OKOIRANERERA 12
12
Ogosasima gokorerwe aase aamo oka
1“Aya naro amachiko na emeroberio echikire moraigwere na gokora ase ense eyio Omonene, Nyasae bwe chisokoro chiaino, agochia kobaa ebe eyaino. Ase amatuko onsi morabe momenyete ase ense mobe mokoyaigwera. 2Ekero moraike ase ense eria y’ebisaku na koyeira, rirorio mosarie kegima aase onsi ase biarenge gosasimera chinyasae chiabo, kerabe ase ebitunwa ebitambe, gose ase ebigoro, gose inse y’emete emebese. 3Motagore ebisasimero biabo, mobutore chisiiro chiabo bagosasima, mosambe nomorero emete y’Asera, enyasae yabo enkungu, mogeche na koiyeria emegwekano ye chinyasae chiabo ebachire. Mosirie amarieta e chinyasae echio chiebwe kegima, tichisasimwa naende aase agwo.
4“Ekero mogosasima Omonene, Nyasae oino, timobaisa gokora buna abanto abwo bagokora. 5Omonene, Nyasae oino, nachore aase aamo oka korwa ase ebisaku biaino bionsi, na aroro agwo nabeke erieta riaye, na obomenyo bwaye nao agwo borabe. Aase agwo nao inwe morarigie mogendeo. 6Agwo nao morarente ebing’wanso biaino bi’ogosambwa, na ebing’wanso binde, na ensemo yaino ya ikomi, na okoruegwa mokorenta, na ebi mwarierete Omonene eira komoruera, na okoruegwa kwaino kw’ogwancha, ne chintangi chiaino chie chiombe, ne ching’ondi, ne chimbori. 7Agwo nao morabiriere ase obosio bw’Omonene, Nyasae oino, nainwe namobe nomogoko amo nabanto be chinka chiaino, ase ebitoki bionsi moranyore ase emeremo yaino, ekiagera Omonene, Nyasae oino, obasesenirie.
8“Ase ekero keria timobaisa gokora buna togokora bono aiga. Kera omonto nigo agokora buna aroche omonyene ng’a mboronge. 9Inwe timoraika ase morabe nobotoereru na ase ense eria Omonene, Nyasae oino, agochia kobaa ebe omwando oino. 10Korende ekero moramboke Yorodan na komenya ase ense eria Omonene, Nyasae oino, agochia kobaa ebe omwando oino, naende ekero arabae obotoereru korwa ase ababisa baino bonsi babaetanaine, erio inamomenye ase omorembe ase motabe nobwoba. 11Aase agwo Omonene, Nyasae oino, arachore abe obomenyo bw’erieta riaye, nao morarente ebinto bionsi nabachikire: ebing’wanso biaino bi’ogosambwa, na ebing’wanso binde, na ensemo yaino ya ikomi, na okoruegwa konde morarente, na ebiegwa mwarierete Omonene eira komoruera. 12Na aroro agwo mogoke ase obosio bw’Omonene, Nyasae oino, amo nabana baino, abamura na abaiseke, na Abalawi bamenyete amo nainwe ase emechie yaino, ekiagera Abalawi tibabwati egetari gose omwando bw’orogongo amo nainwe. 13Mwerende mono, timobaisa koruera ebing’wanso biaino bi’ogosambwa aase aande onsi mokorora na gochora inwe abanyene. 14Korende moruere ebing’wanso biaino bi’ogosambwa aase aria Omonene arachore korwa ase orogongo rw’ebisaku biaino; agwo nao morakorere aya onsi nabachikire.
