1 SAMWELI 3
3
Omonene okorangeria Samweli
1Omwana oria Samweli akaba ogokora emeremo ase obosio bw’Omonene inse y’oboteneneri bwa Eli. Ase amatuko aria ring’ana ri’Omonene tiriarenge gokwanwa mono na amaroro ’obobani tarenge konyorekana otatiga okomo okomo. 2Ase amatuko aria amaiso a Eli konya achakire koba chinchingori, tare korora buya. Ase obotuko obomo ere nigo arenge oraire aase aye a botambe, 3na Samweli nigo arenge oraire ime ase Obomenyo Obochenu aase Esanduku ya Nyasae yarenge. Ritang’ani chitaya chia Nyasae chitararima, 4Omonene akarangeria Samweli! Ere agaitaba, “Nao inde aa!” 5Erio akaminyoka gochia ase Eli, akamotebia, “Nao inde aa! Aye nigo kwandangeria.”
Korende Eli akamoiraneria, “Inche tinkorangereti, genda orare.” Erio Samweli akairana gochia korara.
6Omonene akarangeria Samweli naende; ere akaimoka akagenda ase Eli, akamotebia, “Nao inde aa. Aye nigo kwandangeria.”
Korende Eli akamoiraneria, “Omwana one, tinkorangereti, genda orare.”
7Bono Samweli konya taramanyereria eriogi ri’Omonene, ne ring’ana ri’Omonene konya tiriraorokigwa asare.
8Omonene akarangeria Samweli eria gatato. Ere akaimoka, akagenda ase Eli, akamotebia, “Nao inde aa. Aye nigo kwandangeria.”
Erio Eli akamanya ng’a n’Omonene okorangeria omwana oria. 9Ase ayio, agatebia Samweli, “Genda orare, na karakorangerie naende, okwane iga: Omonene kwana, inche omosomba oo ninyigwete.” Erio Samweli akagenda, akarara naende aase aye.
10Erio Omonene agacha, agatenena aria, akarangeria buna chingaki chinde, “Samweli! Samweli!”
Samweli agaitaba, “Kwana. Inche, omosomba oo, ninyigwete.”
11Omonene agatebia Samweli, “Rituko erimo ninkore egento gete ase egati y’Abaisraeli, egento gi’okwoboyia, na kera omonto orakeigwe, amato aye nigo arabe akoeera. 12Ase rituko erio ning’ikeranie amang’ana onsi, korwa omochakano goika omoerio, ayio nakwanete ng’a ninyakore ase Eli na ase eamate yaye. 13Namotebetie ng’a nabeire ang’e koa eamate yaye egesusuro kogenderera botambe, ekiagera okorire ebibe. Ere nigo amanyete ng’a abamura baye mbabete bakorama erieta riane, korende tabakania batige. 14Ase ayio natianire ase eamate ya Eli ng’a okobwatanigwa tigokoba nonya ng’ake ase ebibe biabo ase enchera y’ebing’wanso gose okoruegwa konde gwonsi.”
15Samweli akarara goika mambia; erio akaboka, akaigora ebisieri bi’enyomba y’Omonene. Ere akoboa gotebia Eli okorora koria aroche. 16Eli akamorangeria, akabora, “Samweli, omwana one!”
Nere agaitaba, “Nao inde aa!”
17Eli akamoboria, “Ninki Omonene agotebetie? Tobaisa kombisa gento. Korambise gento kende gionsi, nonya ne ring’ana erimo, rirorio Nyasae akoe egesusuro ekenene.” 18Erio Samweli akamotebia kera ring’ana, tamobisa rinde rionsi. Eli akabora, “Nere Omonene; tiga akore eri rikomogwenera.”
19Samweli akamenta gokina; Omonene akaba nere, erinde tatiga ring’ana riaye nonya nerimo ritaikeranetigwe. 20Abaisraeli bonsi korwa Dani goika Beeri‐Seba bakamanya ng’a Samweli ekeene bwegenirwe koba omobani bw’Omonene. 21Omonene akagenderera kweorokia agwo Silo, akeorokia ase Samweli goetera ase ring’ana riaye. Na ekero Samweli arenge gokwana, Abaisraeli bonsi nigo barenge gotegerera.
Currently Selected:
1 SAMWELI 3: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
