1 SAMWELI 2
2
Hana okomotogia Omonene
1Hana agasaba, agakwana,
“Enkoro yane yachengeire Omonene;
ase Omonene orogunchara rwane rwaimokereire igoro.
Omonwa one nigo ogosekereria ababisa baane;
nagokire ase ogotooreka kw’Omonene.
2“Onde tari ore omochenu buna Omonene,
onde tari buna ere,
egetare kende tikeri buna Nyasae oito.
3Timogenderera gokwana amang’ana obwerori,
oboenenu tiborua ase emenwa yaino.
Omonene nigo are Nyasae oyomanyete onsi,
ere nigo akorenga aya onsi abanto bagokora.
4Amata ’abanto chituoni abunekire,
korende abakogochwa babekirwe chinguru.
5Abanto ababwate endagera eisaine kare
bono berure gokora emeremo, erinde banyore endagera,
nabwo barenge nenchara, baigotire bono.
Omokungu orenge omogomba oiboire abana batano na babere,
korende oria konya obwate abange otigaire ore bosa.
6Omonene nigo agoita, naende oirania obogima;
ere nigo agotoma abanto gochia aase abakure,
naende obabokia.
7Omonene nigo agokora omonto oba omotaka, gose omonda,
ere nigo agokeyia omonto, gose omoimokereria igoro.
8Nigo akoimokia omotaka korwa ase obotaka obweere,
na omoremerwa korwa ase ribu,
obabeka baikaransa amo nabwo bare nokobua,
na kobaa omwando bw’ebirogo bi’obonene.
Oboroso bw’ense nobw’Omonene,
na igoro y’oboroso obwo oterekereire enseo.
9“Narende amagoro ’abegenwa baye,
korende abakori amabe nigo barasirigwe ase omosunte,
onde tari orabue ase chinguru chiaye ere omonyene.
10Abare mamincha y’Omonene nabasenyentwe,
Omonene nabaake nenkoba korwa igoro.
Ere nanachere ense yonsi ekina.
Omonene nae omoruoti oye okobua
na aimokererie igoro orogunchara rw’omoakwa amaguta oye.”
11Erio Elikana akairana gochia Rama nka bwoye, korende omwana oria Samweli agatigara ogokorera Omonene inse y’oboteneneri bwa Eli omokuani.
Abamura ba Eli
12Abamura ba Eli nigo barenge abanto ababe batarochi inchera. Tibasigete Omonene, 13na tibare gokora buna abakuani bagwenerete gokora ase abanto. Ribaga ri’ayio, ekero omonto arure ekeng’wanso kiaye, omosomba bw’omokuani nigo arenge gocha abwate euma ere namaino atato, na ekero enyama egendererete koiyekwa, 14omosomba oria aba ogosoyia euma eria ime ase esuguria, gose enyongo, gose ase gento kende enyama ekoiyekerwa ime yaye, ne chinyama chionsi arenge korusia neuma eria nigo chiarenge koirerwa omokuani. Naboigo abakuani abwo barenge gokorera Abaisraeli bonsi barenge gocha agwo Silo. 15Amo nayio, ekero enyama enoru etarayia, omosomba bw’omokuani nigo arenge gocha otebia omonto oria orenge korua ekeng’wanso, “Kae omokuani enyama achie gosamba, ekiagera tagwancha enyama enyiyeke; igo anchete enyama embese.”
16Onye omonto oria orenge gotebia omosomba oria, “Tiga tosambe enyama enoru ritang’ani, erio nyuma omanye koira enyama ende yonsi oganetie,” nere igo arenge goteba, “Yaya, taibo, goika oyeng’e bono iga. Onye tokong’a enyama eyio, rirorio nigo nkoyerusia ne chinguru, inyeire.”
17Ebibe ebi bi’abamura ba Eli nigo biarenge ebinene mono ase obosio bw’Omonene, ekiagera ase enchera eyio abanto nigo beorokereretie gochaya ebing’wanso bi’Omonene.
Samweli agwo Silo
18Samweli akagenderera gokora emeremo ase obosio bw’Omonene. Ere nigo arenge omosae ore kobeka egesibao ki’egatani. 19Kera omwaka ng’ina nigo arenge komoroiseria eanga, omoirera ekero arenge kogenda amo nomosacha oye gochia korua ekeng’wanso gia kera omwaka. 20Erio Eli nigo arenge koba ogosesenia Elikana na mokaye, atebia Elikana, “Omonene asesenie omokungu oyo akoiborere abana bande babe ribaga ri’omwana oyo gwatananete ase Omonene.”
