1 SAMWELI 7
7
1Abanto ba Kiriati‐Yearimu bagacha, bakaira Esanduku eria y’Omonene, bakayebeka ase enyomba y’Abinadabu, ase ekegoro igoro; bagachora na gwatanana Eleazari, omwana oye omomura, abe okorenda Esanduku eria.
Samweli okogambera Abaisraeli
2Korwa engaki eyio Esanduku eria y’Omonene ekabeera agwo Kiriati-Yearimu ase engaki entambe, emiaka emerongo ebere. Ase engaki eyio yonsi, Abaisraeli bonsi bakaba bakorera ase Omonene ng’a abakonye.
3Erio Samweli agatebia Abaisraeli bonsi, “Onye mogochia koonchoka na koirana ase Omonene ne chinkoro chiaino chionsi, morusie korwa asemore chinyasae chingeni chionsi, amo n’Asitaroti, mokorere Omonene bweka; erio nario arabatoorie korwa ase amaboko ’Abafilisti.” 4Erio Abaisraeli bakarusia korwa asebare chinyasae chiria Baali na Asitaroti, bakamokorera Omonene bweka.
5Samweli agateba, “Sangereria Abaisraeli bonsi agwo Misipa, erinde imbasabere aroro ase Omonene.” 6Abanto bagasangererekana agwo Misipa, bakabuucha amache, bakayaumora agwo ase obosio bw’Omonene, bakeng’ata ase rituko erio, bagakwana aroro agwo, “Twakorire ebibe ase Omonene.” Erio Samweli akaba okogambera Abaisraeli agwo Misipa.
7Ekero Abafilisti baigwete ng’a Abaisraeli basangererekanire agwo Misipa, abanene b’Abafilisti bakagenda gochia kobarwania. Abaisraeli bagachia koigwa amang’ana ayio, bakabairoka, 8bagatebia Samweli, “Tobaisa gotiga kogenderera gotosabera ase Omonene, Nyasae oito, ng’a atotoorie korwa ase amaboko ’Abafilisti.” 9Erio Samweli akaimokia emanwa y’eng’ondi ekogonka, akayerua ase Omonene ekaba ekeng’wanso ki’ogosambwa ekegima, agasabera Abaisraeli ase Omonene, na Omonene akaigwa ogosaba kwaye. 10Ekero Samweli arenge korua ekeng’wanso keria ki’ogosambwa, Abafilisti bagacha korwania Abaisraeli, korende Omonene akabarentera okogukura okonene gwe chinkoba korwa igoro, akabatantania, na Abaisraeli bakabua Abafilisti. 11Abaisraeli bakaimoka korwa agwo Misipa, bakabwatia Abafilisti goika Beti‐Kari, bakabaitera inchera.
12Erio Samweli akaimokia rigena, akaritenenia gati ya Misipa na Seni, akariroka Ebeni‐Eseri,#7:12 Ebeni‐Eseri, engencho yaye: rigena ri’ogokonya akabora, “Omonene otokonyire twaikire aiga.” 13Naboigo Abafilisti bakabugwa, tibanyora ribaga naende gosoa ase ense y’Abaisraeli. Okoboko kw’Omonene nigo kwarenge mamincha y’Abafilisti ase amatuko onsi Samweli arenge moyo. 14Emechie yonsi egati y’Ekironi na Gati, eyio Abafilisti konya baurire Abaisraeli, ekairanigwa amo ne chingongo chiaetanaineo. Agwo boigo omorembe okaba ase egati y’Abaisraeli na Abaamori.
15Samweli akaba omogambi ebina bw’Abaisraeli ase amatuko onsi arenge moyo. 16Kera omwaka akaba okogenda goika Beteli, na Giligali, na Misipa, akaba okogambera Abaisraeli ebina ase emechie eyio yonsi. 17Erio akaba okoirana Rama, ekiagera agwo nao bwoye orenge, na agwo akaba okogamba ebina bi’Abaisraeli, naende akaagachera Omonene egesasimero.
Currently Selected:
1 SAMWELI 7: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
