2 SAMWELI 3
3
1Esegi ase egati y’eamate ya Saulo na eya Daudi ekaba ekogenderera ase engaki entambe. Daudi akagenderera komenteka chinguru chiaye, korende abanto b’eamate ya Saulo bakagenderera koba aboro goetania.
Abamura ba Daudi
2Aba nabwo abamura Daudi aiboreretwe agwo Heburoni: Aminoni nere orenge omwana oye omotangi, omwana bw’Ahinoamu korwa Yesireeli. 3Oyo o kabere Kileabu, omwana bw’Abigaeli, oyotigetwe omoboraka, orenge moka Nabali o Karimeli; na oyo o gatato Abisalomu o Maaka, mosubati o Talimai, omoruoti o Gesuri. 4Oyo o kane Adonia o Hagiti, na oyo o gatano Sefatia bw’Abitali; 5na oyo o gatano na rimo Iteramu bw’Egila, moga Daudi. Abamura aba nabwo Daudi aiboreretwe agwo Heburoni.
Abineri okobwatana na Daudi
6Ekero esegi eyio yagendererete ase egati y’eamate ya Saulo na eya Daudi, Abineri akagenderera kwenyorera chinguru chinyinge ase egati y’eamate ya Saulo.
7Saulo nabwate omokungu o sere‐sere ore korokwa Risipa, mosubati bw’Aya. Isi‐Boseti akaboria Abineri, “Nase ki mwamenyanire nomokungu o sere‐sere o tata?” 8Erio Abineri akaba nendamwamu enene ase engencho y’amang’ana ayio a Isi‐Boseti, akabora, “Inee! Inche nigo inde omotwe bw’esese korwa ase ense ya Yuda? Goika rituko ria rero ngendererete koba omwegenwa ase abanto b’eamate ya Saulo iso, na ase abamwabo, na ase abasani baye, ko tinakobeka ase okoboko gwa Daudi, na bono aye gwansoeire na gonkora koba nokomocha ase engencho y’omokungu oyo. 9Nyasae ang’e egesusuro ekenene onye tingoikeraneria Daudi aya Omonene amorierete eira amokore: 10Arusie oboruoti korwa ase enyomba ya Saulo, abobeke ase Daudi, na Daudi abe omoruoti, agambere Abaisraeli na Abayuda korwa Dani goika Beeri‐Seba.” 11Na Isi‐Boseti tanyara koiraneria Abineri ring’ana nonya nerimo, ekiagera amoirogete.
12Abineri agatoma abanto ase Daudi agwo Heburoni, akabora, “Ense eye neya ng’o? Kora okobwatana nainche, erio ngokonye na nkorentere Abaisraeli bonsi babwatane naye.”
13Daudi agatoma amairanerio, agateba, “Ayio namaya, ninkore bo. Korende ninganetie onkorere egento ekemo. Kogocha aa ondetere Mikali, mosubati o Saulo. Onye togokora bo, rirorio tokonyara kondora.” 14Erio Daudi agatoma abanto ase Isi‐Boseti, mosinto o Saulo, akabora, “Ing’iranerie Mikali mokane, oyio narierete boko, na ngaakana rigori ri’amasankwa a isiko ay’ebiimo bi’obosacha ay’Abafilisti rigana erimo, erinde imonyuome.” 15Erio Isi‐Boseti agatoma abanto barusie omokungu oria korwa ase Palitieli, omosacha oye, mosinto o Laisi. 16Korende omosacha oye akamotunyana goika Bahurimu okona‐korera. Erio Abineri akamotebia, “Irana!” Ere akairana.
17Agwo Abineri agakwana nabagaaka b’Abaisraeli, akabora, “Korwa ase chingaki chinde chiaetire mwabeire mokogania ng’a Daudi abe omoruoti oino. 18Gaki bono, kora bo, ekiagera Omonene nariete eira igoro ya Daudi, agateba: Nintoorie Abaisraeli, abanto baane, goetera ase okoboko gwa Daudi, omosomba one. Nimbarusie korwa ase amaboko ’Abafilisti, na korwa ase amaboko ’ababisa babo bande bonsi.” 19Abineri agakwana nabanto b’egesaku kia Benjamin boigo. Erio akagenda Heburoni, agatebia Daudi amang’ana ayio Abaisraeli na Ababenjamin bonsi banchete gokora asare.