Erio baba bakoirana gochia nka.
21Omonene agasesenia Hana, ere akaibora abamura bande batato na abaiseke babere. Omwana oria Samweli akaba ogokina ore ase enyomba y’Omonene.
Eli na abamura baye
22Bono Eli konya ogotire mono. Ere nigo abete okona‐koigwa amang’ana onsi abamura baye baare gokora ase Abaisraeli bonsi, na buna baare gotomana nabakungu abarenge gokora emeremo ase egesoero ki’Eema y’Omosangererekano. 23Erio akabatebia, “Nase ki mogokora amang’ana buna ayio? Abanto bonsi bantebirie amabe aino mogokora. 24Abana baane, tiga timokora bo. Chinkuma echio naigure ase egati y’abanto b’Omonene tichiri chingiya. 25Omonto karakore ebibe ase omonto onde, Nyasae nabe omobwatania, korende omonto karakore ebibe ase Nyasae, ning’o oranyare koba omobwatania?”
Korende barabwo tibaigwerete ise, ekiagera Omonene konya oganirie kobaita.
26Bono omwana oria Samweli akagenderera gokina ase omobere, akamogwenera Omonene na mwanyabanto.
Obobani igoro ya Eli na abanto b’eamate yaye
27Omonto oyomo o Nyasae agacha ase Eli, akamotebia, “Amang’ana aya naro Omonene akwanire: Inee! Inche tineorogetie ase sokororia yao na ase ororeria rwaye, ekero barenge abasomba ba Farao agwo ase ense ya Misiri? 28Tinabachorete inwe korwa ase ebisaku bi’Abaisraeli mobe abakuani baane, na morue ebing’wanso ase egesasimero kiane, naende mosambe ubani na mobe mokobeka egesibao ki’obokuani komogocha ase obosio bwane? Tinaete abanto b’ororeria rwa sokororia yao baire ebing’wanso bionsi Abaisraeli baare gosamba nomorero? 29Nase ki rende mwabeire mogochaya na koba ne ribero ase ebing’wanso biane, na okoruegwa kwane, nachigete birentwe ase Obomenyo bwane? Aye Eli kwaeire abamura bao ogosika kong’etania ase okobaa ribaga kwenoria ase eyere enoru mono kobua, ase kera ekeng’wanso abanto baane Abaisraeli bakonduera. 30Ase engencho eyio, inche Omonene, Nyasae bw’Abaisraeli, natebire iga: Nigo nariete eira ng’a abanto b’eamate yao, na ab’ororeria rwa sokororia yao mbabe bagokora emeremo y’obokuani ase obosio bwane kogenderera botambe. Korende bono nigo ngoteba ng’a tinyancheti bo, ekiagera abanto bansigete, nainche nimbasike, na baria banchayete, nabarabwo mbachaywe goetania. 31Naama! Amatuko ngocha are, ekero ndasirie chinguru chiao ne chinguru chi’abanto b’ororeria rwa sokororia yao, erio tanyorekana omonto omogotu ase eamate yao. 32Aye ekero ore nemechando norore obotenenku boraruegwe ase Abaisraeli, na igo aye nobe ne ribero, korende ase eamate yao omonto omogotu tagotokao. 33Tinkorusia kera oyomo oino korwa ase egesasimero. Oyo ntarusie korwao nigo arabe okogoukoria amaiso, na goichania enkoro yao, na abanto bonsi b’enyomba yao nigo barakwe bataragota. 34Abamura bao babere, Hofini na Finehasi, nigo barakwe ase rituko erimo, na ayio nabe ekemanyererio asore ase aya nakwanire. 35Ninyechorere omokuani omwegenwa, oyorabe ogokora ogwancha kwane na onsi aya nganetie. Oyio nere ndae ororeria rwaye rorabe rogotenena bokong’u, na abanto b’ororeria rwaye mbagenderere gokora emeremo y’obokuani ase obosio bw’omoakwa amaguta one. 36Nebe ng’a omonto onde bwensi ase eamate yao oratigare ore moyo nagende gotung’ama ase obosio bw’omokuani oyio, amosabe amoe ebesa gose omogati, ogoteba: Nagosabire ombeke nainche nkonye ase emeremo gete y’obokuani, erinde inyore omogati nkoria.”
Currently Selected:
1 SAMWELI 2: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
