OKOIRANERERA 18
18
Egetari ki’abakuani
1“Abakuani Abalawi na egesaku gionsi ki’Abalawi tibakonyora egetari gose omwando amo n’Abaisraeli bande. Nigo barabe bakoria ebing’wanso bigosambwa nomorero ase Omonene na okoruegwa konde gokorentwa asare. 2Ase ayio tibakonyora omwando amo nabanto bamwabo, ekiagera Omonene omonyene nere omwando obo, buna abarierete eira.
3“Ekero abanto barabe bakorua eng’ombe, gose eng’ondi, gose embori, koba ekeng’wanso, bae abakuani rireko, ne chinsea ibere, na enda; ebio nabio ebitari abanto barae abakuani. 4Moe abakuani ogotongora kwaino kw’endagera, na edivai, na amaguta, na amarionya amatang’ani mokonacha korwa ase ching’ondi chiaino. 5Omonene, Nyasae oino, ochorire Lawi na ororeria rwaye ase egati y’ebisaku biaino bionsi, babe bagokora emeremo ase erieta riaye, ebiaare ase ebiaare.
6“Omolawi onde bwensi orabe omenyete ase emechie ende yonsi y’Abaisraeli karaganie koruao, nabo aranyare gocha aase agwo Omonene arachore. 7Ere nabe ogokora emeremo ase erieta ri’Omonene, Nyasae oye, buna Abalawi bande bamwabo bagotenena gokora emeremo ase obosio bw’Omonene. 8Nere oyio naatananerwe egetari kiaye ki’endagera kereng’aine neki’Abalawi bande, nonya okonyora egento ase okoonia omwando atigeretwe nabaibori baye.
Ogokurerwa kw’ogotenaria chingencho chi’abanto batamomanyeti Nyasae
9“Ekero moraike ase ense eria Omonene, Nyasae oino, agochia kobaa, timobaisa kweorokereria kobwatia chingencho chi’okogechia okwo ebisaku biria bimenyeteo binarete gokora. 10Monto onde oino tabaisa korua omwana oye, omomura gose omoiseke, asambwe ase omorero ime abe ekeng’wanso. Onde taba ase egati yaino oyogokora oboringoria, gose oborogi, gose koruta chinche, gose oyogokora oboragori, 11gose oyokorangeria ebirecha, gose okorigia ogosemigwa korwa ase emeika y’abakure, gose oborogi bonde bwonsi. 12Onde bwensi orakore ebinto ebi nigo arabe okogechia ase Omonene; na ase engencho y’okogechia buna okwo Omonene, Nyasae oino, naserie abanto abwo konya bamenyete ase ense eria, barue ase amasio aino. 13Inwe goika mobe abaikeranu ase obosio bw’Omonene, Nyasae oino.”
Eira y’ogotoma omobani
14Naende Musa agateba, “Abanto b’ebisaku ebio mogochia goseria nigo bakoigwera abarogi na abariori, korende inwe Omonene, Nyasae oino, obakanirie ng’a timobaisa gokora ebinto ebio. 15Korende ase egati y’abamino, Omonene, Nyasae oino, nabaimokerie omobani onga buna inche. Oyio nere moraigwere.
16“Nigo erabe buna mwaboretie Omonene, Nyasae oino, ase rituko riria mwasangererekanete agwo Horebu, mogakwana: Tototiga toigwe eriogi ri’Omonene, Nyasae oito, kagokwana, gose titogenderera korora omorero oyio omonene. Toise koriigwa na koyorora, nigo torakwe. 17Omonene agantebia: Amang’ana ayio bakwanire nay’ekeene. 18Korwa ase egati y’abamwabo nimbaimokerie omobani onga buna aye, nimbeke amang’ana aane ase omonwa oye, nere nabatebie ayio onsi ndamochike. 19Omonto onde bwensi oraange koigwera amang’ana aane ayio ndachike omobani oyio ayakwane ase erieta riane, inche bweka omonyene ning’ee omonto oyio egesusuro. 20Korende omobani oraenene, na gokwana ase erieta riane aya ntamochigeti akwane, gose oyio orakwane ase amarieta e chinyasae ching’ao, omobani oyio nigo araitwe akwe.
21“Na komoreborie ase chinkoro chiaino ime: Naki torakore tomanye gose ring’ana riria rigokwanwa neri’Omonene? 22Rirorio momanye ng’a, ekero omobani arakwane ring’ana ase erieta ri’Omonene, korende ring’ana erio tiriikeranigwa, gose koba ekeene, erio nering’ana Omonene atakwanete. Omobani oyio nigo arikwana ase obomwenu bwaye, inwe timobaisa komoiroka.
Currently Selected:
OKOIRANERERA 18: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
