OKOIRANERERA 16
16
Epasaka
(Okong’ 12:1–20)
1“Mobe mokorenda Epasaka y’Omonene, Nyasae oino, ase omotienyi bw’Abibu, ekiagera ase obotuko obomo bw’omotienyi oyio, nario Omonene, Nyasae oino abarusetie Misiri. 2Morusie eng’ondi, gose embori, gose eng’ombe, korwa ase amaicho aino, mogende aase Omonene arachore abe obomenyo bw’erieta riaye, erio morue eng’iti eria ebe ekeng’wanso ki’Epasaka ase Omonene Nyasae oino. 3Timobaisa koria ekeng’wanso ekio amo nemegati ebekire ememera; ase engaki y’amatuko atano na abere morabe mokoria emegati etabekiri memera, eyio nemegati y’emechando, ekiagera ekero mwaruete ase ense ya Misiri nigo mwaayererete gotama. Igo ase amatuko aino onsi more moyo mobe mokoinyora rituko mwaruete ase ense ya Misiri. 4Ase engaki y’amatuko atano na abere, ememera tenyorekana ase ense yaino yonsi, na enyama y’ekeng’wanso kiaruetwe ase omogoroba bwe rituko rie ritang’ani tetigarigwa ebeo ase obotuko bwonsi goika rituko ria kabere.
5“Timoruera ekeng’wanso ki’Epasaka ase emechie ende yaino, eyio Omonene Nyasae oino agochia kobaa. 6Aase Omonene, Nyasae oino, arachore koba obomenyo bw’erieta riaye, agwo nao oka moraruere ekeng’wanso ki’Epasaka. Agwo nao morabe mogokerua ekero kia mogoroba, ase chinsa chireng’aine chiria mwaruete Misiri. 7Moiyeke chinyama chi’ekeng’wanso ekio, mochiriere aase aria Omonene, Nyasae oino, arachore. Rituko ria kabere mambia moirane gochia ase chiema chiaino. 8Ase amatuko atano na rimo morie emegati etabekiri memera, na ase rituko ria gatano na kabere, mobe nomosangererekano bw’engencho enene bw’okomosasima Omonene, Nyasae oino. Ase rituko erio timokora meremo ende yonsi.
Amatuko Amanene aye Rigesa
(Okong’ 34:22; Abal 23:15–22)
9“Mobare chichuma isano na ibere, mochake korwa engaki eria mogochaka rigesa ase emegondo yaino. 10Morende Amatuko Amanene e Chichuma ase Omonene, Nyasae oino, Morente ebiegwa bi’ogwancha ase Omonene, Nyasae oino, mobirue buna koreng’ana abasesenirie. 11Agwo aase Omonene arachore abe obomenyo bw’erieta riaye, nao moragende na mogoke ase obosio bwaye, inwe na abana baino, abamura na abaiseke, na abasomba baino, abamura na abaiseke, na Abalawi bamenyete ase emechie yaino, na abamenyi, ne chintakana, na ababoraka bare ase egati yaino. 12Moinyore ng’a nainwe nigo mwarenge abasomba aaria Misiri, ase ayio morende na kobwata emeroberio eyio yonsi echikire.
Amatuko Amanene ay’Ebigutu
(Abal 23:33–43)
13“Ekero mwaoorire chindagera chiaino naende mwamitire amasabibu aino inamobe n’Amatuko Amanene ay’Ebigutu ase engaki y’amatuko atano na abere. 14Mogoke ase amatuko ayio, inwe amo nabana baino, abamura na abaiseke, na abasomba baino, abamura na abaiseke, na Abalawi, na abamenyi, ne chintakana, na ababoraka, abwo bamenyete ase emechie yaino. 15Namorende Amatuko Amanene ay’Omonene, Nyasae oino, ase engaki y’amatuko atano na abere; moyarende aase agwo Omonene arachore, ekiagera Omonene, Nyasae oino, nasesenie okwama kw’emegondo yaino amo nemeremo yaino yonsi. Ase ayio monyare kogoka mwensi amo.
16“Ara gatano kera omwaka abanto baino abasacha babe bagocha ase obosio bw’Omonene, Nyasae oino, aase agwo arachore; bagende aroro ase Amatuko Amanene ay’Emegati etabekiri memera, na ase Amatuko Amanene aye Chichuma, na ase Amatuko Amanene ay’Ebigutu. Tibagenda ase obosio bw’Omonene bare namaboko amasa. 17Kera omonto arue ebinto koreng’ana buna Omonene, Nyasae oino, amosesenirie.
Amachiko ase abagambi
18“Mochore abagambi na abateneneri korwa ase ebisaku biaino, babe bakogamba agwo ase emechie yaino, eyio Omonene, Nyasae oino, agochia kobaa. Abwo babe bakogamba ebina bi’abanto ase oboronge. 19Timobaisa koonchorana oboronge, gose gwanchereria abanto, gose timoegwa riaaki, ekiagera riaaki nigo rikoukoria amaiso ’abang’aini, naende nigo rikoonchorana na korina abanyaboronge oboronge bwabo. 20Oboronge nabwo bwoka morabe mokobwatia, erio nario morabe moyo, na koira ense eria Omonene, Nyasae oino, agochia kobaa.
21“Timobaisa koremera Asera, enyasae eria enkungu, omote onde bwensi, komenta ase egesasimero moraagachere Omonene, Nyasae oino. 22Naende timobaisa gotenenia esiiro ende yonsi y’ogosasimwa, ekiagera Omonene, Nyasae oino, nagechete ebinto buna ebio.
Currently Selected:
OKOIRANERERA 16: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
