OKOIRANERERA 14
14
Ogokanigwa gw’okwenaria gete ase ebirero
1“Inwe nabana b’Omonene, Nyasae oino. Timwesaraga emebere yaino gose gwekigita chitukia chia bosio ase emetwe yaino ekero mokoreera abakure, 2ekiagera inwe nabanto abachenu ase Omonene, Nyasae oino. Ere obachorire mobe abanto baye, mwaatananegete korwa ase abanto b’ebisaku binde bionsi bire ase ense.
Ching’iti chichenegete na echitachenegeti
(Abal 11:1–47)
3“Timobaisa koria ng’iti ende yonsi y’okogechia. 4Echi nachio ching’iti morabe mokoria: chiombe, ne ching’ondi, ne chimbori, 5ne chinsune, ne chingabi, ne ebisia, ne chimbori chi’orosana, ne chiburo, ne chitobe, ne ching’ondi chi’orosana. 6Kera eng’iti ebwate ebitaago biatananegete gati ase chinsemo ibere, naende chikoria eng’ang’ura, echio nachio morarie. 7Ase ching’iti echio chikoria eng’ang’ura gose chibwate ebitaago biatananegete, timoria echio: engamia, na egesusu, na egesengi. Echio nigo chikoria eng’ang’ura, korende tichibwati ebitaago biatananegete, ase ayio tichichenegeti. 8Timoria embeche; nebwate ebitaago biatananegete, korende teri koria eng’ang’ura. Ase ayio nebe asemore eyetachenegeti. Timoria chinyama chie ching’iti echio gose timokuna emebere yabo ekero chiakure.
9“Ase echio chionsi chire ase amache ime monyare koria chinswe chibwate chingondo chinga buna chimbaba, na amagoocho. 10Chinde chionsi chitabwati chingondo chinga buna chimbaba, na amagoocho, timochiria; echio nchibe echitachenegeti asemore.
11“Chinyoni chionsi chichenegete namochirie. 12Timoria chinyoni echi: ekeongo, na ensoti, na obotere; 13amakoru na ebisaku biamwabo; 14ebigonkoru na ebisaku biamwabo bionsi; 15esagero na omoyaye, na enyakoboke, na enyautuutu, na ebisaku biamwabo; 16enyakweumia enke na enene, na etibibi; 17etekere, na ekeongo kende, na omoneke, 18na amaagonga na ebisaku biamwabo, na enteema bobe, na egetabora mato.
19“Ebisaku bionsi bi’ebitongwa ebisinini bikoiruruka ne chimbaba tibichenegeti asemore, timobiria. 20Ebitongwa ebichenegete bibwate chimbaba nabio moranyare kobiria.
21“Eng’iti ekwete yoka enyene timoyeria. Monyare koyea omomenyi omenyete amo nainwe ase omochie oino, ayerie, gose moyeoonerie omonto bw’egesaku ekeao, korende inwe nabanto abachenu, mwatananire ase Omonene Nyasae oino.
“Timobaisa koiyekera emanwa y’embori ime y’amabeere ’eng’ina.
Ogochika gw’okorua ensemo ya ikomi
22“Goika morue ensemo ya ikomi ye chindagera chi’emegondo yaino echi chikwama kera omwaka. 23Agwo ase obosio bw’Omonene, Nyasae oino, aase arachore abe obomenyo bw’erieta riaye, nao morariere ensemo ya ikomi ye chindagera chiaino, na edivai, na amaguta, ne chintangi chie chiombe, ne ching’ondi, ne chimbori; erinde monyare kweorokereria komoiroka Omonene, Nyasae oino, botambe. 24Onye aase agwo Omonene Nyasae achorire abe obomenyo bw’erieta riaye are aare mono, motanyare kobogoria ensemo ya ikomi y’eria Omonene, Nyasae oino, abasesenirie nero, 25rirorio moonchorerie ebinto ebio ase chibesa, erinde mochiire aase agwo Omonene oino achorire. 26Chibesa echio mogore chiombe, gose ching’ondi, gose edivai, gose ebinyugwa ebiroro, kende gionsi moganetie. Mobiriere agwo ase obosio bw’Omonene, Nyasae oino, erinde mogoke amo nabanto be chinka chiaino.
27“Timotiga gokonya Abalawi bamenyete ase emechie yaino, ekiagera barabwo tibabwati emegondo gose omwando amo nainwe. 28Ase omoerio o kera emiaka etato morente ensemo ya ikomi ye chindagera chi’emegondo chi’omwaka oria, moyegache ase emechie yaino. 29Endagera eyio ney’Abalawi, ekiagera barabwo tibabwati omwando bw’oboremo, na ey’abamenyi ne chintakana, na ababoraka bare ase emechie yaino. Abwo mbachiche barie endagera eyio baisaneke. Erio nario Omonene, Nyasae oino, arabasesenie ase emeremo yaino yonsi mogokora.
Currently Selected:
OKOIRANERERA 14: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
