2 SAMWELI 2
2
Daudi okoba omoruoti bw’Abayuda
1Nyuma y’ayio Daudi akaboria Omonene, “Inee! Ndagenda ase omochie onde bw’Abayuda inyoire?”
Omonene akamoiraneria, “Ee, genda.”
Naende Daudi akamoboria, “Norori?”
Omonene akamoiraneria, “Heburoni.” 2Ase igo Daudi agatiira gochiao amo nabakungu baye babere, Ahinoamu korwa Yesireeli, na Abigaeli, oyotigetwe omoboraka, orenge moka Nabali o Karimeli. 3Boigo akairana abanto baye bonsi amo ne chiamate chiabo komenya ase emechie ya Heburoni. 4Abayuda bagacha Heburoni, bagaaka Daudi amaguta akaba omoruoti igoro y’abanto b’egesaku kiabo.
Ekero Daudi atebetigwe ng’a abanto ba Yabesi o Gileadi nabwo batindegete Saulo, 5agatoma amang’ana gochia Yabesi o Gileadi gotebia abanto b’aroro, “Omonene abasesenie, ekiagera mwaorogetie obuya bwaino ase Saulo, omonene oino, ase okomotindeka. 6Omonene abaorokerie obwanchani bwaye botari koera, na obwegenwa bwaye. Nainche boigo nimbakorere amaya, ekiagera mwakora ring’ana erio. 7Ase ayio bono motenene bokong’u, mobe abaremu. Saulo, omonene oino, okure, na Abayuda bang’akire amaguta imbe omoruoti obo.”
Isi‐Boseti okoba omoruoti bw’Abaisraeli
8Bono Abineri, mosinto o Neri, orenge omotang’ani bw’abarwani ba Saulo. Ere konya oirire Isi‐Boseti, mosinto o Saulo, gochia Mahanaimu, 9akamobeka koba omoruoti igoro ase abanto ba Gileadi, na Asuri, na Yesireeli, na Efraimu, na Benjamin, na igoro ase Abaisraeli bonsi. 10Isi‐Boseti, mosinto o Saulo, konya okoorire emiaka emerongo ene ekero abegetwe koba omoruoti bw’Abaisraeli; akagamba ase engaki y’emiaka ebere.
Korende abanto b’egesaku kia Yuda bakaba bakobwatia Daudi. 11Ere akabagambera Abayuda agwo Heburoni ase engaki y’emiaka etano na ebere, na emetienyi etano nomo.
Esegi egati y’Abaisraeli na Abayuda
12Abineri, mosinto o Neri, na abasomba ba Isi‐Boseti, mosinto o Saulo, bakarua Mahanaimu, bakagenda ase omochie o Gibeoni. 13Yoabu, omomura bw’omokungu Seruya, na abanto ba Daudi bakagenda, bakaumerana nabarabwo ase ritibo ria Gibeoni. Abanto aba bakabeera ensemo eyemo ye ritibo riria, na abwo bande ensemo ende. 14Abineri agatebia Yoabu, “Tiga abamura baimoke bagosorie ase amasio aito.”
Yoabu agateba, “Tiga baimoke.”
15Erio bakaimoka, bakaroberia abanto ikomi na babere abatenenerete egesaku kia Benjamin na Isi‐Boseti, mosinto o Saulo, na abanto ikomi na babere abatenenerete Daudi. 16Kera oyomo akabwata omotwe bw’oyo riare koamererania, na komobeta omoyio ase rikere; bonsi bakagwa inse bagakwa. Ase ayio, aase aria a Gibeoni akarokwa Helikati‐Hasurimu.#2:16 Helikati‐Hasurimu, engencho yaye: omogondo bw’emioro
17Esegi ekaba entindi mono ase rituko erio, na Abineri na Abaisraeli bakabugwa nabanto ba Daudi. 18Abamura batato b’omokungu Seruya, Yoabu na Abisai, na Asaeli, nao barenge. Asaeli nigo arenge omominyoki mono buna egesia. 19Ere agachaka kobwatia Abineri, na ekero arenge komobwatia taonchogete gochia aande, ensemo ya borio gose eya bomosi. 20Abineri akeonchora, akamoboria, “Naye Asaeli?”
Ere akairaneria, “Ee, ninche.”
21Abineri akamotebia, “Gobera gochia ensemo ende, eya borio gose eya bomosi, obwatie omomura oyomo bw’abwo, oire ebirwanero biaye.” Korende Asaeli tancha koonchoka amotige. 22Abineri akamotebia eria kabere, “Gobera, tiga kombwatia. Nigo orabaise kogera ngoake nkobwateranie inse. Igo naki ndakore ng’oroke ase obosio bwa Yoabu omino?” 23Korende Asaeli akaanga kogobera. Ase igo Abineri akamobeta enda nesimisi y’orotanga rwe ritimo, na rirorio rigasokera omogongo oye. Asaeli agaaka inse, agakwera agwo aase arenge, Abanto bonsi abachete agwo ase Asaeli akwerete, bagatenenao.
24Korenge Yoabu na Abisai bakabwatia Abineri. Ekero erioba rigochia kogwa bagaika ekegoro ki’Ama, kerochie Gia, ase enchera ekogenda erooro ya Gibeoni. 25Abanto b’egesaku kia Benjamin bagasangerererkana amo ase okoegera Abineri, bakagenda ase ekegoro igoro, bagatenenao. 26Erio Abineri akarangeria Yoabu, akamoboria, “Inee! Nigo oganetie omoro oite abanto kogenderera botambe? Tomanyeti ng’a omoerio nobororo borabe? Nengaki eng’ana naki oraganye goika omanye gokania abanto bao tibabwatia abamwabo?”
27Yoabu akamoiraneria, “Ekeene, buna Nyasae are moyo, onye otakwana, abanto baane anga nigo barenge kobabwatia goika mambia.” 28Ase igo Yoabu akabugia egetureri, na abanto bonsi bagatenena, bagatiga kobwatia Abaisraeli, tibaba bakobarwania naende.
29Abineri na abanto baye bakagenda ase obotuko boria obogima goetera ase Ekerubo Ekiomo; bakaamboka orooche rwa Yorodan, bagaeta egati ya Bitironi, bagaika Mahanaimu.
30Yoabu akairana korwa ase okobwatia Abineri; na ekero asangereretie abanto bonsi amo, bakanyora ng’a abasomba ba Daudi ikomi na kianda tibaiyo; boigo Asaeli taiyo. 31Korende abanto ba Daudi konya baitire abanto b’egesaku kia Benjamin amagana atato, na emerongo etano nomo, abwo barenge amo n’Abineri. 32Abanto bakaimokia omobere bw’Asaeli, bakayoira bakayotindeka ase embeera ya ise agwo Bethlehemu. Erio Yoabu na abanto baye bakaba bare ase orogendo ase obotuko obogima, na ekero baikire Heburoni bokabakiera aroro.
Currently Selected:
2 SAMWELI 2: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
