OKOIRANERERA 20
20
Amachiko ’Esegi
1“Ekero morabe mokogenda korwania ababisa baino esegi, na mokorora chibarasi, ne chigari, na abarwani babo bare abange kobua abaino, timobairoka, ekiagera Omonene, Nyasae oino, oria obarusetie korwa ase ense ya Misiri, nigo are amo nainwe. 2Ekero mogoika ang’e naase esegi ekorwanera, omokuani agende bosio, akwane nabanto, 3abatebie: Inwe Abaisraeli, tegerera! Bono mwabeire ang’e kogenda korwania ababisa baino. Timobaisa gokwa emioyo, timoiroka gose koiguswa, gose timoboboa, 4ekiagera Omonene, Nyasae oino, nagende amo nainwe, erio arwanie ababisa baino na kobarentera obobui.
5“Erio abateneneri bakwane nabanto, babatebie: Onye omonto ore aiga oagachire enyomba, korende tarayemenya, tiga airane bwoye, tabaisa gochia gokwera ase esegi, na omonto omoao achie koira enyomba yaye na koyemenya. 6Gose onye omonto ore aiga osimegete emesabibu ase omogondo oye, nere tararia amatunda korwao, tiga airane agende nka, tabaisa gochia gokwera ase esegi, na omonto omoao achie koria amatunda ’omogondo oye. 7Gose onye omonto ore aiga, oriereire omoiseke boko, ko taramorenta nka bwoye, tiga oyio airane agende nka, tabaisa gochia gokwera ase esegi, na omonto omoao achie koira omoiseke oria.
8“Naende abateneneri baria bagenderere gokwana nabanto, babatebie: Onye omonto ore aiga ore omwoba, ore nenkoro eondogete, oyio tiga airane agende nka bwoye, tabaisa kogera chinkoro chi ’abamwabo chiondoke buna aondogete ere omonyene. 9Na ekero abateneneri baria bakoorire gokwana nabarwani baria, bachore abatang’ani babe bakoraa abarwani b’esegi.
10“Komogoika ang’e nomochie mogochia korwania esegi, ritang’ani morarie amang’ana ’omorembe ase abanto b’omochie oyio. 11Onye bakoiraneria ng’a berure abanyene asemore na kobaa ribaga mosoe ase omochie obo, rirorio abanto bonsi bare ase omochie oria mbabe bakobakorera emeremo emekong’u na babe abasomba baino. 12Korende onye bakwanga kwerua abanyene asemore, korende babarwanie esegi, rirorio moire omochie obo na komenyao. 13Omonene, Nyasae oino, kayobekire ase amaboko aino, moite nemioro abanto abasacha bonsi bareo. 14Korende abakungu babo, na abana mobaire babe abaino, amo ne chitugo chionsi. Ebinto bionsi ebire ase omochie oyio mobisakore, mobiire bibe ebiaino, nainwe mogokere ebisakorwa bi’ababisa baino. Omonene, Nyasae oino, nere obabieire. 15Ayio naro morakore ase emechie ere aare korwa asemore, eyio etari y’abanto bare ang’e naiga.
16“Korende ase emechie y’abanto b’ense eyio Omonene, Nyasae oino, agochia kobaa ebe omwando oino, timotiga getongwa kende gionsi kereo kebe moyo. 17Moite Abahiti, na Abaamori, na Abakanani, na Abaperisi, na Abahivi, na Abayebusi, mobasirie kegima buna Omonene, Nyasae oino, abachigete. 18Erio nario batabaise koborokereria inwe gokora okogechia kwabo, okwo banarete ase ogosasima chinyasae chiabo na gochikorera, na kogera inwe mokore ebibe ase Omonene, Nyasae oino.
19“Ekero mwanaaririe omochie na koyoboera ase engaki entambe, na koyorwania esegi, erinde moyoire, timobaisa gosaria emete ereo. Monyare koria amatunda ’emete eyio, korende timoyegecha. Inee! Emete nero nabanto erinde moyesirie? 20Mogeche emete eria yoka momanyete ng’a teri kwama amatunda akoriegwa. Moyekorere emeremo y’okoagachera aase mogokengana korwa ase omochie oria mokorwania esegi, goika obugwe.
Currently Selected:
OKOIRANERERA 20: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
