OKOIRANERERA 13
13
1“Nenyare koba ng’a ase egati yaino omobani, gose omonyandoto, oratuboke na koorokia ebikone na amakumia, 2na amang’ana ayio aikeranigwe. Aise kobatebia: Togende tosasime chinyasae ching’ao, (echio motana gosasima agwo ritang’ani,) tochikorere, 3timobaisa koigwa amang’ana ’omobani oyio gose ay’omonyandoto oyio. Omonene, Nyasae oino, nigo akobateema, erinde arore gose momwanchete ne chinkoro chiaino chionsi, na emioyo yaino yonsi. 4Mobwatie Omonene, Nyasae oino, na momoiroke. Mobwate amachiko aye na moigwere eriogi riaye, momokorere na komobwatia. 5Korende omobani oyio, gose omonyondoto oyio, naitwe akwe, ekiagera oyio nigo akoborokereria ng’a mobe aba motari koigwera Omonene, Nyasae oino, oyio obarusetie korwa ase ense ya Misiri, na kobatooria korwa ase ense y’obosomba. Omonto oyio nigo arabasirie motige enchera eria Omonene, Nyasae oino, abachigete kobwatia. Goika morusie obobe bwonsi korwa asemore.
6“Boigo momura omino morwete enda eyemo, gose omwana oo, omomura gose omoiseke, gose omokungu oo bwanchete, gose omosani oo bwanchete buna bweanchete aye omonyene, nanyare gokoebereria bobisi na kogotebia: Togende tosasime chinyasae ching’ao, chiria, aye otana gosasima, gose chisokoro chiao chitarenge gosasima. 7Oyomo obo nanyare gokoebereria osasime chinyasae chinde chi’abanto abwo bagoetanaine, bamenyete aare korwa asore, gose ang’e, korwa ensinyo eyemo y’ense goika eyende. 8Tobaisa koebererigwa nere, gose komotegerera, gose komororera amabeebe, nonya nokomororera amabera gose komoegera. 9Momoite akwe. Aye obe oyo bwe ritang’ani komoaka amagena; nyuma y’ayio abanto bonsi bamanye komoaka amagena. 10Momoake amagena goika akwe ekiagera aganetie kobasiria ng’a motige Omonene, Nyasae oino, oria obarusetie korwa ase ense ya Misiri, ense y’obosomba. 11Na Abaisraeli bonsi baigwe ayio akorekanire na bairoke, erinde obobe buna obwo tibokorwa ase egati yaino naende.
12“Ekero momenyete ase emechie yaino, eyio Omonene oino abaeire, ande namoigwe 13ng’a abanto bande ababe batarochi inchera barure ase egati yaino, bang’usire abanto b’omochie obo, na kobasiria, bagoteba: Inchuo togende gosasima chinyasae ching’ao konya motana gosasima rinde. 14Mouna‐unie mono amang’ana ayio, erio momanye buya gose nabo are. Onye okogechia buna okwo gwakorekanire ase egati yaino, 15moite abanto bonsi b’omochie oyio nemioro. Mosarie omochie oyio kegima amo nebinto bionsi bireo, ne chitugo mochiite boigo. 16Mosangererie ebisakorwa bi’omochie oyio, mobibeke bibe etui agwo ase eraaro aarabu, erio mosambe nomorero omochie amo nebisakorwa bionsi, bibe ekeng’wanso ekegima ki’ogosambwa ase Omonene, Nyasae oino. Noro obe ritombe goika kare na kare, tokoagachwa naende. 17Timobaisa koira gento kende gionsi keragereirie. Erio nario Omonene aratige endamwamu yaye enene, erinde abarorere amabera. Ere igo arabe namabeebe asemore, abakore momentekane, buna arierete chisokoro chiaino eira. 18Ayio nigo arakoreke onye mokoigwera Omonene, Nyasae oino, na kobwata amachiko aye onsi, aya inche nabaeire ase rituko ria rero, na komorakore ayare amaronge ase obosio bw’Omonene, Nyasae oino.
Currently Selected:
OKOIRANERERA 13: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
