabo egesaku. 10Eamate y’omonto oyio emanyekane ase Abaisraeli, buna eamate y’omonto oyio osomoretwe egekoroto korwa ase okogoro kwaye.
Amachiko ande
11“Ekero abasacha babere bakorwana, na omokungu bw’omosacha oyomo achiche gokonya omosacha oye, na omokungu oria arambore okoboko abwate ekiimo ki’obosacha ki’omonto oria onde, 12timororera omokungu oria amabera; goika mobutore okoboko kwaye.
13“Timobaisa koba nebirengo bibere ase chisaro chiaino, ekemo ekenene na ekende egeke. 14Timobaisa gotwara ebimunu bikorenga bibere ase chinyomba chiaino, ekemo ekenene, na ekende egeke. 15Mokorere ebirengo bi’ekeene, naende ebiisaine bi’okomanya oborito na obonge; erio nario amatuko aino arabe amange ase ense eria Omonene, Nyasae oino, agochia kobaa. 16Abanto bonsi bagokora oborianania buna obwo, nigo bare okogechia ase Omonene, Nyasae oino.
Amachiko ay’ogoita Abaameleki
17“Moinyore aya Abaameleki babakorerete ekero mwarenge ase orogendo korwa Misiri. 18Barabwo tibamoirogete Nyasae. Ase ayio bagacha, bakabarwania na goita abanto abatigarete nyuma konya bagoyire na korosa. 19Ase ayio, nebe ekero Omonene, Nyasae oino, abaeire ense eria ebe omwando oino, naende ekero abaeire obotoereru korwa ase ababisa baino bonsi babaetanaine, goika mosirie Abaameleki bonsi, tibainyorwa nonya ng’ake inse y’erioba. Timobaisa kweba amang’ana ayio.
Currently Selected:
OKOIRANERERA 25: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
