OKOIRANERERA 21
21
Omoiti otamanyekaneti
1“Omonto karanyorekane oitirwe okure ore orosana ime agwo ase ense eria Omonene, Nyasae oino, agochia kobaa, na onye omonto omoita tamanyekaneti, 2rirorio abagaaka baino amo nabagambi, bagende korenga oboaare korwa aase agwo omonto oyio akwerete goika ase emechie eetanaine ere ang’e naase agwo. 3Erio abagaaka b’omochie oranyorekane ore ang’e kobua nase omonto oyio akwerete, bachore ritororo ritarakorigwa emeremo, gose ritarasiberwa rikorogoto ase ogokurura ebinto. 4Barabwo baire ritororo riria, baritirimbokie gochia ase rigoko ase orooche rore namache agotirimboka, rigoko ritana koremwa gose gosimekwa chindagera, na aroro agwo ase rigoko, babune ebigoti bie ritororo riria. 5Na abakuani Abalawi bagende agwo ase rigoko, ekiagera Omonene, Nyasae oino, abachorire bamokorere na gosesenia ase erieta riaye. Ase ring’ana riabo kera eriomana na ogokorerana bobe ase obotindi nabinachwe. 6Abagaaka bonsi b’omochie oria ore ang’e kobua naase aria omonto oria aiteretwe baisabere amaboko abo igoro ase ritororo riria riabunetwe ebigoti agwo ase rigoko. 7Erio bakwane amang’ana aya ase okoenekia oborori bwabo: Amaboko aito tari aro aitera amanyinga aya, gose amaiso aito taroche ayio kagokorwa. 8Aye Omonene, abera abanto bao Abaisraeli, aba kwabooretie; tobabarera okomocha oko kw’ogoiterwa kw’amanyinga ’omonto otari na komocha. Naboigo baaberwe okomocha oko kw’ogoiterwa kw’amanyinga. 9Goika morusie korwa asemore okomocha kw’ogoiterwa kw’amanyinga ’omonto otari na komocha; mokore boronge ase obosio bw’Omonene.
Igoro y’abakungu bagwoswa korwa ase esegi
10“Ekero mokogenda ase esegi korwania ababisa baino, na Omonene, Nyasae oino, ababeke ase amaboko aino, nainwe mobabue na moboosa, 11na onde oino arore omokungu ore omonyakieni ase egati y’abooswa abwo, nere aganie komoira abe mokaye, 12rirorio amoire nka bwoye, na omokungu oria akigite etukia y’omotwe oye naende aninte chinchara chiaye. 13Aonchorerie chianga chiria abegete ekero oosetwe, na agenderere kobeera agwo enka y’omonto oyio, abe okoreera ise na ng’ina ase engaki y’omotienyi omogima. Nyuma yaye omonto oria amotware abe mokaye. 14Korende kerabe ng’a tagokiri nomokungu oyio, amoe ribaga agende aande onsi ase aranche, korende tamoonia chibesa gose komokorera buna agokorera omosomba, ekiagera igo amobetereretie koba nere, na akamoa obosooku.
Igoro y’omomura omotangi okoira omwando
15“Nenyare koba ng’a omonto nabwate abakungu babere; ere nigo anchete oyomo na bwangete oria onde. Abakungu abwo bonsi babere baiboreire omosacha oyio abana, korende omwana omoisia omotangi nigo are oyo bw’omokungu oria angete. 16Ekero rituko ri’okobariera omwando riraike, omonto oria takoba ne ribaga gwanchereria omomura oye bw’omokungu oria anchete, na komoa omwando bw’okoiborwa kw’obotangi ribaga ri’okomoa oria ore omotangi bori aiboreretwe nomokungu atancheti. 17Goika amoe omomura oye omotangi chinibo ara kabere, nonya ore omwana bw’omokungu atancheti. Omomura oyio nere omotangi; omwando bw’okoiborwa kw’obotangi noyoye.
Igoro y’omomura otari koigwera
18“Nenyare koba ng’a omonto nabwate omwana omomura omobe, omoenenu, otari koigwera ise gose ng’ina, nonya bateemire komoa egesusuro ase okomorongeyia, ere tari kobaigwera. 19Ise na ng’ina omwana oyio bamobwate, bamoire ase abagaaka b’omochie agwo ase bakogambera ebina geita ki’omochie. 20Agwo bakwane amang’ana aya ase abagaaka baria: Omwana oyo oito nigo are omoenenu, na omosaria, tari gotoigwera, nigo are omoria bobe na gotinda ase okonywa. 21Erio agwo abanto bonsi b’omochie oye bamoake amagena goika akwe. Ase enchera eyio morusie obobe borue ase egati yaino. Abaisraeli bonsi kobaraigwe ayio, mbairoke.
Amachiko are ao ao
22“Onye omonto okorire ebibe na koegwa egesusuro ki’ogoitwa, asungwe ase omote. 23Omobere oye totigwa ore ase omote igoro obotuko obogima, korende otindekwe ase rituko erio erio, ekiagera omonto oitirwe ase ogosungwa nigo aragereirie na Nyasae. Timobaisa gotiga ense yaino ebe nobobe, ense eyio Omonene, Nyasae oino, abaeire ebe omwando oino.
Currently Selected:
OKOIRANERERA 21: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
