2 SAMWELI 17
17
Husai okong’aina Abisalomu
1Nyuma y’ayio Ahitofeli agatebia Abisalomu, “Tiga nchore abanto chilifu ikomi na ibere (12,000), erinde mbwatie Daudi ase obotuko obo. 2Inche imochiere mobosokano imogose ekero arosire na erusirie moyo. Abanto abwo bonsi bare komo mbatame, nainche ninyare goita omoruoti kare bweka. 3Erio mbarente abanto bonsi asore, buna omoriakari akorentwa ase omosacha oye. Aye nomonto oyomo origetie oite; naende abanto bonsi babe nomorembe.” 4Ogosemia okwo gokagwenera Abisalomu na abagaaka bonsi b’Abaisraeli.
5Erio Abisalomu akabora, “Rangeria Husai Omoariki, toigwe nere, buna agototebia.” 6Na ekero Husai achete ase Abisalomu, Abisalomu akamotebia, “Aya naro Ahitofeli atosemirie. Naro tokobwatia gose? Onye taibo, aye totebie aya togokora.”
7Husai akairaneria Abisalomu, “Ogosemia okwo Ahitofeli abaeire tikori okuya ase ekero eke.” 8Naende Husai akamotebia, “Nomanyete iso na abanto baye, ng’a nabanto chituoni chi’esegi, bare abakong’u, naende nigo bare abatindi buna edubu yaurirwe chimanwa chiaye ase orosana. Iso nomonto omanyete korwana esegi, takorara botuko, ere nabanto baye. 9Ande nonya mbono nigo ebisete ase engoro gete, gose ase ribwago. Kerabe ng’a abanto mbaitwe ekero esegi egochaka, onde bwensi karaigwe amang’ana ayio nigo aratebe ng’a abanto bare kobwatia Abisalomu babuirwe. 10Igo nonya noyore omoremu buna endo, nigo arairianyeke kegima, ekiagera Abaisraeli bonsi mbamanyete ng’a iso nigo are etuoni y’esegi, na abanto baye nabatindi ase esegi. 11Ase ayio ogosemia kwane noko: Orente Abaisraeli bonsi amo korwa Dani goika Beeri‐Seba babe abange buna omokenye ore engegu y’enyancha; naye omonyene ogende amo nabarabwo ase esegi. 12Erio toorokere Daudi aande onsi aranyorekane, tomogwere buna riime rikogwa igoro ase riroba, gose titotiga onde bwensi abe moyo, ere gose monto onde bwensi bare komo. 13Aise gosoa ase omochie onde bwensi, Abaisraeli bonsi nigo bararente chingori bachietananie omochie oyio, bayokurure gochia rooche ime, gose igena rinde tirigotigara nonya nerimo.”
14Abisalomu na Abaisraeli bonsi bakabora, “Ogosemia kwa Husai Omoariki nokuya kobua koria kw’Ahitofeli.” Omonene nere ochigete ogosemia okwo okuya kw’Ahitofeli kwangwe, erinde arentere Abisalomu emechando.
Daudi ogokurerwa atame etoorie
15Husai agatebia Zadoki na Abiatari, abakuani, “Ahitofeli osemirie Abisalomu na abagaaka b’Abaisraeli amang’ana aya na aya, korende inche nabasemia iga na iga. 16Bono toma amang’ana bwango, mokurere Daudi ng’a tabaisa korara ase obotuko obo ase ebiambokero agwo ase erooro, korende goika amboke orooche, erinde tabaisa gosirigwa amo nabanto baye bonsi.”
17Bono Yonathani na Ahimasi nigo barenge baganyete ase ensoko y’Eni‐Rogeli, ekiagera boboete gosoa omochie ime babaise kororwa. Omoiseke omosomba oyomo nigo arenge okona‐kobairera amang’ana, nabarabwo bayairera omoruoti Daudi. 18Korende rituko erimo omosae oyomo akabarora, agatebia Abisalomu amang’ana ayio. Ase ayio Yonathani na Ahimasi bakagenda ase enka y’omonto gete aaria Bahurimu. Omonto oyio nabwate engoro y’amache ase omochie oye, nabarabwo bakebisa imeo, 19na omokungu bw’omonto oria akaimokia egekuneko, akayekuneka, akanekera endagera yaye igoro aroro; gose omonto onde tamanyete amang’ana ayio. 20Ekero abasomba b’Abisalomu bachete ase omokungu oria nyomba ime, bakamoboria, “Ng’ai Yonathani na Ahimasi bare?”
Omokungu oria akabatebia, “Bambokire orooche orwo, bachiire.”
Ekero abanto baria babarigetie tibabarora, bakairana Yerusalemu. 21Nyuma barabwo kobachiire, baria babere bagasoka korwa ase engoro eria, bakaamboka orooche bwango, bakagenda ase omoruoti Daudi bakamotebia, “Imoka mwamboke orooche bwango, morue aa, naki aya na aya naro Ahitofeli arobeirie mamincha yaino.” 22Erio Daudi na abanto bonsi barenge komo bakaimoka, bakaamboka Yorodan. Bogachia gokia, bonsi konya bambokire; onde tatigarete otambogete.
23Ekero Ahitofeli aroche ng’a ogosemia kwaye kwangirwe, akariina etigere yaye, akagenda omochie oye, na karobeirie amang’ana ’enyomba yaye, akagenda agesunga, agakwa. Gakure agatindekwa ase oboina bwa ise.
24Daudi konya oikire Mahanaimu ekero Abisalomu ambogete Yorodan amo n’Abaisraeli bonsi barenge komo. 25Abisalomu konya obekire Amasa koba omotang’ani bw’abarwani b’esegi ribaga ria Yoabu. Amasa nigo arenge mosinto o Yitira Omoisumaeli. Yitira nere omenyanete n’Abigaeli, omoiseke o Nahasi, mosubati omwabo Seruya, oyorenge ng’ina Yoabu. 26Abisalomu amo n’Abaisraeli bagatoora ase ense ya Gileadi.
27Ekaba Daudi gaikire Mahanaimu, akanyorana na Sobi, mosinto o Nahasi, korwa Raba, ase ense y’Abaamoni, na Makiri, mosinto bw’Amieli, korwa Lo‐Debari, na Barisilai Omogileadi korwa Rogelimu. 28Barabwo bakarenta ebirarero, ne chisani, na ebikorero biroisirie korwa ase amaroba. Boigo bakarenta engano, na esairi, na obosie, na ebigara bisambire, ne ching’ende ao ao, 29na obooke, na amaguta, ne ching’ondi, na amabomba ’amabeere e chiombe abwatanirie bibe endagera ase Daudi amo nabanto barenge komo. Abwo babirentete nigo batebete, “Abanto aba enchara yabanyarire, naende barang’ire na barosire aiga ase erooro.”
Currently Selected:
2 SAMWELI 17: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
