OKOIRANERERA 22
22
1“Korarore eng’ombe y’oyomino gose eng’ondi yaye ekogenda gosira, tobaisa koombia buna toyerochi, korende goika oyeiranie gochia ase omonyene. 2Onye tamenyeti ang’e naye gose tomomanyeti, goika oyerente bwoo ebeere aroro goika oria omino ache koyerigia, erio omoyee. 3Naboigo orakore koranyore etigere yaye, gose eanga yaye, gose gento kende gionsi ki’oyomino gesirete; aye kogokenyora tobaisa koombia tomogekonyera.
4“Koranyore etigere y’oyomino yagure inse agwo ase enchera, gose eng’ombe yaye, tobaisa koombia oyetige aroro; goika oyegororokie etenene.
5“Omokungu tabaisa kobeka chianga chi’omosacha, gose omosacha tabaisa kobeka echi’omokungu. Onde bwensi orakore bo, nigo arakore ayare okogechia ase Omonene, Nyasae oino.
6“Kerabe ng’a kwanyorire egeswa ki’enyoni kere igoro ase omote, gose inse ase riroba, na onyore enyoni eng’ina eraire igoro ase amage aye, gose ase amagena, tobaisa koira enyoni eria amo namage aye. 7Oire amage oka, korende eng’ina ero oyetige eiruruke egende. Korakore igo nebe buya asore, naende nobe moyo ase engaki entambe.
8“Ekero okoagacha enyomba enyia, goika oagache egetango ase ekerama insinyo, erio nario omonto atagwe korwao akwe; okomocha kw’ogokwa kw’omonto oragwe korwao tigokobarerwa enyomba yao.
9“Tobaisa gosimeka chimbusuro chi’ebisaku bibere ase omogondo oo bw’emesabibu; oise gokora bo okwama kwao gwonsi ogw’echio gwasimegete amo nokw’emesabibu nigo korairwe kobe ogw’Aase Aachenu.
10“Gokorema, tobaisa gosiberania eng’ombe na etigere ching’use obokombe amo.
11“Tobaisa kobeka eanga eroiseranirie chiusi chi’amarionya na echi’egatani amo.
12“Okore amasugunia, oyabeke ase emego ene y’eganchwa yao entambe, eria okwambara.
Amachiko igoro y’okoba omweriti
13“Nenyare koba ng’a omonto onyuomire omokungu bamenyane, na nyuma y’ayio amwange, 14amosoere ase amang’ana ’obonyaka, erio asarie erieta riaye, ogoteba: Nigo naira omokungu oyo, na ekero naba nere tindochi ebimanyererio bi’obwekungi bwaye.
15“Onye naboigo, ise na ng’ina omoiseke oria bamoire ase abagaaka b’omochie oria, ase bakogambera agwo ase egeita, babarentere ebimanyererio bi’obwekungi bw’omoiseke oria. 16Ise omoiseke oria akwane nabagaaka baria, abatebie: Naa omonto oyo omoiseke one abe mokaye, na bono ere omwangire. 17Boigo osoeire omoiseke oyo one na omorenteire obosooku ogoteba ng’a tarochi ebimanyererio bi’obwekungi bwaye. Korende rora aa, egetambaa eke nkebwate ebimanyererio bi’obwekungi bwaye. Erio barambore egetambaa keria ase amaiso ’abagaaka b’omochie oria. 18Erio abagaaka b’omochie oria babwate omosacha oria, bamoake ebiranya. 19Naende bamonachere aakane, chibesa, chisekeli chie chifeta rigana erimo, amoe ise omoiseke oria, ekiagera osaririe erieta ri’omoiseke omwekungi bw’Abaisraeli. Erio oria agenderere koba mokaye, na omosacha oye tabaisa komotiga nonya ng’ake ase obogima bwaye bwonsi.
20“Korende kerabe ng’a namaene ebimanyererio bi’obwekungi bw’omoiseke oria tibirorekaneti, 21rirorio bamorente ase egesieri ki’enyomba ya ise, na abanto b’omochie bw’omoiseke oria bamoake amagena akwe, ekiagera orentire obosooku ase egati y’Abaisraeli ase ogokora obonyaka ekero atarasoka. Goika morusie obobe borue asemore.
22“Omonto omosacha aise konyorekana oraire nomokungu bw’omonto onde, bonsi babere, omosacha oria amo nomokungu oria, goika baitwe bakwe. Goika morusie obobe borue ase Abaisraeli.
23“Omoiseke omwekungi oriereirwe boko nomonto, karaumerane nomosacha omoao agwo ase omochie, na omosacha oyio abe nere, 24mobasokie bonsi babere, mobaire isiko y’egeita ki’omochie, erio mobaake amagena bakwe. Omoiseke oria aitwe, ekiagera atakuurete akonywe, nonya orenge ase omochie ime, na omosacha oria, ekiagera atomana nomoiseke oriereirwe boko nomonto omoao. Goika morusie obobe borue asemore.
25“Korende omonto karaumerane nomoiseke omwekungi oriereirwe boko nomonto omoao amobwate ne chinguru abe nere agwo ase orosana isiko y’omochie, omonto oria nere bweka oraitwe akwe. 26Timokorera omoiseke oria ing’ana rinde; ere takorete okomocha kogwenerete aitwe, ekiagera amang’ana ayio nigo anga buna ekero omonto akorwania omonto onde omoao na komoita moeneno. 27Omonto oyio nigo amonyorete agwo ase orosana, akamorwania ne chinguru. Nonya omoiseke oria okuurete akonywe, monto onde tarengeo okomokonya.
28“Omonto karaumerane nomoiseke omwekungi otararierwa boko, na komobwata ne chinguru, abe nere, nabarabwo babere banyorwe, 29rirorio omonto oria naae ise omoiseke oria chibesa, chisekeli chie chifeta emerongo etano, atwaare omoiseke oria abe mokaye, ekiagera omosareirie obwekungi bwaye; takoba neribaga komotiga ase obogima bwaye bwonsi.
30“Omonto tabaisa korara na moga ise, abaise korentera ise obosooku.
Currently Selected:
OKOIRANERERA 22: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
