2 SAMWELI 21
21
Abanto b’ororeria rwa Saulo bagoitwa
1Ase engaki y’obogambi bwa Daudi enchara nigo yarenge koba omwaka ase omwaka, ase engaki y’emiaka etato, na Daudi akaboria Omonene igoro y’ayio. Omonene akamoiraneria, “Ayio igo agokoreka ase engencho ya Saulo na enyomba yaye, ekiagera baiterete amanyinga ’abanto; ere naitete Abagibeoni.” 2Daudi akarangeria Abagibeoni. (Barabwo tibarenge Abaisraeli; nigo barenge ekeombe giatigarete korwa ase Abaamori, na Abaisraeli konya babariereire eira ng’a babatige babe moyo, korende Saulo akarigia kobaita ase omokia oye, ase engencho y’Abaisraeli na Abayuda.) 3Daudi akaboria Abagibeoni, “Ninki nkobakorera? Nindigetie gokora okobwatanigwa ase engencho y’obobe mwakoreretwe, erinde mosesenie abanto b’Omonene.”
4Abagibeoni bakamoiraneria, “Titorigeti chifeta gose chitahabu korwa ase Saulo, gose korwa ase eamate yaye; intwe titorigeti goita omonto onde bwensi ase Abaisraeli.”
Daudi akababoria, “Ninki rende nkobakorera?”
5Barabwo bakairaneria omoruoti, “Omonto oria akarigia gotosiria kegima ng’a titomenya ase Abaisraeli. 6Ase ayio, tiga toegwe abamura batano na babere b’ororeria rwaye, erinde tobasunge ase obosio bw’Omonene aiga Gibea aase Saulo, omochore bw’Omonene, amenyete.”
Omoruoti akabairaneria, “Nimbarue.”
7Omoruoti agatiga Mefiboseti, mosinto o Yonathani o Saulo, ase engencho y’eira Daudi na Yonathani barierereranete ase Omonene, 8korende akairera Arimoni na Mefiboseti, abana abamura babere abwo Risipa, omosubati o Aya aiborerete Saulo. Naende akairera abamura batano, aba Mikali, omosubati o Saulo, aiborerete Adirieli, mosinto o Barisilai Omomehola. 9Akababeka ase amaboko ’Abagibeoni, na barabwo bakabasunga ase egetunwa igoro, ase obosio bw’Omonene. Bonsi batano na babere bagaiterwa amo. Bagaitwa ase amatuko amatang’ani e rigesa, ekero bachakire kogesa endagera ekorokwa esairi.
10Erio Risipa, mosubati o Aya, akaira chianga chie chigunia agachiaara ase egetare keria, akabeerao korwa omochakano bwe rigesa goika embura ekorwa igoro egachaka gotwera emebere y’abwo basungetwe, gose tatigete chinyoni chigwe ase emebere eyio mobaso, gose ching’iti chi’orosana chichicheo botuko.
11Ekero Daudi atebetigwe ayio Risipa, mosubati o Aya, omokungu o sere‐sere o Saulo akorete, 12akagenda akoyia amauga a Saulo na aya Yonathani, momura o Saulo, korwa ase abanto ba Yabesi o Gileadi. (Abanto abwo konya baibire emebere eyio korwa ase ekeooreri agwo Bati‐Sani aase Abafilisti babasungete, aase rituko riria baitete Saulo aaria Giliboa.) 13Daudi akarenta amauga a Saulo na aya Yonathani, momura o Saulo; boigo agasangereria amauga ’abanto baria batano na babere konya batongirwe. 14Erio bagatindeka amauga a Saulo na aya Yonathani, omwana oye, ase ense ya Benjamin, aaria Zela, ase embeera ya Kisi ise. Barabwo bagakora onsi aya omoruoti achigete. Nyuma y’ayio Nyasae akaigwa aya basaberete ense eria.
Esegi igoro y’amamonto ’Abafilisti
(1 Am ’Eb 21:1–27)
15Esegi ekaba naende ase egati y’Abafilisti na Abaisraeli, na Daudi agatirimboka amo nabarwani baye korwania Abafilisti. Daudi akaba orosire, 16na Isi‐Benobu, oyomo bw’amamonto, nabwate ritimo riare noborito bwe chikiro isato na ekeng’ese, naende nabwate omoro omoyia; ere akarigia goita Daudi. 17Korende Abisai, omomura bw’omokungu Seruya, akamotooria, agaita Omofilisti oria. Erio abanto ba Daudi bagakania Daudi na gotiana ng’a, “Aye bono togosoka na kogenda ase esegi amo naintwe; aye nigo ore etaya y’Abaisraeli, toyerimia.”
18Nyuma y’ayio esegi yarenge n’Abafilisti aria Gobu, na Sibekai Omohusa agaita Safu, oyomo bw’amamonto.
19Esegi ende yarenge n’Abafilisti agwo Gobu. Elihanani, mosinto o Yaare‐Oregimu korwa Bethlehemu, agaita Goliato korwa Gati. Orotanga rwe ritimo ria Goliato nigo rwarenge buna omwaro omonene.
20Naende esegi yarenge Gati. Omonto omotambe narengeo. Nigo arenge nebiara bitano na ekemo ase kera okoboko, na bitano na ekemo ase kera okogoro; bionsi nigo biarenge emerongo ebere na bine. Ere boigo noyomo bw’amamonto orenge. 21Ere akarama Abaisraeli, na Yonathani, momura o Simea omwabo Daudi, akamoita.
22Abanto abwo bane nigo barenge ab’ororeria rw’amamonto korwa Gati. Barabwo nigo baitetwe na Daudi na abanto baye.
Currently Selected:
2 SAMWELI 21: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
