2 SAMWELI 22
22
Ogotera gw’okobua
1Oko nogotera Daudi atererete Omonene, ekero Omonene amotooretie korwa ase amaboko ’ababisa baye na aya Saulo. 2Agateba:
“Omonene nere egetare kiane na eburi yane enkong’u;
nere Omotooria one.
3Nyasae one nere egetare kiane, asare nao nyebisete,
ere nenguba yane enkengerete,
na orogunchara rwane rwandeterete ogotooreka,
naende nere eburi yane enkong’u, na obotamero bwane.
Ere n’Omotooria one, oyogontooria korwa ase obotindi.
4Nindangerie Omonene, oyo ogwenerete gotogigwa,
nigo arantoorie korwa ase ababisa baane.”
5“Emerindo y’amakweri konya yang’etananire,
chiooro chi’obobe chikandetera obwoba.
6Obobe bw’amakweri nigo bwang’etananete,
emeeto y’amakweri egantega na kombwata.
7Ase emechando yane nkarangeria Omonene;
nkarera ase Nyasae one.
Korwa ase Hekalu yaye akaigwa eriogi riane,
ekerero kiane gekamoikera, ere agakeigwa.”
8“Erio ense ekanyegerigwa na koondoka,
amaroso a igoro agatengechigwa.
Ee, ense ekaiguswa,
ekiagera Omonene arenge nendamwamu.
9Erioki rigasoka korwa ase chimioro chiaye,
na omorero ogosamba korwa ase omonwa oye:
ee, omorero bw’amakara ogasoka korwa asare.
10Akang’usa igoro gocha inse aa, nere agacha,
riire rimwamu rikaba inse y’amagoro aye.
11Akariina omokerubi, akairuruka;
akarorekana igoro ye chimbaba chi’embeo.
12Agetuba ere omonyene nomosunte,
na amare amarito aichire amache.
13Korwa ase obomeka‐meku obwo bwarenge bosio bwaye
okomesa gokaruta ebibemberi bi’omorero.”
14“Omonene agaaka enkoba korwa igoro,
na eriogi ri’Oyore Igoro Mono rikaigugwa.
15Akaruta emegwe, agaserebania ababisa baye,
akabaaka nokomesa.
16Erio ebiambokero bi’enyancha bikarorekana,
na oboroso bw’ense bokaorokigwa aarabu,
ekero Omonene abatogonyerete
ase okwoga kw’omoika bwe chimioro chiaye.”
17“Omonene akarambora okoboko kwaye korwa igoro, akambwata,
akandusia ase amache amange.
18Agantooria korwa ase ababisa baane bare ne chinguru,
na korwa ase abwo bangechete;
barabwo nigo barenge ne chinguru kombua.
19Ekero narenge nemechando bakandwania,
korende Omonene akaba egekengero kiane.
20Akang’ira aase arenge aagare,
agantooria, ekiagera namogogetie.”
21“Omonene nigo ang’ete eng’eria y’obuya, ekiagera inde omoronge;
nigo ansesenetie, ekiagera inde namaboko atari na komocha.
22Inche nabeire nkobwatia chinchera chi’Omonene,
tintigeti Nyasae one ase ogokora amabe.
23Nabeire nkorenda amachiko aye onsi,
na timbeti ngotiga emeroberio yaye echikire.
24Nigo narenge omoikeranu asare,
nkerenda korwa ase obobe.
25Omonene ong’akanire, ekiagera ngokora ayare boronge,
na ekiagera aroche ng’a nomochenu inde.
26Aye Omonene nigo ore omwegenwa ase abwo bare abegenwa;
nigo okweorokia ng’a nomoikeranu ore ase abwo bare abaikeranu.
27Aye nigo ore omochenu ase abwo bare abachenu,
nigo okwanga abwo bare abakorekanu.
28Aye nigo ogotooria abanto bare abaitongo,
korende amaiso ao nigo arigereretie abare abaenenu
ase okobairania inse.”
29“Aye Omonene nigo ore etaya yane;
Omonene one, nigo okoonchora omosunte one oba omobaso.
30Konde amo naye, nigo ndasirie omoganda bw’esegi,
na ekero inde na Nyasae one nincharoke chindwaki igoro.”
31“Enchera ya Nyasae neng’ikeranu;
amang’ana aye ateemirwe na gotenena.
Ere nenguba ase bonsi abakomotamera.
32Inee! Ning’o ore Nyasae, otatiga Omonene?
Ning’o ore egetare, otatiga Nyasae oito?
33Nyasae nere eburi yane ye chinguru,
nigo akoraa omonto omoronge ase enchera agoeta.
34Ere okorire amagoro aane abeire buna ay’egesia,
onkong’irie na gontenenia ase ebitunwa.
35Ere bworokereirie amaboko aane korwana esegi, erinde amaboko
aane anyare gokumba obota bw’etaai.”
36“Aye kwang’eire enguba yao ase ogontooria,
na ogokonywa kwao gwankorire nabeire omonene.
37Kwang’eire aase aagare ngotaara,
na amagoro aane tagotererigwa.
38Nkabwatia ababisa baane, nkabasiria,
gose tinairanete goika nkabakoora.
39Nkabaaka inse nkabasenyenta, tibanyara koimoka,
bakagwa inse y’amagoro aane, bakabugwa.
40Aye nigo kwambegete chinguru chi’okorwana esegi;
okabeka ababisa baane inse y’amagoro aane.
41Ogaseria ababisa baane bagatama korwa asende,
abangechete nkabasiria kegima.
42Barabwo bakarigereria,
korende onde tarenge obatooretie;
bakarangeria Omonene,
korende ere tabaigwa.
43Nkabasunyunta bakaba ebuse ye riroba,
nkabamionogora na kobatiringa buna esike ere ase chinchera.”
44“Aye gwantooririe korwa ase okoamererania nabanto baane,
kwandendire nabeire omogambi bw’abanto b’ebisaku;
abanto ntamanyete, bono babeire abasomba baane.
45Abamenyi nigo bebegete inse yane,
na ekero baigure chinkuma chiane, banyigwera.
46Abanto b’ebisaku ebiaao berusirie moyo,
kobagosoka korwa ase chiburi chiabo, nigo bakoiguswa.”
47“Omonene nigo are moyo!
Ere oyore egetare kiane atogigwe!
Nyasae, egetare ki’ogotooreka kwane, aimokererigwe igoro.
48Nyasae nigo akonduseria egesiomba,
nabeke abanto b’ebisaku inse yane.
49Ere nigo antooretie korwa ase ababisa baane,
akanyimokereria igoro ase abare mamincha yane,
naende agantooria korwa ase abanto abatindi.”
50“Aye Omonene, ase ayio ningotogie ase egati y’abanto b’ebisaku,
ninterere erieta riao ase okoritogia.
51Nyasae ong’eire inche, omoruoti oye, obobui obonene,
oorokirie obwanchani botari koera asende, inche omoakwa amaguta oye,
inche Daudi, na ororeria rwane, goika kare na kare.”
Currently Selected:
2 SAMWELI 22: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