20Ekero Abineri amo nabanto bande emerongo ebere baigete Heburoni ase Daudi, ere akabakorera omoyega. 21Abineri agatebia Daudi, “Nkogenda inde nsangererie Abaisraeli bonsi ase ensemo yao, aye omoruoti, omonene one, erio bakore okobwatana amo naye, erinde onyore eki kwaganetie, obagambere bonsi pi.” Ase igo Daudi akaa Abineri ribaga, na Abineri akagenda nomorembe.
Abineri ogoitwa
22Kobachiire, Yoabu agacha korwa ase achiete gosakora amo nabasomba ba Daudi, nabarabwo mbabwate ebisakorwa ebinge. Korende Abineri konya ochiire, tarenge amo na Daudi agwo Heburoni, ekiagera Daudi konya omoeire ribaga, nere ogendire nomorembe. 23Ekero Yoabu aigete amo nabarwani baye bonsi, ere agatebigwa ng’a Abineri, mosinto o Neri, nao arenge ase omoruoti, na omoruoti omoeire ribaga, ochiire ore nomorembe. 24Erio Yoabu akagenda ase omoruoti, akamoboria, “Ninki eke gwakorire? Naigwa ng’a Abineri nacha aiga asore. Naki gwakora kwamoa ribaga ogenda? 25Tomanyeti Abineri, mosinto o Neri? Ere igo acha aa gokong’aina, naende amanye chinsemo ase okogenda na ebinto ebi ogokora.”
26Yoabu karure ase Daudi agatoma abanto babwatie Abineri bamwoyie korwa ase engoro y’amache ya Sira, korende Daudi tamanyete amang’ana ayio. 27Ekero Abineri airanire Heburoni, Yoabu akamoira ensemo gati‐gati y’egeita, buna nigo arigetie gokwana nere bobisi, na agwo akamobeta ritimo enda goika agakwa. Nabo Abineri agaitwa ekiagera aitete Asaeli omwabo Yoabu. 28Ekero Daudi aigwete amang’ana ayio, akabora, “Omonene namanyete ng’a inche na abanto baane titori na komocha ase obosio bwaye ase ogoiterwa kw’amanyinga ’Abineri, mosinto o Neri. 29Tiga okomocha kw’ogoiterwa kw’amanyinga aye kobe igoro ya Yoabu, na igoro ase abanto b’eamate yaye: naende enyomba ya Yoabu teborwa omonto ogoiteka amache anga buna chimengere, gose oyore noborwaire bwa ukoma, gose oyo ogwesiirera enyimbo, gose oyo oraitwe nemioro, gose oyore omoremerwa bw’endagera.” 30Naboigo Yoabu na Abisai omwabo baitete Abineri, ekiagera ere aitete Asaeli omwabo ase esegi eria barwanete aaria Gibeoni.
Ogotindekwa kw’Abineri
31Erio Daudi agachika Yoabu amo nabanto bonsi barenge amo nere batandore chianga chiabo na beboyie chigunia, erinde bareere Abineri. Omoruoti Daudi nere omonyene agatunyana oborere kobobogoirie. 32Erio bagatindeka Abineri agwo Heburoni. Omoruoti akarera neriogi rinene agwo ase oboina bw’Abineri; na abanto bonsi bakarera. 33Omoruoti akaba okweumia igoro y’Abineri, okobora,
“Inee! Nabo Abineri agwenerete gokwa buna omonto omoriri?
34Aye Abineri, amaboko ao tasibetwe,
gose amagoro ao tare kobekwa chingataare.
Nigo kwagwa buna omonto ogoitwa nabakayayu.”
Naende abanto bonsi bakagenderera komoreera.
35Abanto bonsi bagacha koebereria Daudi arie endagera, korende Daudi agatiana, ogoteba, “Nyasae ang’e egesusuru bono na kogenderera onye nkoria endagera erioba ritaragwa.”
36Abanto bonsi bakarora ng’a ayio nigo abagweneire buna amang’ana onsi omoruoti are gokora abagwenerete. 37Ase rituko riria Abaisraeli bonsi bakamanya ng’a omoruoti tarenge na komocha ase ogoitwa kw’Abineri, mosinto o Neri. 38Erio omoruoti agatebia abasomba baye, “Timomanyeti ng’a rero omonto omonene, omogambi bw’Abaisraeli, okure? 39Nonya naagetwe amaguta nkaba omoruoti nachandekire, tindi na nguru. Abamura aba b’omokungu Seruya nabatindi, tinkobanyara. Omonene naakane egesiomba koreng’ana nobobe bwabo!”
Currently Selected:
2 SAMWELI 3: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
