2 SAMWELI 1
1
Daudi ogotebigwa ng’a Saulo okure
1Nyuma Saulo gakure, Daudi akairana korwa ase ogoita Abaameleki, akabeera agwo Sikilagi ase engaki y’amatuko abere. 2Ase rituko ria gatato omonto agacha korwa ase egetwori gia Saulo; chianga chiaye nigo chiatandoire, na amaroba are ase omotwe oye. Ekero aigete ase Daudi, agekumba gochia inse ase okoorokia amasikani. 3Daudi akamoboria, “Ng’ai okorwa?”
Ere akamoiraneria, “Nigo natoorekire korwa ase egetwori ki’Abaisraeli.”
4Naende Daudi akamoboria, “Naki esegi egendererete? Nagosabire ontebie.”
Omonto oria akamoiraneria, “Abanto abange batamire korwa ase esegi eria, na abande abange mono baitirwe bakure. Boigo Saulo amo na Yonathani, momura oye, baitirwe bakure.”
5Daudi akaboria omomura oria, “Naki gwakorete okamanya ng’a Saulo na Yonathani, momura oye, bakure?”
6Omomura oria akamoiraneria, “Nigo yaba ng’a nao nare ase egetunwa kia Giliboa, na aroro nkarora Saulo osigamerete ritimo riaye; chigari konya chiamoikereire ang’e, na abanto bariinete chibarasi bakomominyokia. 7Agachia korigereria nyuma, akandora, akandangeria, na inche ngaitaba: Nao inde aa. 8Erio akamboria: Naye ng’o? Nkamoiraneria ng’a n’Omoamelekiinde. 9Ere agantebia: Koranche, ong’ike ang’e ong’ite, ekiagera nonya ngendererete koba moyo, nigo inde nobororo bw’ogokwa. 10Ase ayio nkamoika ang’e, nkamoita, ekiagrea nigo namanyete ng’a tare koba moyo nyuma kagure. Nkamorusia egutwa y’obogambi yare motwe oye na egetange kiarenge koboko kwaye, narentire ebinto ebio aa asore, aye omonene one.”
11Erio Daudi akabwata chianga chiaye, agachitandora, na abanto bonsi abarenge amo nere bagakora bo. 12Bakarera na kweumia, na kweng’ata goika mogoroba ase engencho ya Saulo na Yonathani, omwana oye, na ase engencho y’abanto b’Omonene na ey’Abaisraeli, ekiagera barabwo konya baitirwe nemioro.
13Daudi akaboria omomura oria omotebia amang’ana ayio, “Aye noyo o arari ore?”
Ere akamoiraneria, “Inche nigo inde omwana bw’Omoameleki ore omomenyi aa.”
14Daudi akamoboria, “Naki yabete otairogete korambora okoboko kwao ase ogoita omoakwa amaguta bw’Omonene?” 15Erio Daudi akarangeria omomura oyomo, akamotebia, “Inchuo omoite!” Omomura oria agaaka Omoameleki oria, akamoita, 16ekiagera Daudi konya otebirie Omoameleki oria, “Okomocha kw’ogoiterwa kw’amanyinga ao, tiga kobarwe igoro yao, ekiagera kwebereire kirori aye omonyene, ekero gwateba ng’a gwaitire omoakwa amaguta bw’Omonene.”
Daudi okoreera Saulo na Yonathani
17Daudi akoreera Saulo na Yonathani, momura o Saulo, nogotera oko gw’okweumia. 18Agachika ng’a abanto b’egesaku kia Yuda borokererigwe ogotera okwo kw’obota korikire ase Ebuku ya Yashari.
19“Inwe Abaisraeli, obonene bwaino
bwasireire igoro ase ebigoro biaino!
Chituoni chi’esegi chiaitirwe.
20Timoteba amang’ana aya ase Gati,
timoyararia ase chinchera chi’Askeloni.
Timotiga abaiseke b’Abafilisti bachenge;
timotiga abaiseke b’abanto baria batarogeti bagoke!”
21“Inwe ebigoro bia Giliboa,
ogotoora kwe riime tikoba igoro asemore,
gose embura tetwa,
gose emegondo teba ekwama endagera ekoruegwa ase Omonene,
ekiagera aroro agwo nao chinguba chie chituoni chiasareretigwe,
na enguba ya Saulo etaagetwe amaguta naende.
22Obota bwa Yonathani nigo bwaitete abanto abange,
nigo bwaiterete amanyinga,
bogaita abanto chituoni abarenge abanoru;
naboigo omoro o Saulo torenge koirana bosa.”
23“Saulo na Yonathani barenge abanchwa baito, barenge gotogokia.
Ase obogima na ase amakweri tibaatananetwe.
Barabwo nigo barenge abaango kobua chinsoti,
nigo barenge ne chinguru kobua chindo.”
24“Inwe abakungu b’Abaisraeli, reerera Saulo,
nere obaboyetie chianga chie rigori rinene,
chianga chimbariri chi’okwegokeria,
agachichabera ebinto bi’etahabu.”
25“Chituoni chiaitirwe ase esegi!
Yonathani nao araire ase ebigoro igoro, oitire.”
26“Aye Yonathani ominto,
nigo inde nomoichano omonene ase engencho yao,
aye nigo konya ongogetie mono.
Obwanchani bwao nigo bwarenge bongogetie
kobua obwanchani bw’abakungu.”
27“Chituoni chiaitirwe,
na ebirwanero bi’esegi biasirigwe!”
Currently Selected:
2 SAMWELI 1: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
