OKOIRANERERA 15
15
Omwaka bw’okwabera abanyasira
(Okong’ 25:1–7)
1“Ase omoerio o kera omwaka o gatano na kabere mobae abwo bariete chisira obosibore tibaakana. 2Oyo noro omoroberio buna morakore: Kera omonto oete omogisangio oye egento singo, amotigere esira eyio. Tabaisa koboria oyomwabo bw’egesaku kiaye amoakane esira eyio, ekiagera obosibore bw’Omonene bw okwabera chisira bwararigwe. 3Omomenyi ere nakoiranerie egento kwamoete singo. Korende egento kende gionsi kwaete oyomino tomosaba akoiranerie.
4“Omonto onde takoba omotaka ase egati yaino, ekiagera Omonene nabasesenie ase ense eyio agochia kobaa ebe omwando oino, 5komoraigwere Omonene, Nyasae oino, naende mobwate amachiko aya onsi nabaeire rituko ria rero. 6Omonene, Nyasae oino, nabasesenie buna abarierete eira. Inwe inamoe ebisaku ebinge ebinto singo, korende inwe timokoremerwa erinde mogende gosaba ebinto moegwe singo; naende inwe namogambere ebisaku ebinge, korende birobio tibikobagambera inwe.
7“Onye omonto omino ore omotaka agwo ase emechie yaino ase ense eyio Omonene, Nyasae oino, agochia kobaa, timobaisa koba abang’iti gose abagoko asare, korende mokonye omonto oyio omino. 8Mobe abaya asare, momoe singo ebinto biisaine ase oboremerwa bwaye bonde bwonsi. 9Mwerende mono, timobaisa kwanga koa omotaka oyio egento na goteba: Omwaka bw’okwabera chisira obeire ang’e. Timoa ebirengererio ebibe buna ebio ribaga ase chinkoro chiaino. Onye mokoba abang’iti na kwanga koa oyomino ore omotaka egento, ere narere ase Omonene, ekiagera mwamorinire eki aremeire, nainwe namobe nebibe. 10Momoe ebinto ase ogwancha, na timoba ne ribero ekero mokomoa. Ekero morarue igo, Omonene, Nyasae oino, nabasesenie ase emeremo yaino yonsi mogokora. 11Abataka tibakoera korwa ase ense; na ase engencho eyio nabachikire ng’a mobe nemioyo emerabu ase ogokonya abamino bare abataka, na abaremeire bare ase ense yaino.
Amachiko ase abwo babwate abasomba
(Okong’ 21:1–11)
12“Onye Omoibirania omino, omosacha gose omokungu, oonigwe asore, nigo aragokorere emeremo ase emiaka etano nomo, korende ase omwaka o gatano na kabere, goika omoe ribaga arue asore. 13Ekero oramoe ribaga arue asore, tobaisa komotiga agende ore namaboko amasa. 14Omoe ching’ondi kore nomoyo omorabu, omoe nendagera, na edivai, koreng’ana buna Omonene, Nyasae oo, agosesenirie. 15Moinyore ng’a nainwe mwarenge abasomba ase ense ya Misiri, na Omonene, Nyasae oino, akababooria korwa aroro. Ase engencho eyio nabachikire amang’ana aya rituko ria rero.
16“Korende omosomba oria karatebe ng’a tatageti kogotiga agende, ekiagera ogwanchire aye, amo neamate yao, naende igo aisanegete komenya bwoo, 17rirorio oimokie esindake omotue ogoto, na esindake eria esoe ase omotobwa bw’egesieri kiao, nere nabe omosomba oo ase obogima bwaye bwonsi. Naboigo orakore nase omosomba oo omokungu. 18Tobaisa korora ng’a naakong’u komoa obosibore, ekiagera ase emiaka etano nomo ere nigo arenge kogokorera emeremo ara kabere buna omorikwa bw’eng’eria are kogokorera. Ase ayio Omonene, Nyasae oo, nagosesenie ase emeremo yao yonsi ogokora.
Chintangi chie ching’iti chitugire
19“Mwatananere Omonene, Nyasae oino, chintangi chionsi chie chieri, na echie chimingichi, na echie chigoree. Timobaisa gokorera chieri echio chintangi emeremo ende yonsi, gose timobaisa konacha amarionya e chimingichi echio. 20Omwaka ase omwaka, inwe amo nabanto be chinka chiaino moriere chinyama chie chitugo echio chintangi ase obosio bw’Omonene, Nyasae oino, aase agwo arachore. 21Korende echire na bimocho ase emebere yabo, onye chire ebisegora, gose emeuko, gose na kemocho kende gionsi, timobaisa gochirua chibe ekeng’wanso ase Omonene, Nyasae oino. 22Chinyama chie ching’iti buna echio mochiriere agwo ase emechie yaino. Abanto bonsi onye bare abatachenegeti, gose bachenegete, nabachirie. Nabo morachirie buna mokoria chinyama chie chingabi gose echie chinsune. 23Timobaisa koria amanyinga abo, korende moyaitere ase riroba buna amache.
Currently Selected:
OKOIRANERERA 15: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