15“Korende agwo ase emechie yaino nabo moranyare konyenya ching’iti chiaino na koria chinyama buna moganetie koreng’ana buna Omonene, Nyasae oino, abasesenirie. Onde bwensi, oyo otachenegeti na oyo ochenegete, nabe ne ribaga ri’ogochiria buna mokoria chinyama chie chingabi, na echie chinsune. 16Korende timobaisa koria amanyinga; goika moyaitere ase riroba buna amache. 17Agwo ase momenyete ase emechie yaino timobaisa korierao ensemo ya ikomi y’endagera yaino, gose ey’edivai, gose ey’amaguta ’amazeituni, gose chintangi chiaino chie chiombe, ne ching’ondi, ne chimbori, gose ebi mwarierete Omonene eira komoruera, gose okoruegwa kwaino kw’ogwancha, gose okoruegwa konde gwonsi. 18Korende moriere ebinto ebio ase obosio bw’Omonene, Nyasae oino, agwo aase arachore. Mobirie inwe amo nabana baino, abamura na abaiseke, na abasomba baino, abamura na abaiseke, na Abalawi bamenyete amo nainwe ase emechie yaino. Na igo mogoke ase obosio bw’Omonene, Nyasae oino, ase kera egento morabe mogokora. 19Timobaisa gotiga gokonya Abalawi ase chingaki chionsi moragenderere komenya ase ense yaino.
20“Ekero Omonene, Nyasae oino, arabagareerie orogongo rwaino buna abarierete eira, nainwe mokwane: Natorie chinyama, ekiagera more abatoonu b’okogania chinyama, nabo morarie chinyama, morie chinyinge buna moraganie. 21Aase agwo Omonene, Nyasae oino, arachore kobeka erieta riaye, karabe aare nase momenyete, nabo moranyare konyenya eng’iti ende yonsi ye chiombe chiaino, gose chimbori, gose ching’ondi, echio Omonene abaeire, buna nabachikire. Naboigo morarie chinyama chinyinge buna moraganie, ekero more agwo ase emechie yaino. 22Onde bwensi, oyo otachenegeti na oyo ochenegete nabe ne ribaga ri’okoria chinyama echio, nigo morachirie buna chinyama chie chingabi gose echie chinsune chikoriegwa. 23Mwerende timobaisa koria amanyinga, ekiagera obomoyo nigo bore ase amanyinga ime, timoria, obomoyo amo nenyama. 24Timoyaria, korende nigo morayaitere ase riroba buna amache. 25Mwerende, timoyaria. Ekero morakore ayare amaronge ase obosio bw’Omonene nigo erabe buya asemore na ase ororeria rwaino. 26Ebinto biaino moraatanane bibe ebichenu amo nebi mwariete chiira ng’a mobirue, mobiire aase agwo Omonene arachore. 27Morue ebing’wanso biaino bi’ogosambwa, chinyama amo namanyinga, igoro ase egesasimero ki’Omonene, Nyasae oino. Amanyinga ’ebing’wanso biaino binde, moyaumore igoro ase egesasimero ki’Omonene, Nyasae oino, korende chinyama chirochio morie. 28Moigwere amang’ana aya onsi nabachikire, erio nario erabe buya asemore, na ase ororeria rwaino kare na kare; ekiagera ekero morakore igo, obwo nabwo oboronge na amaya ase obosio bw’Omonene, Nyasae oino.
Ogokurerwa kw’ogotasasima emegwekano y’ogosasimwa
29“Omonene, Nyasae oino, naserie korwa ase amasio aino abanto b’ebisaku ebio mogochia koira ense yabo na koyemenya. Nyuma Omonene kabasiririe, 30mwerende timobaisa gotegwa nemeeto na kobwatia chingencho chiabo banarete gokora. Timorigia komanya igoro ye chinyasae chiabo na koboria: Naki ebisaku ebi biarenge gosasima chinyasae chiabo? Naboigo naintwe tochisasime. 31Timobaisa gosasima Omonene, Nyasae oino, buna barabwo barenge gosasima chinyasae chiabo. Barabwo nigo barenge gokora ase chinyasae chiabo kera egento kere okogechia, eke Nyasae agechete. Nigo bagosamba nomorero abana babo, abamura na abaiseke, babe ebing’wanso ase chinyasae chiabo.
32“Kera ring’ana nabachikire moribwate na korikora. Timomenta amang’ana aino ase ayio nabachikire, gose timorusia egento korwao.
Currently Selected:
OKOIRANERERA 12: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
