2 SAMWELI 15
15
Omoroberio bw’Abisalomu bw’ogosaria
1Nyuma y’ayio Abisalomu akenyorera egari, ne chibarasi, na abanto emerongo etano barabe bakominyoka bosio bwaye. 2Ase kera rituko Abisalomu nigo anarete koimoka mambia chuni, otenena enchera ensemo ase egeita ki’omochie. Na ekero omonto onde bwensi are gocha ore ne ring’ana akoira ase omoruoti agamberwe, Abisalomu omorangeria gocha asare, omoboria, “Aye mochie ki kwarwa?” Ekero omonto oyio amoiraneirie nase gesaku ki ki’Abaisraeli arwa, 3Abisalomu omotebia, “Rora, amang’ana ao namaya, naende amaronge, korende monto onde tari aa omoruoti abegete orakoigwere.” 4Naende Abisalomu obora, “Onye nabekwa imbe omogambi ase ense eye, kera omonto ore ne ring’ana gose ekina gete anga nacha asende, nainche anga namokonya na komonyorera oboronge.” 5Omonto arenge goika asare na gotung’ama ase okoorokia amasikani, Abisalomu nigo arenge korambora okoboko kwaye obwata omonto oyio na komonyunyunta. 6Naboigo Abisalomu akorete Abaisraeli bonsi abwo barenge gocha ase omoruoti ase okogamberwa ebina biabo. Ase enchera eyio Abisalomu akang’usa Abaisraeli bonsi bakamwancha.
7Ekaba nyuma y’emiaka ene#15:7 Ene, kobwatekana namariko ande; Ekeibirania nigo kegoteba “emerongo ene” koyaerire, Abisalomu agatebia omoruoti, “Koranche ong’e ribaga ngende Heburoni goikerania eira yane narierete Omonene. 8Naki inche, omosomba oo, ekero narenge imenyete Gesuri ya Siiria, nigo narierete Omonene eira ng’a karang’iranie Yerusalemu, erio nimbe nkomokorera agwo Heburoni.”#15:8 Heburoni tiririkiri ase Ekeibirania
9Omoruoti akamotebia, “Genda nomorembe.” Ase igo Abisalomu akaimoka, akagenda Heburoni. 10Korende Abisalomu agatoma abanto bobisi ase ebisaku bionsi bi’Abaisraeli babitebie, “Ekero moraigwe eriogi ri’egetureri, erio moake eriogi motebe: Bono Abisalomu obeire omoruoti o Heburoni!” 11Abanto amagana abere korwa Yerusalemu bakagenda amo n’Abisalomu. Abwo bachigetwe koba abageni, bakagenda batari na komocha, ekiagera tibamanyete amang’ana agochia gokorwa. 12Ekero Abisalomu arenge korua ebing’wanso, agatoma abanto korangeria Ahitofali, omosemia bw’omoruoti Daudi, korwa ase omochie o Gilo. Obobe bwabo bw’okoba mamincha ya Daudi bokabucha, bokaba ne chinguru, na abanto abwo bakabwatana n’Abisalomu bakamentekana, bakaba abange.
Daudi ogotama korwa Yerusalemu
13Abanto bakairera Daudi amang’ana, bakamotebia, “Abaisraeli babwatanire n’Abisalomu bamoigwereire.”
14Erio Daudi agatebia abasomba baye bonsi, abwo barenge nere agwo Yerusalemu, “Imoka totame, onye torigetie gwetooria korwa ase Abisalomu. Ayerera bwango, Abisalomu tabaisa gocha gotoumokera na gotorentera amabe, gose aite abanto b’omochie nomoro.”
15Abasomba b’omoruoti bakamotebia, “Aye omoruoti, intwe abasomba bao nigo twebegete ang’e gokora rinde rionsi oratotebie.” 16Ase igo omoruoti akagenda, na abanto bonsi b’omochie oye bakamotunyana. Omoruoti agatiga abakungu baye ba sere‐sere ikomi bakorenda enyomba yaye.
