2 SAMWELI 14
14
Yoabu okoroberia buna Abisalomu agochia koirana
1Yoabu, omomura bw’omokungu Seruya, akamanya ng’a omoruoti nigo aganetie Abisalomu mono. 2Ase igo agatoma abanto bagende Tekoa kwoyia omokungu gete omong’aini korwao. Ekero achire Yoabu akamotebia, “Aye bwekore ng’a nigo okwereire; obeke chianga chi’ogokwerwa, tibweaka amaguta, bwekore buna omokungu obeire okweumia amatuko amange ekiagera akwereirwe. 3Erio ogende ase omoruoti, omotebie amang’ana ndagotebie,” na Yoabu akamotebia aya agochia gokwana.
4Omokungu oria o Tekoa, ekero aigete ase omoruoti, agatung’ama inse, akaumama ase okomosika, akabora, “Aye omoruoti, koranche onkonye.”
5Omoruoti akamoboria, “Emechando yao nereri?”
Akamoiraneria, “Inche nomoboraka; omosacha one nigo akwete. 6Inche, omosomba oo omokungu, nigo nabwate abana abamura babere, nabarabwo bagachaka kwomana kobare mogondo, gose onde tarengeo ore kobatoorania, na oyomo agaita oria, onde omwabo. 7Abaamate baane bonsi banyimokeire inche, omosomba oo, bagontebia ng’a indue omomura oyio one bamoite, ekiagera aita oyomwabo. Baise komoita nigo ndabe tindi nomonyamwando. Naboigo bakare korigia korimia omorero one otigarete, tibatigera omosacha one erieta riaye riatorwe, gose onde oye atigare ase ense.”
8Omoruoti agatebia omokungu oria “Genda bwoo, ninkoroiserie amang’ana ayio.”
9Erio omokungu oria akamotebia, “Aye omoruoti, omonene one, tiga inche na eamate ya tata tobogorie okomocha kw’ebibe ebio. Asore omoruoti, gose ase ekerogo kiao ki’obogambi, komocha tikobao.”
10Omoruoti akamoiraneria, “Onde bwensi aise kogotebia amang’ana are mamincha yao, omorente asende, nere takogokuna naende.”
11Erio omokungu oria agateba, “Aye omoruoti, koranche oinyore Omonene, Nyasae oo, erinde omorusia egesiomba ki’amanyinga tamenta gosaria na goita omwana one.”
Akamoiraneria, “Ekeene, buna Omonene are moyo, nonya nagatukia akamo k’omwana oo tigakogwa inse.”
12Omokungu oria akabora, “Aye omoruoti, omonene one, ing’a inche, omosomba oo, ribaga nkwane ring’ana erimo asore.”
Akamotebia, “Aye kwana.”
13Ase igo omokungu oria akabora, “Naki aye kwarobeirie amang’ana buna ayio are mamincha y’abanto ba Nyasae? Ase ogokwana ring’ana eri, aye omoruoti kwegambirie aye omonyene, ekiagera toeti omwana oo, oria otamete, ribaga airane nka. 14Intwe twensi goika tokwe; nigo tore buna amache aitekire inse atanyare kobuuchwa naende. Nyasae tari gosiria obogima. Nigo akoroberia ng’a oria otamete taserigwa na gwatananwa korwa asare. 15Bono nigo nacha gokwana aya asore, aye omonene one, ekiagera abanto banyoboirie. Ase igo inche omokungu, omosomba oo, nkarengereria ng’a nkwane naye omoruoti. Ande aye nonkorere aya inche, omosomba oo, nkoboria. 16Ee, omoruoti, nonyigwe na ontoorie inche, omosomba oo, korwa ase okoboko kw’omonto oyo origetie gonsiria inche amo nomwana one na gotorusia korwa ase omwando o Nyasae. 17Inche, omosomba oo, nkarengereria ng’a nonyare kong’a obotoereru, ekiagera aye, omoruoti one, nigo ore buna omomalaika o Nyasae ase okomanya gwatanana ayare amaya na ayare amabe. Omonene Nyasae abe amo naye!”
