OKOIRANERERA 24
24
Ogotigana na okonyuomana naende
1“Nenyare koba ng’a omonto onyuomire omokungu, na nyuma y’ayio amwange, ekiagera anyorire ring’ana asare ritamogogeti. Erio amorikere rirube ri’ogotigana nere, ae omokungu oria na komoseria korwa bwoye. 2Naende nenyare koba ng’a omokungu oyio gatigire omosacha oria, agende anyuomwe nomosacha omoao, 3na oyo nere amwange, amorikere rirube ri’ogotigana, amoserie korwa bwoye, gose omosacha oyio o kabere akwe. 4Ase amang’ana ayio onsi, omosacha oria bwe ritang’ani omoseretie, tabaisa komoirania gocha bwoye abe mokaye naende, ekiagera omokungu oria obeire oyotachenegeti; okwo nigo kore okogechia ase obosio bw’Omonene, nainwe timobaisa korenta okomocha kobe ase ense eyio Omonene, Nyasae oino, agochia kobaa ebe omwando oino.
Amachiko are ao ao
5“Onye omonto onyuomire omokungu tagenda ase esegi amo nabarwani bande, gose taegwa emeremo ende yonsi akorere egesaku, korende nigo araegwe ribaga abeere nka bwoye ase omwaka oyomo kogokia mokaye.
6“Onye omonto okoa omonto onde egento singo, taira orogena gose ensio bibe intenenera, ekiagera igo nobogima bwaye akoira bobe intenenera.
7“Omonto karanyorekane oibire Omoisraeli omwabo amokore buna omosomba, gose amoonie, omoibi oria goika aitwe akwe. Goika morusie obobe korwa asemore.
8“Mwerende mono ekero mwarwarire oborwaire bwa ukoma, mokore buna abakuani Abalawi barabatebie. 9Ayio onsi inche nabachigete ng’a babatebie, goika moyakore. Inyora aya Omonene, Nyasae oino, akorerete Miriamu ekero mwarenge ase orogendo rwaino korwa Misiri.
10“Ekero okoa omogisangio oo egento kende gionsi singo, tobaisa gosoa ase enyomba yaye koira egento keria abekire kebe intenenera. 11Aye otenene isiko y’enyomba yaye, nere akorentere egento abeka koba intenenera. 12Onye omonto oria nomotaka, tobaisa kogenda korara negento keria kiaye kere bwoo.
13“Ekero bogochia koira omoiranerie egetambaa akwambara erinde ebisie, nario aragosesenie, na igo gwakorire ayare boronge ase obosio bw’Omonene, Nyasae oo.
14“Tobaisa gokorera bobe omonto omorikwa ore omotaka na oremeire, karabe omonto omino Omoisraeli, gose omomenyi omenyete ase ense yaino. 15Rituko riria akorete emeremo, omoe eng’eria yaye ritang’ani erioba ritaragwa, ekiagera ere nomotaka, nigo asemeretie konyora eng’eria yaye. Onye tokomoakana nigo arabaise korera ase Omonene igoro yao, naende ayio nigo arabe ebibe asore.
16“Abaibori tibagoitwa ase engencho y’ebibe bi’abana babo, gose abana tibagoitwa ase engencho y’ebibe bi’abaibori babo; korende kera omonto nigo araitwe ase engencho y’ebibe biaye omonyene.
17“Tobaisa korina omonto omomenyi, gose entakana, oboronge bwaye, na toira eanga y’omoboraka ebe intenenera. 18Korende moinyore ing’a nainwe mwarenge abasomba ase ense ya Misiri, korende Omonene, Nyasae oino, akababooria korwa aroro; ase ayio nabachikire mobwatie amang’ana ayio.
19“Ekero mokogesa chindagera chi’emegondo yaino, na mwebe omosaima bw’endagera mogondo, timobaisa koirana gochia koywoyia, korende moyotige obe oyo bw’omonto omomenyi omenyete asemore, gose oyo bwe chintakana, na ababoraka, erio nario Omonene, Nyasae oino, arasesenie emeremo yaino yonsi mogokora. 20Ekero mwatorire amazeituni aino, timoirana naende gosangereria ase chinsagia aya mwamochete gotora. Moyatigere abamenyi, ne chintakana, na ababoraka. 21Ekero mwatorire amasabibu aino, timoirana naende gochia gosangereria ayatigaire, korende moyatigere abamenyi, ne chintakana, na ababoraka. 22Inyora ng’a inwe nigo mwarenge abasomba ase ense ya Misiri; ase ayio nabachikire mobwatie amang’ana ayio.
Currently Selected:
OKOIRANERERA 24: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
