OKOIRANERERA 10
10
Musa okoegwa amachiko naende
(Okong’ 34:1–10)
1“Erio naende Omonene agakwana nainche, agantebia: Baacha chibao chi’amagena ibere chire buna chiria chie ritang’ani. Oroisie na Esanduku ye chibao chi’emete. Erio otiire gocha aa asende egetunwa igoro. 2Inche nindike ase chibao echio amang’ana aria aria arenge ase chibao chiria chie ritang’ani gwatete, naye ochibeke ime y’Esanduku eria.
3“Erio nkaroisia Esanduku ye chibao chi’omokonge, na nkabaacha chibao chi’amagena ibere chiagwekaine chiria chie ritang’ani; nkabogoria chibao chiria ibere ase okoboko kwane, ngatiira gochia ase egetunwa igoro. 4Omonene akarika ase chibao chiria amang’ana aria aria arigete engaki eria entang’ani, amachiko ikomi aria konya akwanire nainwe agwo ase egetunwa, korwa ase egati‐gati y’omorero, ase rituko riria mwasangererekanete aroro. Erio Omonene akang’a chibao chiria, 5nainche nkeonchora, ngatirimboka korwa ase egetunwa, nkabeka chibao chiria ime ase Esanduku eria konya naroisirie buna Omonene anchigete; nao chire goika rero iga. 6(Abaisraeli bakaimoka bakagenda orogendo rwabo korwa Beeroti‐Bene‐Yakani, bagaika Mosera. Haroni agakwera aroro na agatindekwao. Eleazari, omomura oye, akaba omokuani ribaga riaye. 7Bakarua aroro, bakagenda bagaika Gudigoda, naende bakarua Gudigoda, bakagenda bagaika Yotibata, ense yabwate ebirooche ebinge. 8Ase engaki eria Omonene agaatanana abanto b’egesaku kia Lawi babe bakobogoria Esanduku eria ere ne chibao chirikire okobwatana kw’ogotianania kw’Omonene, naende akabakora bakaba bagotenena ase obosio bw’Omonene komokorera, na gosesenia abanto ase erieta riaye. Naboigo bagokora goika rero iga. 9Ase engencho eyio Abalawi tibaetwe omwando bw’orogongo amo nabanto bamwabo. Omonene nere omwando obo, buna Omonene, Nyasae oino, abatebetie.)
10“Nkagenderera kobeera igoro ase egetunwa ase engaki y’amatuko emerongo ene, omobaso na obotuko, buna ekero keria kie ritang’ani, na Omonene akanyigwa ase engaki eyio boigo, agatiga tabasiria. 11Erio agantebia: Imoka ochake orogendo, otang’ane abanto abwo, erinde bagende koira ense eria narierete chisokoro chiabo eira ng’a nimbayee.
Aya Nyasae aganetie
12“Inwe Abaisraeli, ngento ki Omonene, Nyasae oino, aganetie korwa asemore? Goika moiroke Omonene, Nyasae oino, momoigwere na kobwatia chinchera chiaye chionsi; momwanche na komokorera Omonene, Nyasae oino, ne chinkoro chiaino chionsi, na emioyo yaino yonsi. 13Mobwate amachiko aye, na emeroberio yaye echikire, eyio nkobaa ase rituko ria rero, erinde ebe buya asemore. 14Rigereria, igoro ney’Omonene, Nyasae oino, na igoro ya igoro mono neyaye boigo, na ense na ebinto bionsi bireo nebiaye. 15Korende Omonene nigo ang’usegete ne chisokoro chiaino na gochiancha, na nyuma yabo akabachora inwe, ororeria rwabo, ase egati y’ebisaku binde. Naboigo more abaye goika rero iga. 16Ase ayio, arokia chinkoro chiaino na motige koba abanyabigoti bikong’u. 17Omonene, Nyasae oino, nere Nyasae oyobuete chinyasae, na Omonene bw’abanene, nere Nyasae bw’obonene, na bw’okobua, na bw’okoirokia; tari nogwanchereria, na tari gwancha riaaki. 18Nigo akonacha ekina kia boronge ase chintakana, na ase ababoraka; ere nigo anchete omomenyi, amoa endagera ne chianga. 19Ase ayio ancha abamenyi, ekiagera nainwe nabo mwarenge abamenyi ase ense ya Misiri. 20Moiroke Omonene, Nyasae oino, momokorere ere bweka. Momobwaterere mono, naende mobe mogotiana ase erieta riaye rioka. 21Ere nere ogotogia kwaino, nere Nyasae oino, okorire ebinto ebinene na amakumia asemore, ebio mwarorire. 22Chisokoro chiaino chiria chiatirimbogete gochia Misiri nigo chiarenge abanto emerongo etano na ebere, na bono Omonene, Nyasae oino, obamentekanirie, mwabeire abange buna ching’enang’eni chia igoro.
Currently Selected:
OKOIRANERERA 10: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
