OKOIRANERERA 17
17
1“Timobaisa korua eng’iti ende yonsi, chiombe, gose ching’ondi, gose chimbori, eyere na kemocho ase omobere oye, ebe ekeng’wanso ase Omonene, Nyasae oino. Eyio nigo ere okogechia asare.
2“Nenyare koba ng’a agwo ase omochie onde oino ase eyio Omonene, Nyasae oino, arabae, omonto, omosacha gose omokungu, anyorekane okorire amabe ase obosio bw’Omonene, Nyasae oino, ase ogosaria okobwatana kwaye kw’ogotianania, 3na gosasima chinyasae ching’ao na gochikorera ase ogosasima erioba, gose omotienyi, gose ching’enang’eni chia igoro, ebio obakanirie ng’a timobisasima. 4Komoratebigwe amang’ana buna ayio erio moyauna‐unie. Onye mokonyora ekeene ng’a amang’ana ayio akorirwe ase egati y’Abaisraeli, 5erio nario morarente agwo ase ebiita biaino omonto oria, omosacha gose omokungu, oyio okorire ogokora okwo okobe, erio momoake amagena goika akwe. 6Omonto oyio nigo araitwe ase oborori bw’abanto babere gose batato, korende tagoitwa ase oborori bw’omonto oyomo. 7Abanto baria birori nabwo barabe abatang’ani komoaka amagena ase okomoita, na nyuma yabo abanto bande bamanye komoaka amagena. Naboigo morarusie obobe bwonsi korwa asemore. 8Onye amang’ana arentirwe asemore, ayare amakong’u koyanacha, karabe amang’ana ogoiterwa kw’amanyinga, gose ay’ogokora oboronge ase omonto, gose obobe omonto akoreire omonto onde, gose ekina kende gionsi kere egekong’u asemore agwo ase emechie yaino, erio moimoke mogende aase agwo Omonene, Nyasae oino, arachore, 9mogende ase abakuani Abalawi na ase omogambi bw’engaki eyio. Mobatebie amang’ana ayio amakong’u, nabarabwo nabanache ekina kia boronge. 10Morende mono na gokora amang’ana ayio barabwo barabatebie korwa aase agwo Omonene arachore. Mokore koreng’ana buna barabasemie. 11Mokore koreng’ana buna barabatebererie, na buna baranache ekina asemore; timotiga ogosemia kwabo na koonchoka aande, gochia ase ensemo y’okorio gose ey’okobee. 12Omonto onde bwensi ore omomwenu na kwanga koigwera omokuani oyio ogotenena agwo ase obosio bw’Omonene, Nyasae oino, gose aange koigwera omogambi, ere goika aitwe akwe. Goika morusie obobe borue ase Abaisraeli. 13Ekero abanto bonsi baraigwe amang’ana ayio mbairoke, tibakora ogokora kw’obomwenu naende.
Ogosemigwa ase ogochora omoruoti
14“Ekero morabe mwaikire na komenya ase ense eyio Omonene, Nyasae oino, agochia kobaa ebe eyaino, aande moganie omoruoti abagambere, buna ebisaku biria bibaetanaine bibwate abaruoti babo bakobagambera. 15Erio mobeke omoruoti oyo Omonene, Nyasae oino, arabachorere. Mobeke omonto bw’abanto bamino abe omoruoti igoro asemore, korende omonto otari bw’egesaku kiaino timomobeka abe omoruoti oino. 16Omoruoti oyio takwementera chibarasi chinyinge, gose tabaisa gotoma abanto bairane Misiri ase ogochia korigia chibarasi chinyinge, ekiagera Omonene obatebirie ng’a timokonyara koirana gochia ase enchera eria naende. 17Omoruoti oria taba na bakungu abange, ekiagera ayio nigo aragere enkoro yaye eonchoke etige Omonene, gose takorigia kwementera chitahabu ne chifeta. 18Ekero aikaransire ase ekerogo ki’obonene ase oboruoti bwaye, ’arente ebuku y’amachiko korwa ase abakuani Abalawi, naende arike amang’ana ayio ayio ase ebuku ende. 19Ere natware ebuku eyio abe ogosoma amachiko ayio onsi ase amatuko ’obogima bwaye bwonsi, erio neorokererie komoiroka Omonene, Nyasae oye, na korenda amang’ana onsi ay’ogochika okwo na ay’emeroberio echikire, na koyakora. 20Goika akore igo, erinde tabaisa koenena ase ogochaya abanto bande bamwabo, gose tabaisa koonchoka korwa ase amachiko na kogenda ase ensemo y’okorio gose ey’okobee. Karaigwere, ere amo nabana baye mbabe bakogambera Abaisraeli ase engaki entambe.
Currently Selected:
OKOIRANERERA 17: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
