2 SAMWELI 16
16
Daudi na Siba
1Ekero Daudi agendire ake goetania egetunwa igoro, akaumerana na Siba, omosomba o Mefiboseti, ore ne chitigere ibere chibogoretie emegati amagana abere, na amabomba ’amasabibu amomo rigana erimo, na amabomba ’amako rigana erimo, amo nekerandi ekemo keroisirie korwa ase risankwa, kere nedivai. 2Omoruoti akaboria Siba, “Naki gwakora kwarenta ebinto ebi?”
Siba akamoiraneria, “Chitigere nechi ’abanto b’omoruoti bagochia koriina, na emegati na amatunda nebi’abamura abwo bagochia koria, na edivai baegwe banywe kobarosire ase erooro.”
3Omoruoti akamoboria, “Ng’ai omochokoro bw’omonene oo akare?”
Siba akamoiraneria, “Yerusalemu akare. Nigo ateba ng’a rero Abaisraeli bamoiraneirie oboruoti bwa sokoro yaye.”
4Erio omoruoti agatebia Siba, “Rigereria, kera egento ekiarenge ekia Mefiboseti nebiao.”
Siba akamotebia, “Nebekire inse asore. Koranche inyore ogwancherwa asore, aye omoruoti, omonene one.”
Daudi na Simei
5Ekero omoruoti Daudi aigete Bahurimu, omonto bw’eamate ya Saulo ore korokwa Simei, mosinto o Gera, agasoka korwa ase omochie. Ere kagocha akana‐koragereria Daudi. 6Akaba okoruta amagena ase Daudi omoruoti na ase abasomba baye bonsi, nonya abanto bonsi, amo nabaria chituoni, bamoetanaine, ase ensemo ya borio na eya bomosi. 7Simei gakoragereria, akabora, “Karue aa! Karue aa! Aye omoiteri amanyinga! Aye omosaria! 8Aye nigo kwairete oboruoti korwa ase Saulo, na bono Omonene nkoruseria are abanto b’enyomba ya Saulo abwo gwaitete egesiomba. Bono Omonene obekire oboruoti ase okoboko kw’Aibsalomu, omwana oo. Rigereria, obobe bwao bwakoiraneire, aye omoiteri amanyinga.”
9Erio Abisai, omomura bw’omokungu Seruya, agatebia omoruoti, “Naki esese eria ekwete egokoragereria iga, aye omoruoti, omonene one? Tiga ngende mbutore omotwe oye.”
10Omoruoti akabora, “Inki inde nainwe abamura b’omokungu Seruya? Onye okoragereria, ekiagera Omonene amotebirie ng’a andagererie inche Daudi, ning’o oranyare komoboria; Ninki kiagera ogokora iga?” 11Daudi agatebia Abisai na abasomba baye bonsi, “Rigereria, omwana one ndusetie ase enda yane, nere okondigia ang’ite. Bono omonto oyo bw’egesaku kia Benjamin, Inee, takondigia goetania? Motige andame. Omonene nere omotebirie ng’a andame. 12Ande Omonene ororire amabe anyorete, nere ang’akane amaya ribaga ri’okoragererigwa okwo kwanyorire rero.” 13Daudi na abanto baye bakaba bagendererete enchera yabo, na Simei nere okona‐goeta ensemo y’egetunwa, okoragereria; akamoruta amagena, na komosiarera ebuse. 14Omoruoti na abanto baye bonsi konya barosire ekero baigete aase gete. Ase igo bakaba bagotimokera aroro.
Abisalomu ore Yerusalemu
15Abisalomu na abanto abwo bonsi b’Abaisraeli bagaika Yerusalemu, na Ahitofeli nigo arenge amo nere. 16Ekero Husai Omoariki, omosani o Daudi, aigete ase Abisalomu, akamotebia, “Omoruoti, ochie kare! Omoruoti, ochie kare!”
17Abisalomu akaboria Husai, “Inee! Obo nabwo obwegenwa ore nabwo ase Daudi, omosani oo? Naki otatunyanete omosani oo?”
18Husai akamoiraneria, “Yaya, taibo. Korende oyo Omonene achorire, na abanto abwo, na Abaisraeli bonsi, bachorire, inche nimbe oyoye, mbeere asare. 19Naende ning’o ngwenerete nkorere? Tengwenereti nkorere aye, omwana oye? Ee, buna narenge gokorera iso, naboigo naye ndagokorere.”
20Erio Abisalomu agatebia Ahitofeli, “Bono buna tore aa, tosemie eki togwenerete gokora.”
21Ahitofeli akairaneria Abisalomu, “Soa nyomba, momenyane nabakungu ba sere‐sere abwo iso atiga bakorenda enyomba. Igo Abaisraeli bonsi bakoigwa ng’a kwagechigwe na iso, na abwo bonsi bagokobwatia nigo barabekwe chinguru.” 22Ase igo barabwo bagateneneria Abisalomu eema kerama igoro, na ere akarara nabakungu ba sere‐sere ba ise maiso marore ase Abaisraeli bonsi.
23Ase engaki eria ogosemia kw’Ahitofeli gokaba ase abanto buna amairanerio omonto akonyora korwa ase Nyasae. Naboigo ogosemia kw’Ahitofeli kwabete ase Daudi na ase Abisalomu.
Currently Selected:
2 SAMWELI 16: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
