OKOIRANERERA 11
11
Obonene bw’Omonene
1“Ase igo bono mwanche Omonene, Nyasae oino, botambe mobwate aya achikire, na emeroberio yaye echikire, na amachiko aye onsi. 2Ase rituko ria rero inyora buna Omonene, Nyasae oino, akobaa egesusuro ase okobarongeyia. (Tindi gokwana ase abana baino, baria bataramanya gose batararora amang’ana ayio.) Inyora obonene bwaye na okoboko kwaye kore ne chinguru koramboire, 3na ebikone biaye, na ogokora kwaye okwo akorete agwo Misiri ase Farao omoruoti, na ase abanto b’ense yaye. 4Inyora naende buna akorete ase abarwani b’esegi ba Misiri, ne chibarasi chiabo, ne chigari chiabo, na buna atigete amache ’Enyancha Embariri akabamera, ekero barenge kobabwatia inwe, na buna basirete tibana kororekana goika rero iga. 5Momanyete buna Omonene abakorerete, ekero mwarenge ase erooro, goika mogacha aase aa. 6Moinyorete buna akorete Datani na Abiiramu, abana b’Eliabu, ab’ororeria rwa Reuben. Ase amasio ’Abaisraeli bonsi riroba rikabwereka, rikabamera, amo ne chiamate chiabo, ne chiema, ne chitugo, na abwo bonsi bababwatetie. 7Inwe mwaroche namaiso aino emeremo yonsi emenene Omonene akorete.
Ogosesenigwa gw’ense eria Abaisraeli barieretwe eira koegwa
8“Mobwate amachiko onsi ayio inche nkobaa rituko ria rero; erio nario morabe ne chinguru, erinde mosoe ase ense eria mogochia koira, ebe eyaino, 9naende amatuko aino anyare koba amange ase ense eria Omonene arierete chisokoro chiaino eira ng’a nayee barabwo na ororeria rwabo, ense entenenku ere namabeere na amooke. 10Ense eria mogochia gosoa moyeire teri buna ense ya Misiri agwo ase mwarwa. Aroro nigo mwarenge kobusura chimbusuro chiaino, naende mwakora emeremo y’ogosiarera amache, buna mogosiarera amache ase egeticha gie chinyeni. 11Korende ense eria mogochia gosoa moyeire nigo ere ense y’ebitunwa na amagoko, ense ekonyora embura egotwa korwa igoro. 12Omonene, Nyasae oino, nigo agwechandera ense eyio. Amaiso ’Omonene, Nyasae oino, botambe nigo ayerigereretie korwa omochakano bw’omwaka na goika omoerio oye.
13“Komoraigwere amachiko aya nabaeire rituko ria rero, erinde mwanche Omonene, Nyasae oino, na komokorera ne chinkoro chiaino chionsi, na emioyo yaino yonsi, 14rirorio ere nabatwerie embura ase ense yaino ase engaki egwenerete, embura ye ritang’ani na ey’okwamia endagera nainwe monyore endagera, na edivai, na amaguta ’amazeituni. 15Nabae obonyansi ase ebitii ase chitugo chiaino chikorisia. Inwe nigo moranyore endagera mokoria, moigote. 16Mwerende mono chinkoro chiaino tichibang’ainereria. Timobaisa gotiga Omonene na gokorera chinyasae ching’ao, na gochisasima. 17Moise komotiga rirorio endamwamu yaye nigo erabe enene asemore, erinde asieke igoro, embura tetwa, na ense etige kwama, nainwe mokwe mosire ara rimo rioka timobao ase ense eria engiya Omonene agochia kobaa.
18“Amang’ana aya aane moyagache ase chinkoro chiaino ime, na ase ebirengererio biaino. Moyasiberanie ase amaboko aino na moyabeke ase amasio aino igoro, abe amariko akobainyoria. 19Moyorokererie abana baino, mobe mokona‐koyairanerera ekero moikaransete ase chinyomba chiaino, na ekero more ase orogendo, na ekero mogochia korara, na ekero mokoboka. 20Moyarike ase emetobwa na ase emeriibo y’ebisieri bie chinyomba chiaino, na ase ebiita biaino. 21Erio nario inwe amo na abana baino moramenye amatuko amange ase ense eria Omonene arierete chisokoro chiaino eira ng’a nabayee ebe eyabo. Nigo moragenderere komenyao ase engaki koreng’ana buna igoro egendererete koba igoro y’ense.
22“Komoraigwere na gokora amachiko aya onsi nabaeire, erinde momwanche Omonene, Nyasae oino, naende motaare ase chinchera chiaye chionsi, na momobwatie, 23erio Omonene naserie ebisaku ebi bionsi bire ase amasio aino, na inwe namonyare koira ense y’ebisaku bire ebinene, naende bire ne chinguru kobabua inwe. 24Aase ande onsi morataare namagoro aino nabe aaino. Orogongo rwaino nigo rorachakere ase erooro ya irianyi na roikere Lebanoni, ensemo ya sugusu, naende rochakere orooche rwa Eufarati ensemo ya moocha na roikere Enyancha Enene ya bosongo. 25Omonto onde tari oranyare kobarwania na kobabua, ekiagera Omonene, Nyasae oino, nakore abanto babairoke inwe ase ense yonsi ase moraete. Naboigo abarierete eira.
26“Naama! Rituko ria rero nabekire ase amasio aino ogosesenigwa na okoragererigwa. 27Nigo moranyore ogosesenigwa komoraigwere amachiko ’Omonene, Nyasae oino, aya nkobachika rituko ria rero, 28korende monyore okoragererigwa komoraange koigwera amachiko ’Omonene, Nyasae oino, gose komoraonchoke korwa ase enchera eye nkobachika rituko ria rero. Timobaisa gosasima chinyasae chinde ching’ao, echio motamanyete agwo ritang’ani. 29Ekero Omonene, Nyasae oino, arabaikie ase ense eria mokogenda koira, mokwane ogosesenigwa korwa ase egetunwa kia Gerisimu na okoragererigwa korwa ase egetunwa ki’Ebali. ( 30Buna momanyete, ebitunwa ebio bibere nigo bire bosongo y’orooche rwa Yorodan, ase Enchera ya Bosongo ase orogongo rw’Abakanani, baria bamenyete ase Ekerubo Ekiomo kororia Giligali, ang’e nemete eria enga buna emetontera agwo More.) 31Bono mwabeire ang’e kwamboka Yorodan, mogende koira ense eria Omonene, Nyasae oino, agochia kobaa. Ekero morabe mwayeirire na koyemenya, 32mwerende na mobwate amachiko na emeroberio yonsi echikire, aya nabekire ase amasio aino rituko ria rero.
Currently Selected:
OKOIRANERERA 11: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
