2 ABAKORINTO 7

1Abanchani baane, ekiagera tore ne chiira echio, twesibie intwe abanyene ogotacheneka kw’omobere na omoika, erio toikeranie obochenu ase okomoiroka Nyasae.

Ogoichanigwa na okoremigwa kw’ogocha gwa Tito

2Toigorere chinkoro chiaino; titokorereti monto onde bobe, titosareti monto, titorieti monto kiaboama. 3Tintebeti ring’ana eri erinde mbagambie inwe, ekiagera ritang’ani konya nabatebirie ng’a inwe nigo more ne ribaga ase chinkoro chiaito, ase ogokwa na okoba moyo amo. 4Ninde noboremu obonge kongokwana nainwe; ogwetogia kwane igoro asemore nokonge; naichoirwe nokoremigwa. Ase ogochandwa gwaito gwonsi naichoirwe nomogoko omonge mono.

5Naki nonya nekero twaigete Makedonia, emebere yaito tiyanyorete ogotimoka, korende togachandwa chinsemo chionsi; isiko ekaba esegi, na ime bokaba obwoba. 6Korende Nyasae, oyokoremia abaichanete, agatoremia ase ogocha gwa Tito, 7gose tari ase ogocha kwaye gwoka, korende nonya nase okoremigwa koria aremetigwe nainwe. Agatotebia amang’ana ’amaiga aino, na okweng’ereria kwaino, na omokia oino asende, goika nkamenta kogoka. 8Naki nonya nabaichanetie ase rirube riria tinkweitia (nonya neitetie ritang’ani), ekiagera narorire ng’a rirube riria ndiabaichanetie, korende nase ekero egeke gioka. 9Bono nagokire, tari ekiagera mwaichanetigwe, korende ekiagera mwaichanetigwe goika mokaonchoka, ekiagera nigo mwaichanetigwe ase ogwancha kwa Nyasae, erinde timonyara gosira ase ogokora gwaito. 10Naki ogoichanigwa okore ase ogwancha kwa Nyasae nigo gokorenta okoonchoka gokoraa gochia ase ogotooreka, gotari na kweitia; korende ogoichanigwa gw’ense nigo gokorenta amakweri. 11Rora buna ogoichanigwa okwo kore ase ogwancha kwa Nyasae kwabarenteire omokia, na ogwekengera, na okobea, okoiroka na amaiga amange, ogwetigana na egesiomba! Ase kera enchera mweorokererie koba motari na komocha ase ring’ana erio. 12Nabo, nonya nabarikerete, tindigeti ase engencho yaye ere oyokorete bobe, gose tari ase engencho yaye ere oyokoreretwe bobe, korende ogwetigana kwaino asetore konyare koorokigwa asemore ase obosio bwa Nyasae. 13Ase ayio twaremigwe.

Na kobua ase okoremigwa okwo tokagokera mono omogoko o Tito, ekiagera omoyo oye otimokigwe nainwe mwensi. 14Naki onye ngwetogia asare ase engencho yaino, tinasoogetigwe; korende buna twabatebetie amang’ana onsi ase ekeene, naboigo nogwetogia gwaito ase obosio bwa Tito nigo kwarenge ogw’ekeene. 15Obwanchani bwaye bw’omoyo asemore bwamentekanire, ekero akoinyora okoigwera kwaino inwe mwensi, na buna mwamoroisetie ase okoiroka na okoiguswa. 16Nagokire, ekiagera ase kera ring’ana ninde nomoyo bw’oboremu ase engencho yaino.

Currently Selected:

2 ABAKORINTO 7: EKEGUSIIBBLE

Highlight

Copy