17Omoruoti akagenderera gotama, na abanto bonsi bakamotunyana korwa nyuma; bakaratenena ake ase enyomba yarenge ensinyo. 18Abasomba baye bonsi bagaetera ensemo, bakamoetania, amo n’Abakereti bonsi, na Abapeleti bonsi, na Abagiti amagana atano na rimo, abwo bamobwatetie korwa Gati; bonsi bagaetania omoruoti. 19Omoruoti akaboria Itai Omogiti, “Nase ki naye okogenda amo naintwe? Irana obeere nomoruoti oyio omoyia; aye nomomenyi ore, naende nigo gwaserigwa korwa seino. 20Nigoro gwacha aa. Nase ki ndagotige ontunyane na kona‐koong’anya amo nainche, nainche timanyeti nonya naase ngochia? Irana amo nabamino, na Omonene akoorokerie obwanchani bwaye botari koera na obwegenwa bwaye.”
21Korende Itai akamoiraneria, “Ekeene, buna Omonene are moyo, na buna aye omoruoti, omonene one, ore moyo, aande onsi ase ogochia, onye nase ogokwa, gose ase okoba moyo, agwo nao nainche, omosomba oo, ndabe.”
22Erio Daudi agatebia Itai, “Gaki eta, ogende bosio.” Itai Omogiti agaeta gochia bosio amo nabanto baye bonsi, na abana abake bonsi, abarenge amo nere. 23Abanto b’ense eria bakarera namariogi amanene ekero abanto bonsi baare goeta, na omoruoti akaamboka akarooche ga Kidironi; abanto bonsi bakaamboka bakagenda ase enchera y’erooro.
24Zadoki nao arenge na Abalawi bonsi. Barabwo babogoretie Esanduku ya Nyasae ere ne chibao chirikire okobwatana kw’ogotianania. Abiatari nere agachao. Ababogoretie Esanduku eria ba kayetoora inse goika abanto bonsi bakaba barure ase omochie. 25Erio omoruoti agatebia Zadoki, “Bogoria Esanduku ya Nyasae, oyeiranie ase omochie ime. Onye nkonyora ogwancherwa ase Omonene, ere nang’iranie, ayenyorokie naende amo n’Obomenyo bwaye omonyene. 26Korende karantebie ng’a timogwenereti, inche nao inde aa, ankorere aya ararore are amaya asare.” 27Naende omoruoti agatebia Zadoki omokuani, “Aye nomorori. Irana ase omochie nomorembe. Oirane n’Ahimasi, omwana oo, na Yonathani, omwana o Abiatari, abana abwo babere baino. 28Naama! Inche nigo nkoganyera ase ebiambokero bi’orooche aiga ase erooro goika inyore amang’ana korwa asemore.” 29Ase igo Zadoki na Abiatari bakabogoria Esanduku ya Nyasae; bakayeirania Yerusalemu, nabarabwo bakabeera aroro.
30Daudi agatiira gochia ase Egetunwa ki’Emezeituni igoro okona‐korera otubete omotwe oye, tabegete bikoroto; na abanto abarenge amo nere bagetuba emetwe yabo bakorera kobagotiira. 31Ekero Daudi atebetigwe ng’a Ahitofeli nere nao akare ase abwo babwatanire n’Abisalomu, agasaba, “Omonene, onchora omoroberio bw’Ahitofeli obe bosa.”
32Ekero Daudi aigete ekegoro igoro, ase Nyasae are gosasimerwa, Husai Omoariki agacha komorotota; eganchwa yaye nigo yatandoire, na ebuse ere ase omotwe oye. 33Daudi akamotebia, “Oise kogenda amo nainche nigo orabe egurube asende. 34Korende oise koirana ase omochie na gotebia Abisalomu: Aye omoruoti, nigo ndabe omosomba oo buna narenge omosomba o iso agwo ritang’ani, naboigo bono ndabe omosomba oo, erio nario orankonye tosarie omoroberio bw’Ahitofeli. 35Inee! Zadoki na Abiatari abakuani tibakari aroro? Gaki ing’ana rinde rionsi oraigwe ase enyomba y’omoruoti oribatebie. 36Barabwo mbakabwate abana babo babere, Ahimasi, omwana o Zadoki, na Yonathani, omwana bw’Abiatari. Mobe mokobatoma bandetere kera ring’ana moraigwe.”
37Husai, omosani o Daudi, agasoa omochie o Yerusalemu ekero Abisalomu nere asoeteo.
Currently Selected:
2 SAMWELI 15: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
