1 SAMWELI 6
6
Okoiranigwa gw’Esanduku eria y’Omonene
1Esanduku eria y’Omonene ekabeera ase ense y’Abafilisti ase engaki y’emetienyi etano na ebere. 2Erio Abafilisti bakarangeria abakuani babo na abaringoria, bakababoria, “Ninki togokora ase Esanduku eye y’Omonene? Totebie inchera ki torayeiranie aase aye.”
3Barabwo bakabairaneria, “Onye mokoirania Esanduku eyio ya Nyasae bw’Abaisraeli, timobaisa koyeirania bosa etari nebiegwa; goika momoruere okoruegwa ase engencho y’okomocha. Erio namogwene, naende monyare komanya ng’a nase ki Omonene agendererete kobaa egesusuro.”
4Bakaboria, “Inee! Okoruegwa okwo gw’okomocha nkoroki torairanie ase Omonene?” Barabwo bakabairaneria, “Emegwekano etano y’amagumba, na etano ye chimbeba, yonsi eroisirie korwa ase etahabu. Moire emegwekano ereng’aine nomobaro bw’abagambi b’Abafilisti, ekiagera amaakwa ayio nigo abete igoro asemore mwensi, na igoro ase abanene baino boigo. 5Goika moroisie emegwekano y’amagumba, na eye chimbeba, ebio bigosaria ense yaino; erio motogie Nyasae bw’Abaisraeli. Ande nabo arakore emechando yaino ebe emegusu asemore, na ase chinyasae chiaino, na ase ense yaino. 6Nase ki mogokong’ia chinkoro chiaino buna Abamisiri na Farao bakong’etie echiabo. Inee! Ekero Omonene abaete amaakwa amakong’u tibaete Abaisraeli ribaga bakaruao? 7Ase igo roisia egari enyia, morente chiombe ibere chigokamwa, chitana gosiberwa rikorogoto; mosibere chiombe echio egari eyio, korende morusie chimori chiabo korwa ase chirochio, mochitige nka. 8Moimokie Esanduku eye y’Omonene ase egari igoro, na emegwekano eria y’etahabu, moyebeke ase esanduku eng’ao ebeere ensemo y’Esanduku eria y’Omonene. Emegwekano eyio moyeirere Omonene ebe okoruegwa ase engencho y’okomocha okwo. Nyuma y’ayio motige Esanduku egende aase aye. 9Erio moyerigererie. Onye ekogenda enchera ya boronge gochia ase ense yaye ya Beti‐Semesi, rirorio momanye ng’a n’Omonene otorentera obobe obwo obonene, korende onye taibo, rirorio tomanye ng’a tari okoboko kwaye gwatoaka; ande nigo twanyora emechando eye mosiabano.”
10Erio abanto abwo bagakora bo. Bakaimokia chiombe ibere chigokamwa, bagachisibera egari, bagasiekera chimori nka. 11Bakabeka Esanduku y’Omonene ase egari, bakabeka na esanduku eria yabekire emegwekano eria ye chimbeba na ey’amagumba eroisirie korwa ase etahabu. 12Chiombe chiria chikagenda chikona‐kwana, chikabwatia enchera endonge ekogenda Beti‐Semesi, tichiagobera aande, ensemo y’okorio gose ey’okobee, na abagambi b’Abafilisti bakaba bagochitunyana korwa nyuma, goika ase orobebe rwa Beti‐Semesi.
13Bono abanto ba Beti‐Semesi nkogesa barenge engano yabo agwo ase rikura, na ekero barigereretie, bakarora Esanduku eria, bakagoka mono. 14Ekero egari eria yaigete ase omogondo o Yoshua o Beti‐Semesi egatenenao, ase rigena rinene riarenge. Abanto bagaatia chibao chi’egari eria, erio bakarua chiombe chiria chikaba ekeng’wanso ki’ogosambwa ase Omonene. 15Abalawi bakarusia Esanduku eria y’Omonene, amo nesanduku eria ende yabekire amo, eyarenge nemegwekano eria y’etahabu, bagachibeka igoro ase rigena riria rinene. Erio ase rituko riria abanto ba Beti‐Semesi bakaruera Omonene ebing’wanso bi’ogosambwa na ebing’wanso binde. 16Ekero abagambi baria b’Abafilisti baroche ayio bakairana gochia Ekironi ase rituko riria.
17Abafilisti bakarua emegwekano eria y’amagumba, eroisirie korwa ase etahabu, ekaba okoruegwa gw’okomocha ase Omonene, omogwekano oyomo korwa ase kera oyomo bw’emechie eyio: Asidodi, na Gasa, na Askeloni, na Gati, na Ekironi. 18Boigo bakarua emegwekano eria ye chimbeba eroisirie korwa ase chitahabu, oyomo korwa ase kera omochie orenge kogamberwa nabanene baria batano b’Abafilisti, emechie eyio yonsi yagiteire chindwaki na ebichie bionsi bitagiteire. Ne rigena riria rinene ase babegete Esanduku eria y’Omonene nigo rire kirori goika rituko ria rero agwo ase omogondo o Yoshua o Beti‐Semesi.
19Omonene agaita abanto ba Beti‐Semesi emerongo etano na ebere korwa ase abanto chilifu emerongo etano, ekiagera barigereretie Esanduku eria. Abanto bakaba bakorera na kweumia, ekiagera Omonene aitete abanto abange ase egati yabo.
Esanduku y’Omonene ase Kiriati‐Yearimu
20Erio abanto ba Beti‐Semesi bakabora, “Ning’o oranyare gotenena ase obosio bw’Omonene, Nyasae oyo Omochenu? Nase banto ki aragende gakorua asetore?” 21Ase igo bagatoma abanto ase baria bemenyete Kiriati‐Yearimu babatebie ng’a, “Abafilisti bairanirie Esanduku eria y’Omonene. Tirimboka gocha moyioyie.”
Currently Selected:
1 SAMWELI 6: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020