1 SAMWELI 8
8
Abanto bagasaba baegwe omoruoti
1Ekero Samweli konya agotire akabeka abamura baye babe abagambi igoro y’Abaisraeli. 2Omomura oye omotangi nigo are korokwa Yoeli, na oyo o kabere Abiya. Barabwo nigo babete abagambi agwo Beeri‐Seba. 3Korende abamura ba Samweli tibakorete buna ise arenge gokora ase okobwatia oboronge; bakabotiga na bakerigeria chinibo, bakarigia riaaki na bakaonchorana oboronge.
4Erio abagaaka bonsi b’Abaisraeli bagasangererekana amo, bakagenda ase Samweli agwo Rama, 5bakamotebia, “Rora bono aye kwagotire, na abamura bao tibari kobwatia chinchera chiao. Ase ayio tochorere omoruoti oranyare gotogambera buna ebisaku binde bionsi bibwate abaruoti.” 6Korende Samweli tancha amang’ana ayio bamotebetie, “Toe omoruoti atogambere.” Ase ayio Samweli agasaba Omonene. 7Erio Omonene akamotebia, “Otegerere amang’ana abo baragotebie. Tari aye bangire, korende ninche bangire, timba omoruoti obo. 8Korwa ekero keria nabarusetie Misiri goika rero iga bantigire inche, babeire bagokorera chinyasae ching’ao, na bono bagotigire aye buna bantigete inche. 9Gaki bono, igwera amang’ana abo, korende obakurere mono, obatebie aya omoruoti orache kobagambera arabe ogokora.”
10Ase igo Samweli agatebia abanto baria baganetie omoruoti amang’ana onsi Omonene amotebetie. 11Akabatebia, “Aya naro omoruoti oyio orabagambere arabakorere: Naire abana baino abamura, ababeke ase chigari chiaye, na abande ababeke babe abariini be chibarasi chiaye bamokorere. Abande babetererigwe baminyoke bosio bwe chigari chiaye. 12Abande babekwe babe abatang’ani b’abarwani chilifu, na abande b’emerongo etano. Abande babe bakorema emegondo yaye na kogesa endagera yaye, abande babe bakoroisia ebirwanero bi’esegi na ebikorero bie chigari chiaye. 13Naire abaiseke baino bachie koba abaroisia amaguta akweakwa, abande babe bakoruga endagera na koroisia emegati. 14Naire na emegondo yaino y’endagera, na ey’emesabibu, na ey’emezeituni eyere emiya mono, ayee abasomba baye. 15Narusie ensemo ya ikomi korwa ase rigesa riaino ri’emegondo y’endagera, na ey’emesabibu, ayee abwo bakomorenda, na abasomba baye. 16Boigo naire abasomba baino, abamura na abaiseke, na abasae baino abaya, babe bakomokorera, ne chitigere chiaino chibe chikomokorera boigo. 17Naende arusie ensemo ya ikomi y’amaicho aino, nainwe abanyene mobe abasomba baye. 18Ase engaki eyio namobe mokorera nobororo ase engencho y’omoruoti oino, oyio mwechorerete, korende Omonene takoba ogotegerera okorera kwaino.”
19Korende abanto bakaanga gotegerera Samweli, bakabora, “Yaya, taibo! Nigo toganetie omoruoti atogambere. 20Ntorigetie koba buna ebisaku binde; ntoganetie omoruoti ogotogambera na gototang’ana, ekero togochia korwana chisegi chiaito.” 21Ekero Samweli aigwete amang’ana aya abanto bakwanire, akayaira ase Omonene. 22Omonene agatebia Samweli, “Igwera amang’ana abo, obachorere omoruoti.” Erio Samweli agatebia Abaisraeli bairane, kera omonto ase omochie oye.
Currently Selected:
1 SAMWELI 8: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