18Erio omoruoti agatebia omokungu oria, “Tobaisa kombisa gento kende gionsi ndakoborie.”
Omokungu oria akamotebia, “Aye omonene one omoruoti, mboria.”
19Omoruoti akamoboria, “Inee! Yoabu takari amo naye ase aya onsi?”
Omokungu oria akairaneria, akabora, “Ekeene, buna aye, omonene one omoruoti, ore moyo, monto onde tari oranyare gokana gose kwanga gokoiraneria amaborio ao na gotama gochia aande, ensemo ya borio gose eya bomosi. Ekeene, Yoabu, omosomba oo, nere omboretie inche, omosomba oo, ng’a nkwane amang’ana aya onsi. 20Omosomba oo Yoabu nigo akorire aya, erinde akoonchorerie goetera ase ring’ana eri, korende aye, omonene one, nigo ore ne chisemi buna echi’abamalaika ba Nyasae; nomanyete amang’ana onsi ayare ase ense.”
21Nyuma y’ayio omoruoti agatebia Yoabu, “Naama! Nakoeire ribaga eri. Genda orente omosae oria Abisalomu.”
22Yoabu agatung’ama inse, akaumama ase omoruoti ase okomosika na komosesenia. Naende akabora, “Rero inche, omosomba oo, namanyire ng’a nanyorire ogwancherwa ase obosio bwao, aye omoruoti, omonene one, ekiagera kwang’ikeraneirie okogania kwane.” 23Yoabu akaimoka, akagenda Gesuri, akarenta Abisalomu, 24na omoruoti agateba, “Tiga amenye ao ase enka yaye omonyene; tabaisa gocha ase obosio bwane.” Ase igo Abisalomu akamenya bwoye oka, taba okororana nomoruoti.
Abisalomu ok’obwatanigwa na Daudi
25Bono ase egati y’Abaisraeli bonsi monto onde tarenge orenge nogotogigwa ase ekieni kiaye buna Abisalomu. Nigo arenge omonyakieni mono; korwa ebisanyi bi’amagoro goika omotwe oye tarenge na kemocho kende. 26Ere nigo arenge konacha etukia yaye omoerio o kera omwaka, ekiagera yare koba endito mono. Oborito bw’etukia yaye nigo bwarenge chikiro ibere na ekeng’ese, koreng’ana ekerengo kiare gokorerwa ase omoruoti. 27Abisalomu nigo aiboreretwe abamura batato, na omoiseke oyomo ore korokwa Tamari. Ere nigo arenge omoiseke omonyakieni.
28Abisalomu akamenya Yerusalemu emiaka ebere atana gochia kororana nomoruoti. 29Erio Abisalomu akarangeria Yoabu, erinde amotome ase omoruoti, korende Yoabu akaanga gocha asare. Naende akamorangeria eria kabere, korende boigo akaanga, tacha. 30Ase igo Abisalomu agatebia abasomba baye, “Rora omogondo o Yoabu nigo osinyaine noyone, noro bwamire esairi, genda motongie omorero esairi eria eyie.” Bakagenda, bakayetongia omorero ekayia.
31Na bono Yoabu akaimoka, akagenda bw’Abisalomu, akamoboria, “Nase ki abasomba bao basambire esairi yane iga?”
32Abisalomu akamoiraneria, “Rigereria, ngatoma abanto asore ng’a oche ogende ase omoruoti, omotebie amang’ana aane. Inki rende narwerete Gesuri? Nanga mbuya nare komenya aroro goika rero iga. Bono ninganetie korora omoruoti. Onye obobe bore asende ang’ite.”
33Ase igo Yoabu akagenda ase omoruoti, akamotebia amang’ana ayio. Erio omoruoti akarangeria Abisalomu; na ere akagenda ase omoruoti, agatung’ama inse akaumama ase obosio bwaye, na omoruoti akamonyunyunta.
Currently Selected:
2 SAMWELI 14: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
