2 SAMWELI 20
20
Ogosaria gwa Seba
1Ekaba ng’a narenge agwo Giligali omonto omoomboganu, ore korokwa Seba, mosinto o Bikiri bw’egesaku kia Benjamin. Ere akabugia egetureri, akabora, “Ngetari ki tobwate ase Daudi? Titori nomwando na mosinto o Yese! Inwe Abaisraeli, genda kera omonto bwoye!” 2Ase igo Abaisraeli bonsi bagatiga Daudi, bakabwatia Seba, mosinto o Bikiri; korende Abayuda bakabwatia omoruoti obo korwa Yorodan goika Yerusalemu.
3Ekero Daudi aigete inka bwoye agwo Yerusalemu, akaira abakungu baye ikomi ba sere‐sere, abwo atigete bakorenda enyomba, akababeka aase baranyare korendwa, akaba okobarageria, korende tachiete koba nabarabwo. Barabwo bakaba basiekeire aase agwo ase amatuko onsi barenge moyo, bakaba bakomenya buna ababoraka.
4Omoruoti agatebia Amasa, “Rangeria Abayuda bache asende ekero amatuko atato ataraera; naye obe aiga ase engaki eyio.” 5Amasa akagenda kobarangeria, korende agateba na, tairana ase engaki eria omoruoti, amobekerete. 6Daudi agatebia Abisai, “Bono Seba, mosinto o Bikiri, nigo agochia gotorentera emechando kobua eria Abisalomu atorenterete. Ira abasomba baane momobwatie, erinde tabaisa kwenyorera emechie ye chindwaki na gotokora bobe mono kobua.” 7Erio abanto ba Yoabu, na Abakereti, na Abapeleti, ne chituoni chionsi, bagatunyana Abisai, bakarua Yerusalemu bakabwatia Seba, mosinto o Bikiri, bachie komobwata. 8Ekero baigete ase rigena rinene agwo Gibeoni, Amasa agachia kobarotota. Yoabu nigo abegete chianga chiaye chi’esegi, na nigo eboeranetie omoyio o birende ase orokini. Ekero are gocha, omoyio oria okagwa inse. 9Yoabu agakwania Amasa, “Mbuya ore oyominto?” Erio akamobwata chinderu nokoboko gw’okorio buna nigo arigetie komonyunyunta. 10Amasa teritete korwa ase omoyio oria Yoabu abwate koboko kwaye. Ase igo Yoabu akamobeta omoyio oria enda, na amara akagwa inse. Erio agwo Amasa agakwa, na Yoabu tamoaka eria kabere.
Nyuma y’ayio Yoabu na Abisai, momura omwabo, bakabwatia Seba, mosinto o Bikiri, gochia komoita. 11Oyomo bw’abasomba ba Yoabu agatenena ang’e nomobere bw’Amasa akabora, “Oyo omwanchete Yoabu na oyore o Daudi, tiga atunyane Yoabu.” 12Na Amasa igo arenge kogara‐gara ase amanyinga, gati‐gati y’enchera enene. Ekero omosomba oria aroche ng’a abanto bonsi batenenire, akaimokia omobere bw’Amasa korwa inchera, akayoruta mogondo ime, akayobisia egetambaa. 13Ekero arusetigwe inchera, abanto bonsi bagaeta, bagatunyana Yoabu, erinde babwatie Seba, mosinto o Bikiri, gochia komoita.
14Seba agaeta egati ye chingongo chi’ebisaku bionsi bi’Abaisraeli, agaika omochie o Abeli Beti‐Maaka, na Ababeri bonsi bagasangererekana amo, bakamotunyana. 15Abanto bonsi abarenge na Yoabu bagacha Abeli Beti‐Maaka, bakamonaaria, bakaagacha eburi bosio bw’omochie kororia orwaki, na abanto bagachaka gotagora orwaki ng’a baroiyerie inse. 16Erio omokungu gete omong’aini akarangeria korwa ase orwaki rw’omochie, agateba, “Tegerera, tegerera! Tebia Yoabu ache aiga ang’e, nkwane nere.”
17Yoabu agasuka gochia ang’e asare, na omokungu oria akamoboria, “Naye Yoabu?”
Akairaneria, “Ee, ninche.”
Omokungu oria akamotebia, “Tegerera amang’ana aane, inche omosomba oo omokungu.”
Yoabu akairaneria, “Nintegererete.”
18Erio omokungu oria akamotebia, “Agwo kare abanto nigo banarete goteba: Genda Abeli, omochie oyio, erinde onyore ogosemigwa; ayio naro arenge gokoora amang’ana abo. 19Intwe nigo tore abanto b’omorembe na abegenwa ase Abaisraeli. Inee! Aye nigo origetie gosiria omochie oyo ore ng’ina ase egati y’Abaisraeli? Nase ki oganetie gosaria omwando bw’Omonene?”
20Yoabu akamoiraneria, “Ayio tiga abe are nainche; timbaisa gosaria omochie na koyosiria. 21Oyio tari oro omoroberio oito, korende omonto oyomo bw’ense y’ebitunwa y’Efraimu, Seba, mosinto o Bikiri, oimokire koba mamincha y’omoruoti Daudi. Mosokie, nainche indue aa ase omochie oyo!”
Omokungu oria akamoiraneria, “Rigereria, noruterwe omotwe oye ase orwaki igoro.” 22Erio omokungu oria akaebereria abanto bonsi ase chisemi, na barabwo bakabutora Seba, mosinto o Bikiri, omotwe, bakayoruta gochia isiko ase Yoabu. Erio Yoabu akabugia egetureri, na abanto bonsi bagaserebekana; kera omonto akagenda bwoye. Na Yoabu akairana Yerusalemu ase omoruoti.
Abakoreri ba Daudi
23Yoabu nigo arenge omochiki bw’abarwani bonsi b’esegi ase Abaisraeli, na Benaya, mosinto o Yehoyada, nere igo arenge igoro y’Abakereti na Abapeleti. 24Adorama nigo abegetwe koba omoteneneri bw’emeremo ende yonsi. Yehosafati mosinto bw’Ahiludi, nigo arenge omoriki bw’amang’ana are gokoreka. 25Sheva nomoriki orenge, na Zadoki na Abiatari nabakuani barenge. 26Amo nayio Ira Omoyairi nigo arenge omokuani ase Daudi.
Currently Selected:
2 SAMWELI 20: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
