2 ABAKORINTO 5

1Naki twamanyire ng’a enyomba yaito ere buna eema eyere ey’ense eye, ekero erasarigwe ntore noboagacho borwete ase Nyasae, enyomba etaagachiri namaboko, eyere igoro kare na kare. 2Naki intwe ase eye iga togwechanda, ntore namaiga koboyigwa obomenyo bwaito bokorwa igoro. 3Ekero twaboyigwe titokororekana tore getirianda. 4Naki intwe, abatore ase enyomba eye ere buna eema, nigo togwechanda, toritoerwa, tari ng’a igo torigetie korusigwa ase enyomba eye, korende ntorigetie okoboyigwa konde, erinde egekonyorekana namakweri kemerwe nobogima. 5Gaki ere oyotoroisetie ase amang’ana aya nere Nyasae, oyotoete Omoika buna ekebwaterero giantenenera.

6Gaki amatuko onsi nigo tore nomoyo bw’oboremu, naende twamanyire ng’a ekero tore aa ase omobere nigo tomenyete aare korwa ase Omonene, 7ekiagera nigo togotaara ase okwegena, tari ase okorora. 8Ntore nomoyo bw’oboremu, na twarorire buya kobua korua ase omobere na komenya amo n’Omonene. 9Ase ayio, onye tore aa, gose onye titori aa, nigo okogania gwaito kore ng’a tomogwenere ere. 10Naki netogwenerete intwe twensi koorokigwa ase obosio bw’ekerogo gi’ekina gia Kristo; erio kera omonto anyore koreng’ana buna are gokora ase omobere, onye bire ebiya gose onye bire ebibe.

Obwanchani bwa Kristo nokogania gwaito ne chinguru chiaito

11Nabo gatwamanyire komoiroka Omonene, twateemire kong’usa abanto; korende twamanyekanire ase obosio bwa Nyasae, na inche nasemeirie ng’a twamanyekanire ase okomanya gwe chinkoro chiaino ime boigo. 12Titogwetogia intwe abanyene ase obosio bwaino naende, korende twabaeire ribaga ri’ogwetogia ase engencho yaito erinde monyare koba nokoiraneria ase abagwetogia ase amang’ana a isiko oka, gose tari ase amang’ana ’enkoro ime. 13Naki onye twasirerigwe nobong’aini bwaito, ayio nigo are ase Nyasae; gose onye tore nobong’aini bwaito, ayio nigo are ase engencho yaino. 14Naki obwanchani bwa Kristo nigo bogotobetereria, ekiagera twamanyire ekeene ng’a onye oyomo okure ase engencho ya bonsi, nabo bonsi bakure. 15Ere agakwa ase engencho ya bonsi, erio abare moyo tibaba moyo ase engencho yabo boka abanyene, korende nase engencho yaye ere oyokwete, naende akaboka ase engencho yabo.

Obogima oboyia ime ya Kristo

16Ase ayio, korwa bono intwe titomanyeti monto onde koreng’ana buna mwanyabanto bamomanyete; nonya intwe twamomanyete Kristo ritang’ani buna mwanyabanto bamomanyete, korende bono titokomomanya buna igo. 17Ase ayio, omonto karabe ime ya Kristo nigo are egetongwa ekeyia; ebia kare biaetire, rora bionsi biabeire ebiyia. 18Korende bionsi nigo bikorwa ase Nyasae, oyotobwatanirie intwe amo nere omonyene ase Kristo, nere otoeire obosomba bw’okobwatanigwa, 19ekiagera Nyasae nigo arenge ime ya Kristo, akabwatania ense amo nere omonyene, tababarera ogosaria kwabo; ere obekire asetore ring’ana ri’okobwatanigwa.

Amang’ana ’okobwatanigwa

20Nabo tore abatomire na Kristo; Nyasae nigo akobasorora inwe goetera ase emenwa yaito. Twabasoroire ase engencho ya Kristo: Mobwatanigwe na Nyasae. 21Nyasae omokorire ere, oyotamanyeti ebibe, koba ebibe ase engencho yaito, erio asare intwe tobe noboronge ase Nyasae.

Currently Selected:

2 ABAKORINTO 5: EKEGUSIIBBLE

Highlight

Copy

Compare