2 ABAKORINTO 6
6
1Na intwe gatogokora emeremo amo nere, twabasoroire timonyora obuya bwa Nyasae bosa. 2Naki igo agoteba,
“Ase engaki yancheire nakoiraneretie ogosaba kwao,
rituko ri’ogotooreka nagokonyete.”
Rora, bono nario engaki y’ogwancherwa; rora, bono nario rituko ri’ogotooreka. 3Titobeka ekegocha ase onde bwensi, erinde obosomba bwaito bobaise gokwanwa bobe, 4korende ase kera ring’ana twenyore ogotogigwa okuya buna abasomba ba Nyasae, ase okoganya okonge, ase emechando, ase obokong’u, ase ogochandwa, 5ase ogoakwa, ase ogosibwa, ase ogokorerwa riroroche, ase emeremo, ase okorenda, ase enchara, 6ase obochenu, ase okomanya, ase oboremereria, ase obwororo, ase Omoika Omochenu, ase obwanchani botari nobong’ainereria, 7ase amang’ana ’ekeene, ase chinguru chia Nyasae. Nigo tore nebirwanero bi’oboronge ase okoboko gw’okorio na ase okoboko gw’okobee. 8Twanyorire ogosikwa na ogotasikwa; togokwanwa bobe na togokwanwa buya. Twakorirwe buna abanto abang’ainereria, korende nabanto b’ekeene tore, 9buna abatamanyekaneti, korende nigo tomanyekanete buya; buna abagokwa, na rora moyo tore. Twasusuirwe, korende titoitiri; 10twaichanigwe, korende amatuko onsi nigo tore nomogoko; tore abataka, korende twabatenenkirie abange, titori na gento, nonya nabo ntore nebinto bionsi.
Okorigia obwanchani bw’abaonchogete
11Twakwanire maiso marore nainwe, Abakorinto; chinkoro chiaito chiagareigwe. 12Titosiegeti chinkoro chiaito asemore, korende inwe nigo mosiegete echiaino asetore. 13Bono nigo ngokwana nainwe buna nabana baane more. Buna twabakoreire, nainwe motokorere bo, mogareyie chinkoro chiaino.
Ogokurerwa kw’ogotasanga nabategeneti
14Timosiberanigwa rikorogoto amo nabategeneti. Naki nkobwatana ki kore ase egati y’oboronge na ogosaria? Gose ngosanga ki kore ase egati y’omobaso na omosunte? 15Naende nkobwatana ki kore ase egati ya Kristo na Beliali?#6:15 Beliali, engencho yaye; otaisaini, gose omosaria Gose oyobwegenete, insemo ki abwate amo noyotegeneti? 16Naende ngosanga ki kore ase egati ye Hekalu ya Nyasae na emegwekano y’ogosasimwa? Naki intwe ne Hekalu ya Nyasae ore moyo, buna Nyasae atebete,
“Nimenye ime yabo, na ase egati yabo nintaare,
na inche nimbe Nyasae obo,
na barabwo nababe abanto baane.
17Ase ayio, buna Omonene agoteba:
Soka korwa asebare, mweatanane,
gose timokuna egento getachenegeti,
na inche nimbaroisie.
18Nimbe Iso oino,
na inwe mobe abana baane, abamura na abaiseke.
Nabo Omonene Omobui otebire.”
Currently Selected:
2 ABAKORINTO 6: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
